គណៈកម្មការអឺរ៉ុប បាន​សម្រេច​កាត់បន្ថយ​ពន្ធនាំចូល​រថយន្ត Tesla ដែលផលិតចិន បន្ទាប់ពីរកឃើញថា ក្រុមហ៊ុន​ Tesla ទទួលបានការឧបត្ថម្ភធនតិចតួចប៉ុណ្ណោះពី​រដ្ឋាភិបាលចិន។

EU បាន​កាត់បន្ថយពន្ធ​នាំចូលរថយន្ត​ Tesla ដែល​ផលិតនៅចិន ពី ២០,៨% មកនៅត្រឹម ៩% ប៉ុណ្ណោះ។ អត្រាពន្ធនេះ គឺ​ទាបណាស់​បើប្រៀបធៀបនឹងអត្រា ១៧% ទៅ ៣៦,៣% ដែល EU ដាក់លើ​រថយន្តក្រុមហ៊ុនចិន​មួយចំនួន។ យ៉ាងណាមិញ ការកំណត់ពន្ធនេះ ត្រូវរង់ចាំទទួលការអនុម័តភាគច្រើន​ជាផ្លូវការ​ពីសមាជិក EU ២៧ប្រទេសជាមុនសិន នៅមុនថ្ងៃទី៣០ ខែតុលា។

គួរដឹងថា EU បានកំណត់ពន្ធគយលើរថយន្តរបស់ក្រុមហ៊ុនចិនមួយចំនួនដូចជា SAIC Motor Corp ៣៦,៣%, Geely ១៩,៣%, BYD Co ១៧%, Dongfeng Motor Group Co និង Nio Inc ២១,៣%។

ការបន្ធូរបន្ថយពន្ធគយលើរថយន្ត Tesla នេះ ក៏ដើម្បីជំរុញ​ការលក់​រថយន្តអគ្គិសនី​ក្នុងតំបន់​អឺរ៉ុប​ឡើងវិញផងដែរ ក៏ព្រោះតែគោលដៅរបស់ EU គឺចង់លុបបំបាត់​រថយន្តចំហេះក្នុង​នៅត្រឹមឆ្នាំ​២០២៥។ យ៉ាងណាមិញ គោលដៅ​អាចនឹង​ជួបឧបសគ្គ​ដោយសារ​ការដាក់ពន្ធ​លើរថយន្តអគ្គិសនីចិន ដែលមានតម្លៃធូរថ្លៃ៕

អត្ថបទ៖ សំភី