VKH Rally Racing ក្រុមកម្ពុជា៖ ត្រៀមខ្លួនរួចហើយប្រជែងជាមួយជើងខ្លាំងទាំង៤៥ នៅ Asia Cross Country Rally 2024

2024-08-12 03:21:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមប្រណាំង VKH Rally Racing របស់កម្ពុជា បានត្រៀមខ្លួនរួចរាល់ហើយ និងប្ដេជ្ញាចិត្តនឹងយកពានឲ្យបានពីការប្រណាំងរថយន្តកម្រិតអាស៊ី ដែលមានឡានរហូតដល់ ៤៥ មកពី ១០ប្រទេស នៃការប្រកួត Asia Cross Country Rally 2024 ក្នុងប្រទេសថៃ។

កីឡាករកម្ពុជាទាំង២រូប

ការប្រកួតប្រណាំងរថយន្តឆ្លងកាត់ឧបសគ្គកម្រិតអាស៊ី (Asia Cross Country Rally 2024) នៅខេត្តសូរ៉ាត់ថានី ប្រទេសថៃ ចាប់ផ្ដើមធ្វើពិធីបើក និងដំណើរការប្រកួតពីថ្ងៃទី១១ ដល់ ១៧ ខែសីហា ឆ្នាំ២០២៤។ កីឡាករ វង្ស គឹមហួត បានប្រាប់ឲ្យដឹងថា ឆ្លងបទពិសោធន៍ធ្លាប់ចូលរួមការប្រណាំងកម្រិតអាស៊ីមួយនេះរយៈពេលជាង ១០ឆ្នាំក្នុងនាមជាអ្នកបើកបរ និងជាជំនួយការអ្នកបើកបរ ធ្វើឲ្យលោកមានជំនឿចិត្តខ្ពស់ជាមួយដៃគូប្រជែងពានសម្រាប់ការប្រកួតមួយនេះ។

រូបភាពផ្ដល់ជូន

កីឡាករកម្ពុជា វង្ស គឹមហួត និងហេង បញ្ញា ប្ដេជ្ញានឹងប្រឹងប្រែងឲ្យអស់ពីសមត្ថភាព សហការគ្នាឲ្យល្អទាំងក្រុម SERVICE និងក្រុមការងារ ដើម្បីស្វែងរកជ័យជម្នះជូនកម្ពុជាបាន។ ការប្រណាំង Rally ឆ្នាំនេះ មានរថយន្តចូលរួមច្រើនរហូត ៤៥គ្រឿង រីឯ Class សាំង ៩គ្រឿង មកពី ១០ប្រទេស សុទ្ធតែជាជើងខ្លាំងជាមួយនិងរថយន្តប្រណាំងថ្មី ហើយខ្លាំងជាងមុន។

រូបភាពផ្ដល់ជូន

នេះហើយជាចំណុចដែលត្រូវបង្កើនការប្រុងប្រយ័ត្នលើការបើកបរ ការបង្ហាញផ្លូវ ជាពិសេសគឺម៉ាស៊ីនរថយន្ត ផ្នែកខាងក្រោម និងប្រព័ន្ធសុវត្តិភាព ពីដំណាក់កាលទី១ រហូតដល់ដំណាក់កាលចុងក្រោយ។ ព្រោះការប្រណាំងឆ្នាំ២០២៣ កន្លងទៅមានបញ្ញាម៉ាស៊ីនចូលទឹក និងជារឿងមិននឹកស្មានដល់ធ្វើឲ្យមានបញ្ហាតែមួយដំណាក់កាលគឺដំណាក់កាលទី៥ (DNF) ធ្វើឲ្យធ្លាក់ចំណាត់ថ្នាក់ និងបញ្ចប់ត្រឹមលេខ ១១ ក្នុងចំណោមរថយន្តប្រណាំងសរុប៤១គ្រឿង ។

រូបភាពផ្ដល់ជូន

បញ្ជាក់ថា ព្រឹត្តការណ៍ប្រណាំងរថយន្ត ឆ្លងកាត់ឧបសគ្គ ឆ្នាំ២០២៤ ( Asia Cross Country Rally 2024 ) នឹងចាប់ផ្តើមពីថ្ងៃទី១១ ដល់ទី១៧ ខែសីហា នៅប្រទេសថៃ ។ សម្រាប់ដំណាក់កាលទី១ គឺប្រណាំងនៅក្នុងខេត្តសូរ៉ាតថានី រីឯដំណាក់កាលទី២ ពីខេត្តសូរ៉ាតថានី ទៅខេត្តហួហ៊ីន។ សម្រាប់ថ្ងៃនេះក្រុមកម្ពុជានឹងប្រណាំងលើចម្ងាយផ្លូវ 162.54គីឡូម៉ែត្រ៕