សហព័ន្ធល្បុក្កតោកម្ពុជា៖ ពង្រីកការផ្សព្វផ្សាយជាមួយកងទ័ពអង្គភាពយោធភូមិភាគទី៥ រៀបចំការប្រកួតក្បាច់គុនមិត្តភាពជាលើកទី១

2024-03-21 10:26:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃពុធ ទី២០ ខែមីនា ឆ្នាំ២០២៤ កងទ័ពអង្គភាពយោធភូមិភាគទី៥ រៀបចំបើកប្រកួតក្បាច់គុនមិត្តភាព មានដែលមាន ៣ប្រភេទកីឡាជាលើកទី១ ក្រោមកិច្ចសហការជាមួយសហព័ន្ធកីឡាល្បុក្កតោកម្ពុជា។

ឧត្ដមសេនីយ៍ទោ សេង ធារិន

ឧត្ដមសេនីយ៍ទោ សេង ធារិន ប្រធានគណៈកម្មការកីឡាយោធភូមិភាគទី៥ អញ្ជើញជាអធិបតី ពិធីបើកការប្រកួតកីឡាក្បាច់គុនកងយោធពលខេមរភូមិន្ទ ,ក្បាច់គុនល្បុក្កតោ និងក្បាច់គុនបញ្ចស៊ីឡាត់កម្ពុជា ដែលធ្វើឡើងនៅទីបញ្ជាការ កងពលតូចថ្មើរជើងលេខ៥១ ស្ថិតនៅភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។

ទិដ្ឋភាពថ្ងៃប្រកួត

ឯកឧត្ដមបានបញ្ជាក់ថា ការរៀបចំពិធីប្រកួតកីឡាក្បាច់គុន មិត្តភាព ទាំង៣ប្រភេទកីឡានេះ ជាសកម្មភាពថ្មីលើកទី១ សម្រាប់អង្គភាពយោធភូមិភាគទី៥ ហើយនិងឈានទៅរៀបចំការប្រកួតបន្ថែមទៀត ដើម្បីឲ្យស្របតាមចក្ខុវិស័យរបស់ប្រមុខរាជរដ្ឋាភិបាល ក្រសួងការពារជាតិ អគ្គបញ្ជាការ និងកងទ័ពជើងគោក ក្នុងការប្រែក្លាយទស្សនវិស័យឱ្យទៅជាសកម្មភាពជាក់ស្តែង ទស្សនវិជ្ជា នៃក្បាច់គុន គឺបង្រៀនឱ្យអ្នកចេះក្បាច់គុនពិតប្រាកដប្រព្រឹត្តខ្លួនជាមនុស្សប្រកបដោយវិន័យ គុណធម៌ថ្លៃថ្នូរ ប្រកបដោយថាមពល ដើម្បីជាឆ្អឹងខ្នងដ៏រឹងមាំ នៃការកសាងសមត្ថភាពយោធិនគ្រប់រូប និងជាខឿនការពារជាតិមាតុភូមិ និងប្រជាជន។

ទិដ្ឋភាពថ្ងៃប្រកួត

ការប្រកួតនេះដើម្បីធ្វើការដកបទពិសោធន៍បច្ចេកទេសចលនាប្រយុទ្ធធ្វើសំយោគតាមបែបវិទ្យាសាស្រ្ត ក្នុងការវិវត្តន៍ខ្លួនតាមបរិបទ នៃការរីកចម្រើនវិស័យកីឡាប្រកបដោយកាលានុវត្តន៍ភាព។ ក្នុងឱកាសនោះដែរ ឧត្ដមសេនីយ៍ទោ សេង ធារិន ប្រធានកីឡាកងទ័ពយោធភូមិភាគទី៥ និងជាប្រធានសហព័ន្ធកីឡាបញ្ចស៊ីឡាត់កម្ពុជា បានថ្លែងអំណរគុណយ៉ាងជ្រាលជ្រៅបំផុតចំពោះឯកឧត្ដម លោកជំទាវ លោកឧកញ៉ា លោក លោកស្រី ដែលមានសមានចិត្តក្នុងការចូលរួមលើកស្ទួយវិស័យកីឡាក្បាច់គុន កងយោធពលខេមរភូមិន្ទ ហើយបានបរិច្ចាកថវិកាផ្ទាល់ខ្លួនកសាងសាលាគុនមួយកន្លែងនៅក្នុងទីបញ្ជាការកងពលតូចថ្មើរជើងលេខ៥១ តាមលក្ខណៈស្តង់ដារលើកស្ទួយធនធានមនុស្ស ទាំងកីឡាករ ចៅក្រម អាជ្ញាកណ្ដាល។

ទិដ្ឋភាពថ្ងៃប្រកួត

បញ្ជាក់ដែរថា ការប្រកួតកីឡាក្បាច់គុនមិត្តភាពនេះមានសមាសភាពកីឡាករ មកពីសាលាគុនកងពលតូចថ្មើរជើងលេខ៥១ ខេត្តបន្ទាយមានជ័យ សាលាគុនល្បុក្កតោរាជធានីភ្នំពេញ ខេត្តកំពង់ឆ្នាំង និងខេត្តសៀមរាប ដែលជាកីឡាករធ្លាប់បានប្រកួតដណ្តើមមេដាយជូនជាតិមាតុភូមិក្នុងព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។