ក្រោយចំណាយពេលជិត១ខែទីបំផុតក្រុមបាល់ទាត់ Brotherhood FT ក្លាយជាម្ចាស់ពានរង្វាន់ CamEd Men's Futsal 2024

2024-09-09 06:58:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់ CamEd Men's Futsal 2024 បានបិទបញ្ចប់ជាផ្លូវការហើយកាលពីល្ងាចថ្ងៃទី៨ ខែកញ្ញា ក្រោយចំណាយពេលជិត១ខែកន្លងទៅនេះក្រុមបាល់ទាត់ Brotherhood FT ក្លាយជាជើងឯកបន្ទាប់ពីយកឈ្នះលើក្រុមCenturion ដោយទាត់បាល់កាត់សេចក្ដី។

ទិដ្ឋភាពម្សិលមិញ

តំណាងក្រុម Brotherhood FT កីឡាករ អាន សុទ្ធរាជស័ក្ត បានឲ្យដឹងថា ទម្រាំអាចលើកពាននេះបានគឺលំបាកខ្លាំង ព្រោះប៉ះក្រុម Centurion លេងបានល្អដូច្នេះហើយការប្រកួតតានតឹងរហូតឈានដល់ការទាត់បាល់កាត់សេចក្ដីយក ចាញ់-ឈ្នះ បែបនេះ។

រូបគេមានចិត្តសប្បាយរីករាយជាខ្លាំងដែលឈ្នះពានរង្វាន់ CamEd Men's Futsal 2024 ជាថ្មីទៀត និងអរគុណចំពោះមិត្តរួមក្រុមទាំងអស់ដែលចំណាយពេលហ្វឹកហាត់ក៏ដូចជាប្រកួតដោយមិនខ្លាចនឿយហត់ និងចេះសាមគ្គីគ្នារហូតក្រុមអាចធ្វើបានជោគជ័យមួយនេះ។

ក្រុម Brotherhood FT

ចំណែកមិត្តរួមក្រុមមួយរូបទៀតគឺកីឡាករ តាំង ខ្វេងលី ថ្លែងនូវទឹកចិត្តសប្បាយរីករាយជាខ្លាំង ព្រោះនេះជាលើកទី១ហើយសម្រាប់រូបគេបានមកលេងរួមក្រុម Brotherhood FT ជាមួយសិស្សច្បងដទៃទៀត។ រូបគេមិនភ្លេចឡើយចំពោះការអរគុណដល់សាលា CamEd មិនត្រឹមផ្ដល់តែការសិក្សារៀនសូត្រដល់សិស្សនិស្សិតនោះទេ ពោលបង្កើតជាសកម្មភាពកីឡាផ្សេងៗលើកកម្ពស់សុខភាពដល់សិស្សឆ្លៀតលេងកីឡាទៀតផង។ រូបគេពិតជាអរគុណជាខ្លាំងចំពោះថ្នាក់ដឹកនាំសាលាដូចជាលោក ខេស៊ី បាណេត ដែលបង្កើតឲ្យមានចលនាកីឡានេះឡើង។

ក្រុមលេខ២ Centurion

បញ្ជាក់ដែរថា ពានរង្វាន់ CamEd Men's Futsal 2024 បានបិទបញ្ចប់ហើយកាលពីល្ងាចម្សិលមិញនេះនៅតារាងបាល់ទាត់ T-Soccer។ ចំពោះក្រុមជើងឯកបានលើ Brotherhood FT និងលេខ២ បានលើក្រុម Centurion លេខ៣ បានលើក្រុម Royal D និងលេខ៤ បានលើក្រុម Toolbox៕