អ្នកនិពន្ធ និងជាតារាចម្រៀង លោក ម៉ា ច័ន្ទបញ្ញា ស្រាប់តែលេចមុខក្នុងកម្មវិធីមេគង្គ-ឡានឆាង ឆ្នាំ២០២៤ ដែលរៀបចំឡើងនៅទីក្រុង Yushu ខេត្តឈីងហៃ ប្រទេសចិន។ នេះជាលើកទី៥ ដែលតារាចម្រៀងរូបនេះ ត្រូវបានជ្រើសរើសជាឱ្យចូលរួមព្រឹត្តិការណ៍ដ៏ធំសម្បើមនេះ ក្នុងនាមជាអ្នកចម្រៀងការទូតតំណាងកម្ពុជា។

ទោះបីជាបច្ចុប្បន្ន បញ្ញា ពុំសូវចេញមុខតាមកម្មវិធីសិល្បៈច្រើនដូចមុន តែតារាចម្រៀងរូបនេះតែងតែខ្នះខ្នែងផ្សព្វផ្សាយពីកម្ពុជាទៅកាន់ពិភពលោក។ តារាតំណាងកម្ពុជារូបនេះ រៀបរាប់លើបណ្តាញសង្គមថា៖ "**ខ្ញុំដឹង ថាខ្ញុំមិនល្អគ្រប់គ្រាន់អីនោះទេ តែយ៉ាងហោចណាស់ ខ្ញុំមិនបានធ្វើអ្វីបំផ្លាញជាតិ ធ្វើអោយចលាចលដល់សង្គម ហើយនេះគឺជាខ្ញុំ ដែលខិតខំដើម្បីមនុស្សជំនាន់ក្រោយ។ សូមអរគុណដែលបានអនុញ្ញាតអោយខ្មែរបង្ហាញមុខ ក្នុងចំណោមអន្តរជាតិ**"។

រាល់ពេលចេញទៅសម្តែងក្រៅប្រទេសម្តងៗ តារាចម្រៀង អ្នកនិពន្ធបទភ្លេង និងទំនុកច្រៀងល្បីឈ្មោះរូបនេះតែងធ្វើរឿងសំខាន់ ៣ គឺ ប្រម៉ូតខ្លួនឯង និងប្រទេស, ទំនាក់ទំនងមិត្តភក្តិក្នុងស្រុក និងបណ្ដាប្រទេសដទៃ និង យល់ដឹងពីភូមិសាស្ត្រទំនៀមទម្លាប់ រួចកែច្នៃយកមកប្រើប្រាស់សម្រាប់ជនជាតិយើង។

ក្រៅពីពាំនាំបទចម្រៀងដ៏មានអត្ថន័យទៅបកស្រាយលើឆាកកម្មវិធីមេគង្គ-ឡានឆាង ឆ្នាំ២០២៤ ម៉ា ច័ន្ទបញ្ញា បានលើកយកសម្លៀកបំពាក់តំណាងជាតិបែបងាយៗ ទទួលគំរូពី ព្រះករុណា ព្រះបាទសម្តេចព្រះ នរោត្តម សីហនុ អតីតព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» សម្រាប់ចូលរួមតំណាងជាតិកម្ពុជា ជាមួយមិត្តចិន និងបណ្ដាប្រទេស ៥ ទៀតនៃកិច្ចសហប្រតិបត្តិការមេគង្គ-ឡានឆាង (MLC)។

ក្នុងនោះ លោកក៏បានរំលេចក្រមាខ្មែរ បង្ហាញឱ្យពិភពលោកឃើញពេលកំពុងឡើងឆាកច្រៀងសម្តែងផងដែរ។

