២០២៥ ជាឆ្នាំបើកឱ្យឆ្លងស្ពានខ្ពស់ជាងគេ ហើយក៏អាចជាឆ្នាំបើកការដ្ឋានស្ពានទៅអរិយក្សត្រដែរ
- 2024-06-13 03:08:25
- ចំនួនមតិ 0 | ចំនួនចែករំលែក 0
២០២៥ ជាឆ្នាំបើកឱ្យឆ្លងស្ពានខ្ពស់ជាងគេ ហើយក៏អាចជាឆ្នាំបើកការដ្ឋានស្ពានទៅអរិយក្សត្រដែរ
ចន្លោះមិនឃើញ
នៅឆ្នាំ២០២៥ខាងមុខនេះ ហេដ្ឋារចនាសម្ព័ន្ធជាច្រើននឹងត្រូវបានសាងសង់រួចរាល់ ជាពិសេសស្ពានខ្ពស់ជាងគេ ដែលជាផ្នែកមួយនៃផ្លូវជាតិលេខ១០ ដែលគ្រោងនឹងដាក់ឱ្យប្រើប្រាស់សាកល្បងនៅចុងខែមីនា ឆ្នាំ២០២៥។
ស្ពាននេះមានប្រវែង ៥៣០ម៉ែត្រ ទទឹង ១០ម៉ែត្រ កម្ពស់ ៩០ម៉ែត្រ ឆ្លងកាត់ស្ទឹងឬស្សីជ្រុំ ស្ថិតក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ គ្រោងបញ្ចប់ការសាងសង់ទាំងស្រុងនៅពាក់កណ្តាលឆ្នាំ២០២៥។
ដោយឡែកចំពោះស្ពានមួយទៀតដែលប្រជាពលរដ្ឋកំពុងទន្ទឹងរង់ចាំយ៉ាងអន្ទះសារនោះ គឺស្ពានផ្សារចាស់-អរិយក្សត្រ គ្រោងនឹងបើកការដ្ឋានសាងសង់នៅឆ្នាំក្រោយនេះផងដែរ។ នេះបើតាមការថ្លែងរបស់ឯកឧត្តម ផាក ជុងវុក (Park Jung-wook) ឯកអគ្គរដ្ឋទូតសាធារណរដ្ឋកូរ៉េប្រចាំព្រះរាជាណាចក្រកម្ពុជា ក្នុងជំនួបពិភាក្សាជាមួយសម្តេចតេជោ ហ៊ុន សែន ប្រធានព្រឹទ្ធសភា កាលពីសប្តាហ៍មុន។
គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ (ផ្សារចាស់-ជ្រោយចង្វារ; ជ្រោយចង្វារ-អរិយក្សត្រ) នឹងចំណាយទឹកប្រាក់ចំនួន ២៤៥ ៩០៩ ០០០ ដុល្លារអាមេរិក។ ខ្សែទី១នៃស្ពាន៖ ចាប់ពីមុខផ្សាររាត្រីឆ្លងកាត់ទន្លេសាប ចូលទៅកាន់ជ្រោយចង្វារ និងខ្សែទី២នៃស្ពាន៖ ពីជ្រោយចង្វារឆ្លងកាត់ទន្លេមេគង្គ ចូលទៅអរិយក្សត្រ។
សម្តេចតេជោសង្ឃឹមថា សម្តេចនឹងបានឃើញដោយផ្ទាល់ភ្នែកក្នុងពេលឆាប់ៗខាងមុខនូវ ស្ពានមិត្តភាពកម្ពុជា-កូរ៉េ ឆ្លងកាត់ទន្លេពីរនេះ ដែលសម្តេចជាអ្នកស្នើឡើងដោយផ្ទាល់។
ទាក់ទងនឹងគម្រោងស្ពាន មិត្តភាពកម្ពុជា-កូរ៉េនេះ ឯកឧត្តមឯកអគ្គរដ្ឋទូត បានជម្រាបជូន សម្ដេចតេជោថា ឯកឧត្តមតែងតែតាមដានដំណើរការនេះយ៉ាងយកចិត្តទុកដាក់ និងបានលើកឡើងថាការរៀបចំសាងសង់ស្ពាននេះមានដំណើរការទៅរលូន ហើយនឹងចុះបឋមសិលាចាប់ផ្ដើមសាងសង់នៅឆ្នាំ២០២៥ខាងមុខនេះ៕