De Bruyne រងរបួស ខណៈ Man City ត្រៀមលេងប្រកួតសំខាន់ៗ

2024-03-14 13:43:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើប្រយុទ្ធ Kevin De Bruyne រងរបួសដើមភ្លៅ។ របាយការណ៍បឋមបញ្ជាក់ថា របួសស្រាល តែរង់ចាំការពិនិត្យបន្ត។

ដំណឹងនេះត្រូវបានទម្លាយដោយគ្រូបង្វឹកជម្រើសជាតិបែលហ្សិក លោក Domenico Tedesco ក្រោយឆ្លងការពិនិត្យដោយក្រុមគ្រូពេទ្យជំនាញ។

ដំបូងឡើយ De Bruyne មានឈ្មោះ ត្រៀមចូលលេងឲ្យក្រុមជម្រើសជាតិបែលហ្សិក ក្នុងប្រកួតមិត្តភាពជាមួយអៀរឡង់ និងអង់គ្លេស នាចុងខែនេះ។ ទោះជាយ៉ាងណា ដោយទទួលបានដំណឹងបែបនេះពីក្រុមគ្រូពេទ្យ គ្រូបង្វឹកបែលហ្សិក Tedesco សម្រេចមិនដាក់ឈ្មោះ De Bruyne ចូលលេងប្រកួតមិត្តភាពខាងមុខនោះឡើយ។

មិនទាន់មានរបាយការណ៍ណាអាចបញ្ជាក់បានថា De Bruyne នឹងអវត្តមានរយៈពេលប៉ុន្មានឡើយដោយសាររបួសនេះ។

De Bruyne ទើបបានចូលលេងបាល់វិញឲ្យក្លឹប Manchester Cityកាលពីថ្មីៗប៉ុណ្ណោះ ក្រោយអវត្តមានជាង ៥ ខែ ដោយសាររបួសសរសៃពួរ។ ទោះជាបានចូលលេងក្ដី កីឡាករចូលលេងបាន ១២ ប្រកួត ក្នុងនោះកីឡាករលេងបានពេញម៉ោង ៩០ នាទី ត្រឹម ៥ ប្រកួតប៉ុណ្ណោះ។

Manchester City ត្រូវប៉ះ Newcastle United នាចុងសប្ដាហ៍នេះ ក្នុងកម្មវិធី FA Cup ហើយត្រូវប៉ះ Arsenal នៅចុងខែមីនា ក្នុងកម្មវិធីលីគកំពូលអង់គ្លេស Premier League ដែលកំពុងមានការប្រណាំងប្រជែងគ្នាយ៉ាងខ្លាំង។

ខ្សែបម្រើវ័យ ៣២ ឆ្នាំ De Bruyne គឺជាកីឡាករបង្គោលរបស់ Manchester City។ តាំងពីចូលរួមជាមួយក្លឹបតាំងពីឆ្នាំ ២០១៥ មក កីឡាករតែងបង្ហាញទម្រង់លេងយ៉ាងល្អជាពិសេសចូលរួមបង្កើតឱកាស និងបញ្ជូនបាល់ឲ្យមិត្តរួមក្រុមស៊ុតចូលទី។ គិតមកទល់ពេលនេះ កីឡាករលេងឲ្យក្លឹប ៣៧០ ប្រកួត និងស៊ុតចូល ៩៨ គ្រាប់៕

ប្រភព៖ Independent អត្ថបទ៖ សេរី មង្គល