Ugarte មិនមានឈ្មោះក្នុងបញ្ជីកីឡាករ PSG ព្រោះចង់ដូរក្លឹប

2024-08-16 12:45:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើការពារ Manuel Ugarte មិនមានឈ្មោះក្នុងបញ្ជីកីឡាករ Paris Saint Germain ដើម្បីលេងប្រកួតបើករដូវកាលលីគកំពូលបារាំង Ligue 1 ជាមួយក្លឹប Le Havre។ ក្លឹបមិនបានបញ្ជាក់អំពីមូលហេតុជាផ្លូវការនៃសេចក្ដីសម្រេចចិត្តនេះឡើយ។

ជាទូទៅក្នុងអំឡុងពេលទីផ្សារដោះដូរ ការមិនដាក់ឈ្មោះកីឡាករណាមួយក្នុងបញ្ជីកីឡាករគឺជាសញ្ញាដ៏ធំមួយ ដែលបញ្ជាក់ពីចេតនារបស់ក្លឹប ឬកីឡាករចង់ចែកផ្លូវគ្នា។

បើយោងតាមរបាយការណ៍ចុងក្រោយមួយចំនួនបានឲ្យដឹងថា កីឡាករវ័យក្មេង Ugarte មានចិត្តចង់ផ្ទេរចេញពីក្លឹប PSG ដើម្បីទៅចូលរួមជាមួយក្លឹប Manchester United។ Ugarte បាននិងកំពុងជម្រុញឲ្យ PSG មានអារម្មណ៍វិជ្ជមានជាងមុន ក្នុងការចរចាជាមួយបិសាចក្រហមរឿងតម្លៃផ្ទេរ ព្រោះកីឡាករចង់មកចូលរួមជាមួយក្លឹបអង់គ្លេសក្រោមការដឹកនាំរបស់អ្នកចាត់ការ Erik Ten Hag។

ជាង ១ ខែកន្លងទៅនេះ ក្លឹបទាំងពីរកំពុងចរចាគ្នារឿងការផ្ទេររបស់ Ugarte។ កាសែត Daily Mail បានអះអាងតម្លៃផ្ទេរនេះស្ថិតក្នុងចន្លោះប្រមាណ ៧៦ លានដុល្លារសហរដ្ឋអាមេរិក។ បិសាចក្រហមចង់ឲ្យ PSG ចុះថ្លៃជាងនេះ។

យោងតាមប្រភពច្បាស់ការណ៍ខ្លះបានរំលេចថា បិសាចក្រហម និង ភាគីកីឡាករ Ugarte បានព្រមព្រៀងលក្ខខណ្ឌផ្ទាល់ខ្លួនរួចអស់ទៅហើយ នៅឡើយតែការចរចាគ្នារឿងតម្លៃផ្ទេរប៉ុណ្ណោះរវាងបិសាចក្រហម និងក្លឹបយក្សបារាំង។

Ugarte មានវ័យ ២៣ ឆ្នាំ ហើយបានបង្ហាញទម្រង់លេងយ៉ាងល្អឲ្យ PSG។ កាលពីរដូវកាលកន្លងទៅ កីឡាករលេងសរុបឲ្យក្លឹបចំនួន ៣៧ ប្រកួត។ មុនមកលេងឲ្យ PSG កីឡាករមានបទពិសោធន៍លេងចំនួន ២ រដូវកាលឲ្យក្លឹបព័រទុយហ្គាល់ Sporting CP ហើយលេងនៅទីនោះសរុប ៨៥ ប្រកួត។

នារដូវកាលដោះដូរនេះ បិសាចក្រហមហាក់មានភាពសកម្មយ៉ាងខ្លាំង។ ក្លឹបទើបនាំចូលកីឡាករក្មេងៗ និងកំពុងមានទម្រង់លេងល្អមកលេងឲ្យក្លឹប ក្នុងនោះរួមមាន ខ្សែប្រយុទ្ធសញ្ជាតិហុល្លង់វ័យ ២៣ ឆ្នាំ Joshua Zirkzee ខ្សែការពារបារាំងវ័យ ១៨ ឆ្នាំ Leny Yoro ខ្សែការពារហុល្លង់វ័យ ២៥ ឆ្នាំ Matthjis de Ligt និងខ្សែការពារស្លាបម៉ារ៉ុក ២៦ ឆ្នាំ Noussair Mazraoui៕