Morata សម្រេចចិត្តរឿងអនាគតជាមួយ AT Madrid

2024-07-02 12:52:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Alvaro Morata បានសម្រេចចិត្តក្នុងការចង់បន្តរួមរស់ជាមួយក្លឹប Atletico Madrid។

យោងតាមប្រភព Fabrizio Romano ភាគី Morata បានជូនដំណឹងជាផ្លូវការដល់ក្លឹប Atletico Madrid ថារូបគេចង់បន្តលេងឲ្យក្លឹបអេស្ប៉ាញ។ ការណ៍នេះបានកើតឡើងក្រោយ ខ្សែប្រយុទ្ធអេស្ប៉ាញវ័យ ៣១ ឆ្នាំរូបនេះ ទទួលបានសំណើពីក្លឹបអារ៉ាប៊ីសាអ៊ូឌីតមួយចំនួន។ បើតាមពាក្យចចាមអារ៉ាមមួយចំនួន មានក្លឹបអារ៉ាប៊ីសាអ៊ូឌីតមួយហ៊ានឲ្យប្រាក់ឈ្នួល Morata ប្រមាណជិត ៤០ លានដុល្លារសហរដ្ឋអាមេរិកឯណោះ ហើយហ៊ានទិញផ្ដាច់កុងត្រារបស់កីឡាករនៅ AT Madrid ថែមទៀតផងក្នុងអំឡុងទឹកប្រាក់ប្រមាណ ២០ លានដុល្លារសហរដ្ឋអាមេរិក។

ទោះជាយ៉ាងណា Morata បានបដិសេធសំណើក្លឹបអារ៉ាប៊ីសាអ៊ូឌីត ដោយកីឡាករចង់បន្តលេងឲ្យ AT Madrid។ កុងត្រាបច្ចុប្បន្នរបស់កីឡាករនៅជាមួយក្លឹប មានសុពលភាពដល់ពាក់កណ្ដាលឆ្នាំ ២០២៦។

Morata មានទំនាក់ទំនងជាមួយក្លឹប AT Madrid តាំងពីឆ្នាំ ២០១៩ មក។ មុនមកលេងឲ្យក្លឹប កីឡាករធ្លាប់លេងឲ្យក្លឹប Chelsea, Juventus និង Real Madrid។ ថ្វីបើមានទម្រង់មិនសូវល្អពេលលេងនៅអង់គ្លេស និងអ៊ីតាលី កីឡាករបានបង្ហាញទម្រង់លេងគួរសមនៅពេលលេងនៅអេស្ប៉ាញ។ បើគិត ២ រដូវកាលចុងក្រោយ នៅក្លឹប Atletico Madrid កីឡាករលេងសរុប ៩៣ លើក និងស៊ុតចូល ៣៦ គ្រាប់។