De Bruyne នឹងមិនចេញពី Man City ទៅលេងនៅអារ៉ាបទេ

2024-07-23 11:30:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើក្លឹប Manchester City កីឡាករ Kevin De Bruyne នឹងមិនចាកចេញពីក្លឹបអង់គ្លេសនេះ ទៅលេងនៅប្រទេសអារ៉ាប៊ីសាអ៊ូឌីតនោះទេ។ នេះបើតាមការបញ្ជាក់របស់លោក Pep Guardiola អ្នកចាត់ការក្លឹប Manchester City។

ការលើកឡើងនេះធ្វើឡើងបន្ទាប់ពីមានពាក្យចចាមអារ៉ាមមួយចំនួនលើកឡើងថា កីឡាករបែលហ្សិកនេះអាចនឹងទៅលេងនៅក្លឹបនៅឯតំបន់មជ្ឈិមបូព៌ាដូចតារាៗបាល់ទាត់មានវ័យរាងជ្រេមួយចំនួន។

លោក Pep បាននិយាយថា៖ «Kevin គេមិនទៅណាទេ»។

«ប្រសិនបើមាននរណាគេចេញ នោះយើងនឹងនិយាយអំពីរឿងនេះ»។ នេះបើតាមការបន្តរបស់លោក។

Kevin De Bruyne មានវ័យ ៣៣ឆ្នាំហើយ។ លោកបានចូលលេងនៅក្លឹបទីក្រុងមេនឆេស្ទើររបស់អង់គ្លេសមួយនេះតាំងពីឆ្នាំ២០១៥មក។ តាំងពីពេលនោះ កីឡាកររូបនេះជាកីឡាករបង្គោលរបស់ក្លឹប ដោយលេងបាន ២៥៧ដង និងស៊ុតបាន ៦៨គ្រាប់។

បន្ថែមពីនេះដែរ លោក Guardiola បានបញ្ជាក់ថា ខាង Manchester City អាចនឹងរក្សាកីឡាករចាស់ៗច្រើន ដោយក្រុមកីឡាករចាស់អាចនឹងនៅសល់ ៨៥ ទៅ ៩០ភាគរយ ហើយលោកថានឹងនាំចូលកីឡាករថ្មីតិចតួចបំផុត។

ក្លឹប Manchester City នឹងលេងប្រកួតផ្លូវការលើកទី១ប្រចាំរដូវកាលប៉ះនឹងក្លឹបភូមិផងរបងជាមួយ Manchester United នៅថ្ងៃទី១៨ ខែសីហា ខាងមុខ សម្រាប់ពាន Community Shield៕

ប្រភព៖ Goal អត្ថបទ៖ សេរី មង្គល