ក្លឹបថ្មីរបស់ វណ្ណថង បើគិតទាំងដី និងការសាងសង់នេះសរុបមិនតិចជាង ៣ម៉ឺនដុល្លារនោះទេ

2024-07-19 07:38:03
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជួរមុខរបស់កម្ពុជា ឈិត សេរិវណ្ណថង ទើបសាងសង់ក្លឹបប្រដាល់ថ្មីសន្លាងមួយរួចរាល់នៅឯខេត្តបាត់ដំបង បើតាមការបង្ហើបពីលោកឪពុកសរុបទាំងដី និងការសាងសង់មិនតិចជាង ៣ម៉ឺនដុល្លារនោះឡើយ។

រូបភាពហ្វេសបុក វណ្ណថង

លោក ឈុត សេរី ដែលជាឪពុករបស់ វណ្ណថង បានឲ្យដឹងថា ការសាងសង់ក្លឹបនេះដូចជាចាក់សាប សង់ដំបូលដែកផ្សេងៗនេះខ្ទង់ជាង ១ម៉ឺនដុល្លារ ប៉ុន្តែបើបូកទាំងដីទិញខ្ទង់ ១៥,០០០ដុល្លារ និងធ្វើរបងអស់ ៥,០០០ដុល្លារទៀតសរុបទៅជាង ៣ម៉ឺនឯណោះ។

ឪពុករបស់ វណ្ណថង ខាងលើបន្ថែមទៀតថា ការសាងសង់នេះគឺជាគំនិតផ្ទាល់របស់កូនចង់មានកន្លែងហ្វឹកហាត់ស្អាតល្អសមរម្យដូចគេ និងមានសម្ភារគ្រប់គ្រាន់ ដូច្នេះទើបរូបគេចេះតែសន្សំថវិកាពីការប្រកួតរហូតសម្រេចធ្វើក្លឹបថ្មីនេះចេញជារូបរាងបែបនេះ។

រូបភាពហ្វេសបុក វណ្ណថង

អតីតអ្នកប្រដាល់ជើងចាស់លើកឡើងទៀតថា តាំងតែពីតូចមកម្ល៉េះគឺ វណ្ណថង មានគំនិតទុកដាក់ និងសន្សំសំចៃជានិច្ចរហូតអាចទិញសម្ភាររស់នៅប្រចាំថ្ងៃដូចជា ម៉ូតូ ឡាន បានសមរម្យដូចគេឯង។ មួយវិញទៀតរូបគេតែងតែមានគំនិតថ្មីៗក៏ដូចជាបន្ថែមនេះបន្ថែមនោះជានិច្ចនៅពេលដែលឃើញបណ្ដាក្លឹបប្រដាល់ទាំងក្នុងស្រុក ក្រៅស្រុក រៀបចំបានស្អាត។

យ៉ាងណាលោក ឈុត សេរី ក៏មិនភ្លេចថ្លែងអំណរគុណដល់បណ្ដាស្ថានីយ ម្ចាស់ឧបត្ថម្ភនានាដែលបានឧបត្ថម្ភដល់ការសាងសង់ និងជួយឲ្យកូនប្រុសលោកឡើងប្រកួតតាំងតែពីដំបូងរហូតមានសមត្ថភាព កេរ្តិ៍ឈ្មោះមកដល់ពេលនេះ។

រូបភាពហ្វេសបុក វណ្ណថង

បញ្ជាក់ដែរថា ក្លឹបប្រដាល់របស់ វណ្ណថង នេះមានឈ្មោះថា «ក្លឹបប្រដាល់រាហ៊ូកីឡានៃសមាគមកងយោធពលខេមរភូមិន្ទ» នៅស្រុកឯកភ្នំ ខេត្តបាត់ដំបង។ ក្លឹបនេះបង្កើតជាយូរមកហើយដែរដោយគ្រាន់តែពីមុនហ្វឹកហាត់នៅហ្នឹងផ្ទះលោក ឈុត សេរី ផ្ទាល់តែម្ដងទើបតែពេលនេះផ្លាស់ប្ដូរមកទីតាំងថ្មីក្បែរនោះមានដំបូលត្រឹមត្រូវ សម្ភារហ្វឹកហាត់ និងការតុបតែងស្តង់ដារខុសពីមុន៕

អត្ថបទ៖ នួន ស៊ីណា