Pep ដូរជំហររឿង KDB និងនិយាយពីអនាគត Alvarez

2024-07-30 12:33:59
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លឹប Manchester City លោក Pep Guardiola បាននិយាយប្រាប់អ្នកសារព័ត៌មានអំពីអនាគតរបស់ខ្សែបម្រើ Kevin De Bruyne និង ខ្សែប្រយុទ្ធ Julian Alvarez។

ទាក់ទងនឹង KDB លោក Pep បានដូវជំហរ។ លោកថា បើតាមអ្វីដែលលោកដឹងគិតមកទល់ពេលនេះ គឺថា De Bruyne នឹងបន្តលេងឲ្យ Manchester City។ តែលោកបន្ថែមទៀតថា យ៉ាងនេះក្ដី បើ De Bruyne សម្រេចចិត្តចង់ចេញពីក្លឹប គឺក្លឹបមានតែសម្របតាម។ កាលពីសប្ដាហ៍មុន លោកបញ្ជាក់ច្បាស់ KDB នឹងបន្តលេងនៅ Manchester City។

កុងត្រារបស់ KDB នៅក្លឹប Man City មានសុពលភាពរហូតដល់ពាក់កណ្ដាលឆ្នាំ ២០២៥ ពោលគឺ ១ ឆ្នាំទៀត។ កាលពីពេលថ្មីៗនេះ មានពាក្យចចាមអារ៉ាមមួយចំនួនបានលើកឡើងថា ក្លឹបអារ៉ាប៊ីសាអ៊ូឌីត Al Ittihad កំពុងចរចាយកខ្សែបម្រើ Kevin De Bruyne។

ពាក្យចចាមអារ៉ាមនេះ កើតឡើងក្រោយ De Bruyne បានប្រាប់ទៅអ្នកសារព័ត៌មានកាលពីខែមុនថា រូបគេដល់វ័យមួយដែលត្រូវគិតគូរពីរឿងចំណូលជាធំ ព្រោះជិតដល់អាយុចូលនិវត្តន៍ពីវិស័យបាល់ទាត់អាជីពហើយ។ ដូច្នេះ រូបគេបើកចំហរគ្រប់ជម្រើសទាំងអស់ ទាក់ទងនឹងអនាគតរបស់រូបគេ ក្នុងនោះរួមមានទាំងការផ្ទេរចេញពីក្លឹប Manchester City ផងដែរ។

ក្លឹប Al Ittihad គឺជាក្លឹបសម្បូរធនធានណាស់ ហើយហ៊ានឲ្យប្រាក់ឈ្នួលយ៉ាងច្រើនសម្រាប់កីឡាករល្បីៗ។ ការណ៍នេះធ្វើឲ្យក្លឹបមានលទ្ធផលទាក់ទាញកីឡាករដូចជា Karim Benzema ខ្សែបម្រើ N'Golo Kante និង Fabinho ជាដើម។

ដោយឡែក ចំពោះខ្សែប្រយុទ្ធវ័យ ២៤ ឆ្នាំ Julian Alvarez វិញ លោក Pep បញ្ជាក់ថា អនាគតរបស់រូបគេ គឺរូបគេផ្ទាល់អ្នកសម្រេច។ កាលពីសប្ដាហ៍នេះ Alvarez បាននិយាយប្រាប់អ្នកសារព័ត៌មានថា រូបគេចង់ចូលលេងប្រកួតធំៗឲ្យបានច្រើនជាងមុន ដូច្នេះរូបគេកំពុងតែគិតថាគួរបន្តដំណើរជាមួយ Man City ឬយ៉ាងណា។ ឆ្លើយតបនឹងពាក្យសម្ដីនេះ លោក Pep ថា ក្លឹបរង់ចាំការសម្រេចចិត្តរបស់ Alvarez ។

ក្រោយ Alvarez និយាយដូចនេះភ្លាម មានលេចសេចក្ដីរាយការណ៍ក្លឹបអេស្ប៉ាញ Atletico Madrid កំពុងពិនិត្យលទ្ធភាពផ្ទេរយកខ្សែប្រយុទ្ធពី Man City។

ខ្សែបម្រើ De Bruyne គឺជាកីឡាករដ៏ឆ្នើមរបស់ក្លឹប Manchester City តាំងពីចូលរួមជាមួយក្លឹបកាលពីឆ្នាំ ២០១៥ មក។ ខ្សែបម្រើបែលហ្សិកលេងសរុបឲ្យក្លឹប ៣៨២ លើក និងស៊ុតចូល ១០២ គ្រាប់ ហើយជួយក្លឹបឲ្យឈ្នះពានសរុបចំនួន ១៥ ក្នុងនោះពានធំៗគឺឈ្នះ Premier League ៦ ដង និង Champions League ម្ដង។

ឯ Alvarez វិញ ក៏ជាកីឡាករដ៏សំខាន់មួយរបស់ក្លឹបផងដែរ។ គិតចាប់ពីចូលរួមជាមួយក្លឹបកាលពី ២០២២ មក កីឡាករលេងសរុប ១០៣ ប្រកួត និងស៊ុតចូល ៣៦ គ្រាប់៕

ប្រភព៖ Goal អត្ថបទ៖ សេរី មង្គល