ទោះបីពេលនេះលោកកំពុងមានវត្តមាននៅទឹកដីប្រទេសចិន បញ្ញា មិនភ្លេចឈឺឆ្អើលរឿងប្រទេសជាតិឡើយ។ មុននេះបន្តិច ម្ចាស់បទ «សង្សារចាស់» បានបង្ហោះសំណេរដ៏វែងអន្លាយលើទំព័រហ្វេសប៊ុកផ្លូវការពាក់ព័ន្ធតំបន់ត្រីកោណអភិវឌ្ឍន៍កម្ពុជា ឡាវ វៀតណាម ហៅកាត់ថា CLV-DTA ដោយលោកបានចោតជាសំណួរទៅកាន់អ្នកមានទស្សនៈផ្ទុយជុំវិញព្រឹត្តិការណ៍ដែលបានកើតឡើង និងចង់ឱ្យបងប្អូនងាកមកបង្កើតអ្វីថ្មីៗជូនជាតិ ដើម្បីផលចំណេញរបស់ជាតិយើង។

គួររំឮកថា ម៉ា ច័ន្ទបញ្ញា ក្តោបប្រជាប្រិយភាពលើវិថីសិល្បៈច្រើនឆ្នាំមកហើយ តាមរយៈស្នាដៃចម្រៀងតែងនិពន្ធថ្មីដែលមិនចម្លងពីបរទេស និងសកម្មភាពសង្គមផ្សេងៗ។ រយៈពេលច្រើនឆ្នាំមកនេះ លោកសាងបានស្នាដៃសិល្បៈជាហូរហែរ ដូចជា៖ បង្កើតក្រុមភ្លេង «ស្នាមញញឹមរាជធានី» អំឡុងឆ្នាំ២០១១ ដែលក្រុមភ្លេងនេះបានចូលរួមប្រលងតន្ត្រីថ្នាក់ជាតិ រៀបចំដោយស្ថានីយទូរទស្សន៍ ទទក និងក្រសួង ៣ ទៀត។

លុះចុងឆ្នាំ២០១៤ លោកបានឈ្នះពាន Asia Top Fashionable Singer Of The Year ពីកម្មវិធី Fashion Asia Award 2014 នៅចិន និងធ្លាប់ត្រូវបានស្ថានទូតអាមេរិកជ្រើសជាតំណាងកម្ពុជា ទៅចូលរួមកម្មវិធី YES Academy ASEAN នៅ ឥណ្ឌូណេស៊ី ក្នុងឆ្នាំ២០១៦។

ក្នុងឆ្នាំ២០១៦ ដដែរ ម៉ា ច័ន្ទបញ្ញា បានតំណាងកម្ពុជាចូលរួមសម្ដែងនៅចិនក្នុង “វេទិកាកិច្ចសហប្រតិបត្តិការទីក្រុងទេសចរណ៍តាមទន្លេឡានឆាំងនិងមេគង្គ” នៅទីក្រុងសានយ៉ា ខេត្តហាយណាន ប្រទេសចិន ។ ក្រោយមកលោកបានចាប់ផ្តើមសម្រួចគោលដៅរបស់ខ្លួនឯង ដោយបានបង្កើតក្រុមផលិតផ្ទាល់ខ្លួន ឈ្មោះថា «Color9» ដើម្បីទទួលផលិតវីដេអូអប់រំ ស្ពតពាណិជ្ជកម្ម និងបទចម្រៀងដល់អតិថិជន រួមទាំងតារាចម្រៀងល្បីៗជាច្រើនរូបផងដែរ។

ដ្បិតតែសព្វថ្ងៃលោកមិនសូវមានស្នាដៃថ្មីទម្លាក់លើទីផ្សារ តែតារាចម្រៀងរូបនេះមិនដែលរំលងព្រឹត្តិការណ៍ប្រទេសជាងតិ ឬរឿងរ៉ាវផ្សេងៗពាក់ព័ន្ធវិស័យសិល្បៈនោះឡើយ ដោយជារឿយៗលោករមែងបញ្ចេញមិតផ្ទាល់ខ្លួនលើបណ្តាញសង្គមចែកចាយឱ្យសាធារណជនបានដឹងពីទស្សនៈរបស់លោក៕