ឯកឧត្ដម ហង់ ជួនណារ៉ុន៖ ថវិកាលើកទឹកចិត្តរបស់រាជរដ្ឋាភិបាលជាកត្តាជំរុញលើការហ្វឹកហាត់កាន់តែខ្លាំង

2024-06-26 05:15:03
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីរសៀលថ្ងៃទី២៥ ខែមិថុនា ឆ្នាំ២០២៤ ម្សិលមិញនេះឯកឧត្ដម ហង់ ជួនណារ៉ុន បានអញ្ជើញចូលរួមប្រគល់ថវិកាលើកទឹកចិត្តជាង ៤០០លានរៀលដល់ ៣ប្រភេទកីឡាដែលឈ្នះមេដាយអន្តរជាតិនាពេលកន្លងទៅ។

ទិដ្ឋភាពម្សិលមិញ

រដ្ឋមន្ត្រីក្រសួងអប់រំ យុវជន និងកីឡា ខាងលើថ្លែងឲ្យដឹងថា ក្នុងនាមតំណាងរាជរដ្ឋាភិបាលសូមថ្លែងអំណរគុណដល់គ្រូបង្វឹក កីឡាករ កីឡាការិនី ដែលខំប្រឹងប្រែងហ្វឹកហាត់ពិសេសបានចូលរួមប្រកួតជាលក្ខណៈអន្តរជាតិនាពេលកន្លងទៅ។ បើទោះជាមិនទទួលបានមេដាយមាសពិសេសក្នុងព្រឹត្តិការណ៍កីឡាអាស៊ី នៅប្រទេសចិនកន្លងទៅនេះមែន ប៉ុន្តែក៏ឈ្នះបានមេដាយសំរឹទ្ធផងដែរ ព្រោះការប្រកួតមួយនេះជាការប្រកួតប្រមូលផ្ដុំដោយជើងខ្លាំងៗជាច្រើន។ ឯកឧត្ដមសង្ឃឹមថាគ្រប់សហព័ន្ធ កីឡាករ ទាំងអស់នៅតែបន្តខំប្រឹងប្រែងហ្វឹកហាត់ និងចូលរួមនាឱកាសក្រោយៗទៀត។

ទិដ្ឋភាពម្សិលមិញ

ឯកឧត្ដម ហង់ ជួនណារ៉ុន បន្ថែមទៀតថា ថវិកាលើកទឹកចិត្តរបស់រាជរដ្ឋាភិបាលគឺបានជំរុញលើកទឹកចិត្តក្រុមកីឡាករ កីឡាការិនីទាំងអស់រឹតតែមានការខំប្រឹង រឹតតែមានសន្ទុះនៃការហ្វឹកហាត់កាន់តែល្អប្រសើរ។ ជាមួយគ្នានេះដែរឯកឧត្ដមសំណូមពរដល់សហព័ន្ធកីឡាជាតិទាំងអស់រៀបចំការប្រកួតនៅក្នុងស្រុកឲ្យកាន់តែច្រើន ដើម្បីបានពង្រឹងសមត្ថភាពផង និងបានស្វែងរកនូវកីឡាករ កីឡាការិនី ដែលមានសក្ដានុពល អំណោយផលទាំងកាយសម្បទា ភាពឈ្លាសវៃជាដើម។

ទិដ្ឋភាពម្សិលមិញ

បញ្ជាក់ដែរថា ពិធីប្រគល់ថវិកាលើកទឹកចិត្តរបស់រាជរដ្ឋាភិបាលនេះធ្វើឡើងនៅក្នុងសាលធំនៃមជ្ឈមណ្ឌលហ្វឹកហ្វឺនកីឡាពហុកីឡដ្ឋានជាតិ។ ៣ប្រភេទកីឡាដែលទទួលបានប្រាក់រង្វាន់នេះរួមមាន ការ៉ាតេ ប៉េតង់ និងល្បុក្កតោ។ ថវិកាប្រគល់សរុបមានចំនួន ៤២៣,៧០០,០០០ រៀល៕