សហគមន៍ព្រែកត្នោត ខេត្ដកំពត សង្ស័យការងាប់របស់ផ្សោតទម្ងន់ជាង ១០០គីឡូ កើតចេញពីបទល្មើស

2024-05-10 05:06:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានសហគមន៍ព្រែកត្នោត ក្រុងបូកគោ ខេត្ដកំពត សន្និដ្ឋានថា ត្រីផ្សោតដែលប្រជានេសាទប្រទះឃើញងាប់ ហើយអណ្ដែតទៅទើរដើមកោងកាង ស្ថិតនៅមិនឆ្ងាយប៉ុន្មានពីទីស្នាក់ការសហគមន៍នោះ គឺកើតចេញពីទូកបទល្មើសធំៗប្រើលូសាច់អួនថ្នក់ជ្រៅ ហើយវែង ដើម្បីអូសទើបសត្វផ្សោតចូលបណ្ដាលឲ្យងាប់តែម្ដង។

ការសន្និដ្ឋានបែបនេះ គឺបន្ទាប់ពីសមាជិកសហគមន៍ប្រទះឃើញទូកបទល្មើសនេសាទធំៗ នៅតែបន្ដលួចចូលនេសាទដោយខុសច្បាប់ក្នុងដែនអភិរក្សសហគមន៍។ សកម្មភាពទាំងនេះ បានរំខាន និងគំរាមកំហែងដល់ជីវិតសត្វផ្សោតទាំងពីរប្រភេទ គឺផ្សោតខ្មៅក្បាលត្រឡោក និងផ្សោតពណ៌ផ្កាឈូក កំពុងរស់នៅទឹកប្រៃ។

ប្រធានសហគមន៍លោក អ៊ុក សុវណ្ណារិទ្ធ បានប្រាប់Sabay តាមរយៈបទសម្ភាសន៍ខ្លីមួយបន្ទាប់ពីមន្ដ្រីជំនាញជលផល តំណាងអង្គការ MCC ស្រង់ត្រីផ្សោតដែលងាប់នៅទៅកប់កាលពីថ្ងៃទី៩ ខែឧសភា ឆ្នាំ២០២៤ ថា តាមសភាពសាកសព គឺផ្សោតបានងាប់ប្រហែល១សប្ដាហ៍មុនប្រជាសហគមន៍ប្រទះឃើញនៅថ្ងៃទី៨ ខែឧសភា។ ផ្សោតដែលងាប់នោះមានទម្ងន់ប្រមាណ ១០០គីឡូក្រាម និងមានប្រវែង ២ម៉ែត្រ។

បើតាមប្រធានសហគន៍រូបនេះ ផ្សោតដែលកំពុងមានវត្ដមាននៅក្នុងតំបន់អភិរក្សសហគន៍ព្រែកត្នោត មានប្រហែល ៤០ក្បាល។ ក្រៅពីប្រឹងប្រែងទប់ស្កាត់បទល្មើសនេសាទនៅក្នុងតំបន់អភិរក្ស ដើម្បីភិរក្សសត្វផ្សោត សហគមន៍ព្រែកត្នោតដោយមានការសហការជាមួយមន្ដ្រីជំនាញ អាជ្ញាធរ និងមន្ដ្រីអង្គការក្រៅរដ្ឋាភិបាល បានទម្លាក់ថ្មសិប្បនិម្មិតចំនួន ២០ដុំ ដោយក្នុងមួយដុំៗមានទម្ងន់ ២តោនក្នុង ហើយថ្មទម្ងន់ក្រោម២តោន ជាង១០០ដុំ ត្រូវបានទម្លាក់ចូលជាបន្ដបន្ទាប់គ្នាតាំងពីឆ្នាំ២០០៧ ដើម្បីធ្វើជារនាំងកាត់បន្ថយទប់រលកទឹកសមុទ្រ និងជាជម្រកដ៏សំខាន់សម្រាបសត្វផ្សោតទឹកប្រៃ៕