ខកខានមើលរឿង «សង្សារ ១៤ ថ្ងៃ» នៅរោងកុនមែនទេ? ឱកាសមើលតាមទូរស័ព្ទបានមកដល់ហើយ

2024-10-09 09:45:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្នាតធំ «សង្សារ ១៤ ថ្ងៃ» ត្រូវបានដកស្រង់ចេញពីរឿងប្រលោមលោកដ៏ល្បីដែលមានចំណងជើងដូចគ្នា ចេញពីស្នាដៃនិពន្ធរបស់ អ្នកនិពន្ធឆ្នើម សុខ ចាន់ផល ដោយបានសម្រិតសម្រាំងយ៉ាងយកចិត្តទុកដាក់ រហូតក្លាយកេណ្ឌចិត្តអ្នកអានជាច្រើននាក់ជាប់ចិត្តមិនធម្មតា។

ក្រោយស្វែងយល់ពីទំហំនៃការគាំទ្ររបស់មិត្តៗអ្នកអាន ប្រលោមលោកមួយនេះក៏ត្រូវបានបម្លែងទៅជាភាពយន្តខ្នាតធំ ដែលមានការចូលរួមសម្ដែងពី កញ្ញា ស៊ឹម ស្រីនិច្ច លោក ហូ សារៈ លោក សាន់នី លោក លី សុខណេត និងតារាសម្ដែងជាច្រើនរូបទៀត។

ស៊ឹម ស្រីនិច្ច ត្រូវសម្ដែងជាតួ យ៉ានី យុវតីវ័យក្មេងដែលមានបេះដូងបរិសុទ្ធ និងទន់ភ្លន់ តែត្រូវខកចិត្តដោយសារតែស្នេហាគ្រាដំបូងរបស់នាងកាលពីនៅសិក្សា។ ដោយសារតែភាពឈឺចាប់នេះបានបានធ្វើឲ្យនាង កែប្រែជីវិតក្លាយជានារីដែលមានភាពរឹងមាំ និងមិនចេះចុះចាញ់នឹងជីវិតដែលព្រហ្មលិខិតតាក់តែងមក។

មាសា គឺជាតួឯកប្រុសដែលបានក្លាយជាហេតុផលដែលធ្វើឲ្យបេះដូងយុវតី **យ៉ានី**ត្រូវគ្រាំគ្រា។ ប៉ុន្តែដោយសារនិស្ស័យគូ ចិត្តស្រឡាញ់របស់គេមិនបានទៅណាឡើយ ពោលគឺនៅដក់ជាប់នឹងតួស្រីរហូតមករាប់ឆ្នាំ។ តួ មាសា ត្រូវបានសម្ដែងដោយលោក ហូ សារៈ។

រីឯការថតជាភាពយន្តវិញ ក្រុមការងារក៏ត្រូវចាយពេលថតយូរខែដែរ ដើម្បីធ្វើយ៉ាងណា ធានាបាននូវគុណភាព និងបញ្ជាក់សាច់រឿងទៅតាមលំដាប់លំដោយ មិនឲ្យអ្នកទស្សនាពិបាកយល់នោះទេ ដែលនេះគឺជាការដឹកនាំដោយលោក បាន ឌីម៉ង់ និងផលិតដោយផលិតកម្ម ឥន្ទ្រិយហ្វីម។

ទោះជាយ៉ាងណា ភាពយន្តខ្នាតធំ «សង្សារ ១៤ថ្ងៃ» គ្រោងនឹងចាក់បញ្ចាំងជាយូរមកហើយ តបតាមតម្រូវការរបស់អ្នកគាំទ្រ ប៉ុន្តែដោយសារតែពេលនោះមានការផ្ទុះឡើងនៃមេរោគរាតត្បាតកូវីដ ១៩ ទើប ក្រុមការងាររឿងទាំងមូលសម្រេចផ្អាកការចាក់បញ្ចាំងសិន។ រហូតដល់ថ្ងៃទី ១៩ ខែតុលា ឆ្នាំ ២០២៣ ទើបភាពយន្តនេះត្រូវបានចាក់បញ្ចាំងជាផ្លូវការ ហើយកាន់តែពិសេសពេលនេះគ្រប់គ្នាក៏អាចទស្សនាបានដោយសេរីនៅលើ កម្មវិធី SabayOne ដែលជា App កម្សាន្តថ្មីប្រមូលផ្ដុំដោយមាតិកាចម្រុះជាច្រើន៕