ធ្លាប់ឆ្លងកាត់បទពិសោធន៍បើករថយន្ដ និងសាកល្បងដៃចង្កូតឡានទំនើបៗដោយផ្ទាល់ស្ទើរគ្រប់ប្រភេទ Cam-car ដែលគេស្គាល់ថាជាអ្នក review ឡានដ៏ល្បី បានបរិច្ចាគថវិកាចំនួន ២០០០រៀល ដល់មូលនិធិ “កសាងហេដ្ឋារចនាសម្ព័ន្ធ តាមព្រំដែន”។ នេះជាការសាកល្បង ប៉ុន្ដែលោក អ្វីដែលលោកចង់ដឹង និងចង់ឃើញនោះ គឺទទួលបានលទ្ធផលពិតប្រាកដ។

តាមរយៈបណ្ដាញសង្គម Tik Tok របស់ខ្លួន Camcar នៅថ្ងៃទី២៨ ខែសីហា ឆ្នាំ២០២៤ នេះ ឲ្យដឹងថា រូបលោកផ្ទាល់គ្រាន់តែចង់ដឹងថា តើការបរិច្ចាគតែ ២០០០រៀល នឹងទទួលបានលិខិតថ្លែងអំណរគុណពីរាជរដ្ឋាភិបាល ឬអត់? ភ្លាមៗលោកក៏ទទួលបានលិខិតថ្លែងអំណរគុណនោះមែន ហើយលោកពិតជាសប្បាយចិត្ដក្នុងការចូលរួមជាមួយរាជរដ្ឋាភិបាល ដើម្បីជាតិក្នុងឱកាសដ៏ល្អនេះ។

បើតាម Camcar រូបលោកក៏ធ្លាប់បានបរិច្ចាគក្នុងកម្មវិធីមនុស្សធម៌ និងជួយសង្គមផ្សេងទៀតដែរ ប៉ុន្ដែការបរិច្ចាគនៅពេលនេះធ្វើឲ្យលោករំភើបជាងគេ។ ទន្ទឹមគ្នានេះលោកបញ្ជាក់ថា មិនថាទំហំទឹកប្រាក់បរិច្ចាគប៉ុន្មាននោះទេ ហ្វេនៗ និងមហាជន នឹងទទួលបានលិខិតថ្លែងអំណរគុណទាំងអស់ពីប្រមុខរាជរដ្ឋាភិបាលដែរ ព្រោះលោកជាអ្នកសាកល្បងមុខគេក្នុងការបរិច្ចាគទឹកប្រាក់តិចតួចបែបនេះ៕