ស្មាត់ ក្អាត់ រំលឹករឿងហួសចិត្តនិងអស់សំណើចមួយកាលដើរលេងបាល់ទះឆ្នាំ ២០០៤-២០០៥

2024-04-14 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីឈ្មោះ ចាន់ សារ៉ន ប្រិយមិត្តស្នេហាវិស័យកីឡាបាល់ទះច្បាស់ជាស្គាល់ ប៉ុន្តែបើនិយាយពីឈ្មោះក្អាត់ ប្រិយមិត្តខ្លះស្គាល់ហើយក៏ប្រិយមិត្តខ្លះទៀតប្រហែលក៏មិនស្គាល់ដែរ។

តាមពិតទៅ ចាន់ សារ៉ន និង ក្អាត់ ជាឈ្មោះមនុស្សតែម្នាក់ទេ ហើយជាស្មាត់ធំបាល់ទះខ្លាំងមួយរូបនៅកម្ពុជា។ លោកបានប្រឡូកក្នុងវិស័យមួយនេះច្រើនឆ្នាំ ហើយក៏បានជួបរឿងរ៉ាវច្រើនផងដែរ។ ជាមួយគ្នានេះដែរកីឡាករដែលជួយឱ្យក្លឹបបាល់ទះស្នងការដ្ឋាននគរបាលខេត្តព្រះសីហនុ លើកពានរង្វាន់បាល់ទះឯកឧត្ដម អភិសន្តិបណ្ឌិត ស សុខា ឆ្នាំ២០២៣ បានរំលឹករឿងហួសចិត្តកាលពីអំឡុងឆ្នាំ២០០៤-២០០៥។ លោកបានទៅលេងបាល់ទះ៣ស្មើនៅស្រុកមួយក្នុងខេត្តតាកែវ ដែលកាលនោះភ្នាល់ដាក់លុយ ១សិត ១ម៉ឺនរៀល ១ម៉ឺនប្រាំពាន់រៀល ពីរទៅបីម៉ឺនរៀលប៉ុណ្ណោះ ហើយលោកបានលេងឈ្នះរហូតដល់ទៅ៨សិតជាប់ៗគ្នាបានលុយប្រម៉ាណ២៨ម៉ឺនរៀល។ ហេតុតែជំនាន់គ្មាន Internet, Youtube, Facebook និងទូរសព្ទដៃទំនើប ធ្វើឲ្យមនុស្សម្នាក់ៗស្គាល់គ្នាបានត្រឹមលឺឈ្មោះប៉ុណ្ណោះ។

ក្រោយឈ្នះ៨សិតជាប់គ្នា ពេលប្រមូលលុយជិះម៉ូតូមកផ្ទះវិញ ស្រាប់តែម្ចាស់តារាងបាល់ទះបានហៅឲ្យស្មាត់រ៉នឈប់រួចសួរថា តើលោកហ៊ានលេងជាមួយស្មាត់ ក្អាត់ ដែរឬទេ? ឭដូចនេះលោក ចាន់ សារ៉ន នឹកអស់សំណើចក្នុងចិត្ត ហើយឆ្លើយតបវិញថាលោកមិនហ៊ានលេងទេ ព្រោះស្មាត់ក្អាត់នេះខ្លាំងណាស់ លោកសុំមិនជួបឡើយ។

លោក ចាន់ សារ៉ន បានប្រាប់ Sabay ទាំងអស់សំណើចថា ៖«ជំនាន់នោះ១សិត២ម៉ឺន៣ម៉ឺនច្រើនហើយ មុនដំបូង៣ស្មើឈ្នះ គេដូរ១លេង៣ស្មើយើងឈ្នះ លេងបីបួនយើងឈ្នះទៀត គេដើរហៅគ្នាមកអស់ហើយ អាហ្នឹងអាខ្លាំងគេអត់ទាន់មក ដល់អាខ្លាំងគេមក គេថាសុំដកដកពីរលេងតែបីទេ យើងលេងទៀតឈ្នះទៀត ហើយអាចុងក្រោយលេងពីរបួន គេដើររ៉ៃលុយគ្នាអស់ហើយបាន៨ម៉ឺន សរុបទៅឈ្នះលុយប្រហែល២៨ម៉ឺន...ឈ្នះហើយយកលុយហើយជិះចេញវិញ ហើយម្ចាស់តារាងគេហៅ បង!បង!បង! ខ្ញុំឈប់! ខ្ញុំសួរម៉េចបង? ម្ចាស់តារាងគេឆ្លើយ ស្អែកបងឯងលេងមួយបងក្អាត់? ខ្ញុំថាអត់ទេ! (សើច) កាលណុងមានស្គាល់មុខណា លឺតែឈ្មោះល្បីតៗគ្នា ឲ្យខ្ញុំលេងជាមួយស្មាត់ក្អាត់ម៉េច បើស្មាត់ក្អាត់ខ្ញុំហ្នឹងហើយ»៕