ក្រុមបាល់ទះជម្រើសជាតិបារាំង បានក្លាយជាក្រុមទី២ឡើងទៅកាន់វគ្គផ្ដាច់ព្រ័ត្រផ្នែកវិញ្ញាសាបាល់ទះបុរសក្នុងសាល នៃព្រឹត្តិការណ៍កីឡាអូឡាំពិកទីក្រុងប៉ារីសប្រទេសបារាំងឆ្នាំ២០២៤។

នៅសិតទី១ ក្រុមបាល់ទះជម្រើសជាតិបារាំង បានយកឈ្នះក្រុមជម្រើសជាតិអ៊ីតាលីក្នុងលទ្ធផលពិន្ទុ ២៥-២០ សិតទី២ ២៥-២១ និងសិតទី៣ ២៥-២១។

ផ្អែកតាមពិន្ទុក្រុមការពារតំណែងជើងឯកបារាំង ពិតជាធ្វើបានល្អខ្លាំងណាស់ ស្របពេលដែលជើងខ្លាំងអ៊ីតាលីបង្ហាញគុណផលល្អមិនធម្មតាក្នុងព្រឹត្តិការណ៍ដ៏ធំមួយនេះ។

ដំណាក់កាលបន្ទាប់ ក្រុមការពារតំណែងជើងឯកបារាំងនឹងឡើងទៅជួបជើងខ្លាំងចំណាត់ថ្នាក់លេខ១លើលោកប៉ូឡូញ នៅវគ្គផ្ដាច់ព្រ័ត្រនាថ្ងៃទី១០ ខែសីហា ឆ្នាំ២០២៤ខាងមុខនេះ។ រងចាំមើលថាតើ បាំរាំងឬប៉ូឡូញជាអ្នកសម្រក់ទឹកភ្នែកក្នុងវិញ្ញាសាមួយនេះ?

គួរបញ្ជាក់ថា កាលពីព្រឹត្តិការណ៍កីឡាអូឡាំពិកនាទីក្រុង Tokyo 2020 ក្នុងប្រទេសជប៉ុន បារាំង ជាម្ចាស់មេដាយមាស រុស្ស៊ីជាម្ចាស់មេដាយប្រាក់ អាហ្សង់ទីន ជាម្ចាស់មេដាយសំរឹទ្ធិ និងប្រេស៊ីល បានចំណាត់ថ្នាក់លេខ៤ ប៉ូឡូញ លេខ៥និង​អ៊ីតាលីឈរចំណាត់​ថ្នាក់​លេខ​៦៕

អត្ថបទ៖ Um Sopheak