គ្រូ Chelsea បញ្ជាក់មូលហេតុផ្ទេរចូល Sancho

2024-09-09 13:33:37
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លឹប Chelsea លោក Enzo Maresca បានបញ្ជាក់អំពីមូលហេតុដែលក្លឹបផ្ទេរចូលខ្សែប្រយុទ្ធស្លាប Jadon Sancho។

លោក Maresca បានប្រាប់អ្នកសារព័ត៌មានថា លោកសប្បាយចិត្តពេលទទួលដំណឹងថា Chelsea មានលទ្ធភាពផ្ទេរចូល Sancho។ Sancho គឺជាកីឡាករដែលលោកចង់បាន ព្រោះកីឡាកររូបនេះពូកែញ្ញាក់បាល់ក្នុងស្ថានភាពមួយទល់នឹងមួយ។ Chelsea ត្រូវការកីឡាករប្រភេទនេះ ក្នុងស្ថានភាពបច្ចុប្បន្ន។ អ្នកចាត់ការរូបនេះបន្ថែម។

កាលពីបំណាច់ខែសីហាកន្លងទៅ ក្លឹបតោខៀវបានផ្ទេរចូល Sancho ក្នុងនាមជាកីឡាករខ្ចីជើងពីក្លឹប Manchester Unitedរយៈពេលមួយរដូវកាល ជាមួយនឹងកាតព្វកិច្ចទិញដាច់នៅរដូវកាលក្រោយក្នុងតម្លៃប្រមាណជាង ៣០ លានដុល្លារសហរដ្ឋអាមេរិក។

ការផ្ទេរនេះ បិទបញ្ចប់ពេលវេលារបស់កីឡាករសញ្ជាតិអង់គ្លេសវ័យ ២៤ ឆ្នាំ Sancho ពីក្លឹបបិសាចក្រហម ក្រោយរួមរស់ជាមួយគ្នាអស់ជាង ៣ ឆ្នាំ។ កាលពីដើមរដូវកាលមុន Sancho មានបញ្ហាពាក្យសម្ដីយ៉ាងធ្ងន់ធ្ងរ និងជាសាធារណៈជាមួយអ្នកចាត់ការក្លឹប Erik Ten Hag រហូតដល់ថ្នាក់កីឡាករអត់កន្លែងលេងក្នុងក្រុម ហើយត្រូវបានបញ្ជូនក្នុងនាមជាកីឡាករខ្ចីជើងនៅក្លឹបអាល្លឺម៉ង់ Borussia Dortmund។

បើទោះជា Ten Hag និយាយជារឿយៗហើយថា បញ្ហារវាងលោក និង Sancho ត្រូវបានសម្រួលគ្នាហើយ និងបន្ថែមទៀតថា Sancho គឺជាសមាជិកសំខាន់មួយរបស់ក្រុមរបស់លោក។ យ៉ាងនេះក្ដី បញ្ហានេះហាក់នៅបន្ត។ ចុងបញ្ចប់ Sancho នៅតែសម្រេចចាកចេញពីក្លឹប ហើយទៅចូលរួមជាមួយ Chelsea នៅទីក្រុងឡុងដ៍។