ក្នុងឱកាសម្ពោធចាក់បញ្ចាំងជាផ្លូវការនូវខ្សែភាពយន្ដខ្នាតធំ រឿង”អ្នកម្ដាយ ZOMBIE” សាស្ដ្រាហ្វៀមដែលជាផលិតកម្មខ្មែរមួយផលិតរឿងបានច្រើនជាងគេក្នុងមួយឆ្នាំៗ បានប្រកាសថា ក្នុងខែសីហា ឆ្នាំ២០២៤ នេះ ស្នាដៃខ្សែភាពយន្ដចំនួន ៣រឿង នឹងចាក់បញ្ចាំងដំណាលពេលគ្នានៅលើទីផ្សារអន្ដរជាតិ និងនៅស្រុកខ្មែរ។

ចាងហ្វាងផលិតកម្ម សាស្ដ្រាហ្វៀម អ្នកស្រី ប៊ុន ចាន់និមល មានប្រសាសន៍ថា ដើម្បីបង្ហាញឲ្យកាន់តែច្បាស់នូវការខិតខំប្រឹងប្រែងលើកកម្ពស់សិល្បៈ ភាពយន្ដខ្មែរទៅកាន់ឆាកអន្ដរជាតិ ផលិតកម្មបានកំណត់ថ្ងៃទី១៥ ខែសីហា ឆ្នាំ២០២៤ ជាថ្ងៃចាក់បញ្ចាំងរឿង “អ្នកម្ដាយ ZOMBIE”នៅកម្ពុជា ដំណាលពេលគ្នានឹងការចាក់បញ្ចាំងនៅប្រទេសហ្វីលីពីន។

ចំណែកខ្សែភាពយន្ដ ២ទៀត គឺរឿង “ម៉ែក្រឡាភ្លើង” នឹងចាក់បញ្ចាំងនៅប្រទេសមីយ៉ាន់ម៉ា ខណៈដែលរឿង “ព្រាយតោងធ្នឹង” នឹងចាក់បញ្ចាំងនៅប្រទេសរុស្ស៊ី។ ការជំរុញទឹកចិត្ដផលិតករ រហូតផលិតកម្មបានបញ្ចេញស្នាដៃរឿងជាបន្ដបន្ទាប់ទៅកាន់ទីផ្សារអន្ដរជាតិនេះ គឺកើតចេញពីការគំាទ្ររបស់ទស្សនិកជននៅក្នុងស្រុកមួយចំនួនធំ។

អ្នកស្រី ប៊ុន ចាន់និមល៖ “ នេះជាជោគជ័យជូនបងប្អូនប្រជាជាតិកម្ពុជា ដែលមានមោទនភាពនាំភាពយន្ដខ្មែរទៅកាន់ពិភពលោក! យើងនឹងផលិតភាពយន្ដកាន់តែល្អៗទៀត កើតចេញពីការគាំទ្រដែលជាការគាំទ្រដោយបេះដូងកើតចេញពីក្ដីស្រឡាញ់ ជាមួយទឹកចិត្ដនៃការបង្កើនដើមទុនរបស់ពួកយើងឲ្យកាន់តែមានគុណភាពខ្លាំងក្លា”។

ចាងហ្វាងផលិតកម្មដែលមានដើមកំណើតពីទឹកដីកម្ពុជាក្រោមរូបនេះ បានបង្ហាញចំណាប់អារម្មណ៍ថា ខ្សែភាពយន្ដរឿង “អ្នកម្ដាយ ZOMBIE” គឺជាចំណីចក្ខុថ្មីមួយទៀតសម្រាប់ទស្សនិកដែលកើតចេញពីការខិតខំរបស់ក្រុមការងារ តួសម្ដែង និងដៃគូសហការទាំងអស់។

តាមកាលបរិច្ឆេទ ខ្សែភាពយន្ដរឿង “អ្នកម្ដាយ ZOMBIE” នឹងចាក់បញ្ចាំងនៅគ្រប់រោងភាពយន្ដចាប់ពីថ្ងៃទី១៥ ខែសីហា ឆ្នាំ២០២៤ ដំណាលពេលគ្នានឹងការចាក់បញ្ចាំងរឿងនេះនៅប្រទេសហ្វីលីពីន។

សូមរំលឹកជូនថា ផលិតកម្ម សាស្ដ្រាហ្វៀម បានរៀបចំពិធីសម្ពោធខ្សែភាពយន្ដនេះយ៉ាងអធិកអធមនៅផ្សារទំនើប AEON MALL សែនសុខ រាជធានីភ្នំពេញ កាលពីល្ងាចថ្ងៃទី៧ ខែសីហា ដោយមានផលិតករ អ្នកជំនួញនិងតារាល្បីៗជាច្រើនដួងចូលរួមអបអរសាទរ។ ក្នុងឱកាសនោះគេឃើញវត្ដមានតារាចម្រៀង ទេព បូព្រឹក្ស តារាសម្ដែង គង់ ច័ន្ទស្រីមុំ តារាម៉ូដែល រឿន ណាត និងតារាល្បីៗជ្រើនដួងទៀត៕