នាព្រឹកថ្ងៃទី៦ ខែមិថុនា ឆ្នាំ២០២៤ កម្ពុជា បាន​សម្ពោធបើកឱ្យប្រើប្រាស់ផ្លូវការកំពង់ផែពហុបំណង​កំពត ក្រោមអធិបតីភាព​របស់​សម្តេចមហាបវរធិបតី ហ៊ុន ម៉ាណែត។

​ក្នុងពិធីសម្ពោធ​នេះ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងថា កំពង់ផែពហុបំណងកំពតនេះស្ថិតក្នុងភូមិសាស្រ្តដែលមានអំណោយផលល្អសម្រាប់ការតភ្ជាប់ប្រព័ន្ធដឹកជញ្ជូនផ្លូវទឹក ផ្លូវគោក និងផ្លូវដែកមកកាន់រាជធានីភ្នំពេញ និងបណ្តាខេត្តនានា តាមរយៈផ្លូវជាតិលេខ៣ ផ្លូវជាតិលេខ៤ ផ្លូវជាតិ លេខ៤១ ផ្លូវជាតិលេខ៤៨ ផ្លូវល្បឿនលឿនភ្នំពេញ-ក្រុងព្រះសីហនុ និងតភ្ជាប់ផ្លូវដែកភាគខាងត្បូងទៅភាគខាងជើងរបស់កម្ពុជា។

ឯកឧត្តមបន្តថា ទីតាំងរបស់កំពង់ផែនេះក៏មានការសាងសង់ ទីលានកុងតឺន័រ តំបន់សេដ្ឋកិច្ចពិសេស មជ្ឈមណ្ឌលភស្តុភារកម្ម ឃ្លាំងស្តុកទំនិញគ្រប់ប្រភេទ ឃ្លាំងភណ្ឌាគារគយ រោងចក្រផលិត និងចែកចាយ និងចំណតនាវាប្រភេទជាសាឡង់ ដែលភ្ជាប់ការដឹកជញ្ជូនជាមួយកំពង់ផែស្វយ័តភ្នំពេញ តាមរយៈគម្រោងព្រែកជីកហ៊្វូណនតេជោ ដែលរាជរដ្ឋាភិបាលគ្រោងនឹងបើកការដ្ឋានសាងសង់នាពេលខាងមុខនេះ។

សូមជម្រាប​ថា បើតាមការប្រកាស​របស់​សម្តេចធិបតី ហ៊ុន ម៉ាណែត ក្នុងពិធីសម្ពោធ​កំពង់ផែពហុបំណងកំពតនេះ ការបើកការដ្ឋាន​សាងសង់គម្រោង​ព្រែកជីកហ្វូណនតេជោ នឹងធ្វើឡើងនៅថ្ងៃទី៥ ខែសីហា ឆ្នាំ​២០២៤​ខាងមុខ។

ជាមួយគ្នានេះ កំពង់ផែពហុបំណងកំពត រំពឹងថានឹងក្លាយជាផ្នែកមួយក្នុងការចូលរួមជំរុញឱ្យគម្រោងផ្លូវនាវាចរណ៍ “ព្រែកជីកហ៊្វូណនតេជោ” ឱ្យកាន់តែមានសក្តានុពល និងអាចលើកកម្ពស់មុខមាត់វិស័យដឹកជញ្ជូនតាមផ្លូវសមុទ្ររបស់កម្ពុជាឱ្យកាន់តែមានការប្រកួតប្រជែងខ្ពស់។

គម្រោងព្រែកជីកហ្វូណនតេជោ ត្រូវបានប៉ាន់ស្មានថា នឹងត្រូវចំណាយទុនវិនិយោគប្រមាណ ១៧០០លានដុល្លារអាមេរិក និងប្រើប្រាស់រយៈពេលសាងសង់ប្រមាណ ៤ឆ្នាំ។ គម្រោងនេះ នឹងជួយកាត់បន្ថយរយៈពេល និងចម្ងាយនៃការដឹកជញ្ជូននាពេលបច្ចុប្បន្ន ដែលត្រូវឆ្លងកាត់តាមកំពង់ផែកៃមែបរបស់វៀតណាមប្រមាណ ៦៩គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែក្រុងព្រះសីហនុ និងប្រមាណ ១៣៥គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែខេត្តកំពត៕

អត្ថបទ៖ សំភី