Man Utd ជិតទិញបានខ្សែការពារចំណានម្នាក់ពី Bayern

2024-07-03 11:32:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Manchester United ខិតកាន់តែជិតក្នុងការចរចាជាមួយ Bayern Munich រឿងផ្ទេរចូលខ្សែការពារសញ្ជាតិហុល្លង់វ័យ ២៤ ឆ្នាំ Matthijis de Ligt។

យោងតាមការចុះផ្សាយរបស់សារព័ត៌មាន Sky Sport បានឲ្យដឹងថា ភាគីបិសាចក្រហម និង Bayern កំពុងចរចាគ្នាទាក់ទងនឹងការផ្ទេរចូល De Ligt ហើយអារម្មណ៍នៃការចរចាមានភាពវិជ្ជមានរវាងគ្នាទៅវិញទៅមក។ បើតាមប្រភពដដែល Bayern ចង់បានតម្លៃផ្ទេរប្រមាណ ៥០ លានដុល្លារសហរដ្ឋអាមេរិក។

សេចក្ដីរាយការណ៍ចុងក្រោយរបស់ Sky Sport បានរំលេចថា De Ligt ខ្លួនឯង ក៏ចង់ចូលរួមជាមួយបិសាចក្រហមផងដែរ។ នេះធ្វើឲ្យការចរចារវាងក្លឹបទាំងពីរកាន់តែមានភាពងាយស្រួល ហើយអាចនឹងព្រមព្រៀងគ្នានាពេលឆាប់ៗ បើមិនមានអ្វីប្រែប្រួលនោះទេ។ យោងតាមពាក្យចចាមអារ៉ាមមួយចំនួន De Ligt អាចនឹងចុះកុងត្រារយៈពេល ៥ ឆ្នាំជាមួយបិសាចក្រហម។

ជារឿយៗ អ្នកចាត់ការក្លឹបបិសាចក្រហម លោក Erik Ten Hag តែងលើកឡើងថា តំបន់ការពាររបស់ក្រុមលោក នៅមានកម្រិត ហើយត្រូវការកីឡាករល្អដើម្បីមកបំពេញបន្ថែម។ De Ligt គឺជាកីឡាករមួយរូប ស្ថិតក្នុងបញ្ជីផ្ទេរចូលរបស់លោក Ten Hag ជាយូរមកហើយ ព្រោះលោកធ្លាប់ដឹកនាំ និងធ្វើការជាមួយកីឡាកររូបនេះ កាលអំឡុងពេលលោកនៅជាអ្នកចាត់ការក្លឹប Ajax។

De Ligt គឺជាខ្សែការពារ ដែលត្រូវបានមជ្ឈដ្ឋានបាល់ទាត់ជាច្រើនសរសើរថា ជាកីឡាករដ៏ចំណានវ័យក្មេងមួយរូប។ កីឡាករចាប់ផ្ដើមឡើងទម្រង់លេងនៅពេលឲ្យ Ajax ពីឆ្នាំ ២០១៦ ដល់ ២០១៩។ ក្រោយមក De Ligt បានមកចូលរួមជាមួយក្លឹប Juventus រយៈពេល ៣ រដូវកាល រួចក៏ផ្លាស់មក Bayern Munich កាលពីឆ្នាំ ២០២២។ ពេលលេងនៅអាល្លឺម៉ង់ កីឡាករលេងសរុប ៧៣ ប្រកួត និងស៊ុតចូល ៣ គ្រាប់ឲ្យ Bayern ក្នុងរយៈពេលជាង ២ រដូវកាលកន្លងមកនេះ៕