តារារ៉េប វណ្ណដា៖ ការបានទៅសម្ដែងក្នុងព្រឹត្តិការណ៍កីឡាអូឡាំពិកលើកនេះជាការឈ្នះមួយទៀតហើយសម្រាប់កម្ពុជា

2024-08-14 05:39:40
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងរ៉េបល្បីឈ្មោះ វណ្ណដា ថាការសម្ដែងក្នុងពិធីបិទកីឡាអូឡាំពិកដែលជាព្រឹត្តិការណ៍ធំលើពិភពលោកលើកនេះជាការឈ្នះមួយទៀតហើយសម្រាប់ប្រទេសកម្ពុជា សម្រាប់ខ្មែរទាំងអស់គ្នា និងមានមោទកភាពដែលបានធ្វើរឿងមួយនេះ។

ទិដ្ឋភាពព្រឹកមិញ

វណ្ណដា បានឲ្យដឹងពេលមកដល់ព្រលានយន្តហោះអន្តរជាតិភ្នំពេញ កាលព្រឹកមិញនេះថា រូបគេពិតជាមានមោទកភាពជាខ្លាំងដែលបាននាំយកទង់ជាតិខ្មែរ នាំយកភាសាខ្មែរ ទៅបង្ហាញលើឆាកដ៏ធំនៃព្រឹត្តិការណ៍បិទកីឡាអូឡាំពិករដូវក្ដៅ ឯប្រទេសបារាំង។

រូបភាពហ្វេសបុក វណ្ណដា

តារារ៉េបល្បីឈ្មោះរូបនេះបន្ថែមទៀតថា ការសម្ដែងនៅព្រឹត្តិការណ៍ធំឯប្រទេសបារាំងនេះជាការឈ្នះមួយទៀតហើយសម្រាប់ប្រទេសកម្ពុជា សម្រាប់ប្រជាជនកម្ពុជាទាំងអស់គ្នាដែលរូបគេក៏ដូចជាក្រុមការងារបារមីធ្លាប់បានធ្វើក្នុងការបង្ហាញពីវប្បធម៌ពិសេសគឺប្រទេសកម្ពុជាលើឆាកអន្តរជាតិ។

រូបភាពផេកអន្តរជាតិ

វណ្ណដា ក៏មិនភ្លេចឡើយចំពោះការស្រឡាញ់គាំទ្រពីសំណាក់ប្រជាជនកម្ពុជា និងការអបអរសាទរមួយនេះហើយរូបគេសង្ឃឹមថានឹងមានការសម្ដែងក្នុងព្រឹត្តិការណ៍កីឡាធំៗផ្សេងៗបន្តទៀត។ ជាមួយគ្នានេះដែរតារាចម្រៀងមកពីខេត្តព្រះសីហនុ សូមថ្លែងអំណរគុណសម្ដេចតេជោ សម្ដេចធិបតី ដែលបានអបអរសាទរចំពោះការសម្ដែងតំណាងឲ្យប្រទេសកម្ពុជាលើឆាកកីឡាដ៏ធំរបស់ពិភពលោកមួយនេះ។

រូបភាពផេកអន្តរជាតិ

បញ្ជាក់ដែរថា ព្រឹត្តិការណ៍កីឡាអូឡាំពិករដូវក្ដៅ លើកទី៣៣ ទីក្រុងប៉ារីស ប្រទេសបារាំង បានបិទបញ្ចប់ការប្រកួតហើយកាលពីថ្ងៃទី១១ ខែសីហា ឆ្នាំ២០២៤។ តារាចម្រៀងរ៉េបរបស់កម្ពុជា វណ្ណដា ត្រូវបានអញ្ជើញឲ្យចូលរួមសម្ដែងក្នុងពិធីបិទការប្រកួតកីឡាធំដែលមានជាង ២០០ប្រទេសលើពិភពលោកមកប្រកួតប្រជែងផងដែរក្នុងពិធីបិទមួយនេះ។ ប្រតិភូ គ្រូបង្វឹក និងអត្តពលិកកីឡារបស់កម្ពុជាក៏នឹងត្រឡប់មកដល់មាតុភូមិនៅល្ងាចថ្ងៃទី១៤ ខែសីហា ឆ្នាំ២០២៤ នេះផងដែរ៕