ReanAi បង្កើតឡើងដោយកូនខ្មែរ​ដែល​មាន​មុខងារសំខាន់ៗជាច្រើន​ទាក់ទងនឹង​ចំណេះដឹងទូទៅនានា ហ្គេម និងការកម្សាន្តផ្សេងៗ នឹង​ត្រូវនាំចូលទីផ្សារតៃវ៉ាន់​នាពេលខាងមុខនេះហើយ តាមរយៈ​ភាព​ជាដៃគូយុទ្ធសាស្រ្ត​ជាមួយ Jeremy តៃវ៉ាន់។

ស្ថាបនិក ReanAi លោកបណ្ឌិត ឡាយ គីរី បានលើកឡើងថា កម្មវិធី ReanAi មានគោលបំណងលើកកម្ពស់ផលិតភាព ការរៀនសូត្រ និងគុណភាពជីវិតទាំងមូល​ជាមួយ​បច្ចេកវិទ្យា​ AI កម្រិតខ្ពស់​ ព្រមទាំង​ការ​ពង្រីក​ការប្រើប្រាស់​ផលិតផលខ្មែរ និងមានពហុភាសារបស់ ReanAi សម្រាប់អ្នកប្រើប្រាស់នៅតៃវ៉ាន់។

តាមរយៈការចាប់ដៃគូជាមួយ Jeremy តៃវ៉ាន់ ការច្នៃប្រឌិតរបស់កម្ពុជា ត្រូវបានណែនាំទៅកាន់ទស្សនិកជន កាន់តែទូលំទូលាយ ដោយបង្ហាញពីសមត្ថភាពរបស់ប្រទេស ក្នុងការផលិតដំណោះស្រាយបច្ចេកវិទ្យាលំដាប់ពិភពលោក។

សូមជម្រាប​ថា នៅក្នុងកម្មវិធី ReanAi មានមុខងារសំខាន់ៗដូចជា៖ សួរមកខ្ញុំ (Ai-Ask), រចនារូបភាព (Ai-Art), វិភាគរូបភាព (Ai-Vision), អាជីវកម្ម (Ai-Business), វេជ្ជបណ្ឌិត (Ai-Doctor) និង​សន្ទនា/ជជែក (Ai-Talk) ជាដើម។

យ៉ាងណាក៏ដោយ បើទោះបីជាកម្មវិធី ReanAi អាចជួយបានច្រើន ប៉ុន្តែ​ការប្រើប្រាស់ដែល​ប្រកបដោយសីលធម៌ និងការទទួលខុសត្រូវរបស់ ReanAi គឺ​មានសារៈសំខាន់​ណាស់​ក្នុងការធានាថា វាមិនផ្សព្វផ្សាយ​ព័ត៌មានមិនពិត ឬត្រូវបានប្រើប្រាស់សម្រាប់គោលបំណងបង្កគ្រោះថ្នាក់ឡើយ។

ជាមួយគ្នានេះ អ្នកប្រើប្រាស់​កម្មវិធី ReanAi គួរតែ​ទទួលស្គាល់នូវដែនកំណត់​របស់កម្មវិធី ពោលគឺវាប្រហែលជាមិនតែងតែផ្តល់ព័ត៌មានត្រឹមត្រូវ ឬទាន់សម័យនោះទេ ហើយ​វាក៏មិន​ជំនួសដំបូន្មាននូវអ្នក​ដែលមានជំនាញវិជ្ជាជីវៈ​ក្នុងផ្នែកដូចជា ការថែទាំសុខភាព បញ្ហាផ្លូវច្បាប់ ឬបញ្ហាបច្ចេកទេសស្មុគស្មាញនោះដែរ។

បើតាមលោកបណ្ឌិត ឡាយ គីរី ឱ្យដឹងថា តួនាទីរបស់ Jeremy តៃវ៉ាន់ ក្នុងការគ្រប់គ្រងទីផ្សារផ្តាច់មុខ នឹង​ធានាថា​បច្ចេកវិទ្យាទំនើបទាំងនេះ​ត្រូវបានណែនាំ និងផ្សព្វផ្សាយប្រកបដោយប្រសិទ្ធភាពនៅក្នុងទីផ្សារតៃវ៉ាន់។ កិច្ចសហការនេះ​គឺជាជំហាន​ដ៏សំខាន់មួយឆ្ពោះ​ទៅរកការរីកចម្រើន និងការអភិវឌ្ឍន៍នៃបច្ចេកវិទ្យា AI រវាងប្រទេសកម្ពុជា និងតៃវ៉ាន់។ សំខាន់ជាងនេះទៅទៀត វាគូសបញ្ជាក់អំពីសក្តានុពលរបស់កម្ពុជាក្នុងការក្លាយជាអ្នកលេងសាកលក្នុងវិស័យបច្ចេកវិទ្យា និងនវានុវត្តន៍ ខណៈពេលដែលបង្ហាញពីសមត្ថភាពមិនគួរឱ្យជឿរបស់យុវជនកម្ពុជា៕