សហព័ន្ធបាល់ទះ រួមនិងដៃគូឧបត្ថម្ភ ធ្វើពិធីលាគ្នាជាមួយកីឡាករ សួន ចាន់ណារ៉ូ និងសង្ឃឹមថារូបគេធ្វើរឿងនេះក្រោយចូលនិវត្តន៍

2024-10-22 08:59:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីល្ងាចថ្ងៃទី២១ ខែតុលា ឆ្នាំ២០២៤ ម្សិលមិញនេះសហព័ន្ធកីឡាបាល់ទះកម្ពុជា រួមនិងក្រុមហ៊ុន Khmer Beverages បានធ្វើពិធីលាគ្នាជាមួយកីឡាករបាល់ទះឆ្នើមជម្រើសជាតិកម្ពុជា សួន ចាន់ណារ៉ូ ដែលបានចូលនិវត្តន៍ចាប់ពីពេលនេះតទៅ។

ទិដ្ឋភាពម្សិលមិញ

លោកបណ្ឌិត អាំង សិរីពិសិដ្ឋ តំណាងសហព័ន្ធបាល់ទះកម្ពុជា បានឲ្យដឹងថា ការបំបែកកំណត់ត្រាប្រវត្តិសាស្ត្រ និងសមិទ្ធផលជាច្រើនក្នុងប៉ុន្មានឆ្នាំចុងក្រោយនេះគឺសុទ្ធសឹងតែមានការរួមចំណែកធំពីសំណាក់កីឡាករឆ្នើម សួន ចាន់ណារ៉ូ។ សួន ចាន់ណារ៉ូ មិនត្រឹមជាកីឡាករនោះទេ ជារៀមច្បង និងជាអ្នកដឹកនាំក្រុមផងដែរ រាល់ការប្រកួតមិនថាតូចធំរូបគេតែងតែបង្ហាញពីការតស៊ូមោះមុត រួមទាំងជួយពង្រឹងស្មារតីបច្ចេកទេសដល់មិត្តរួមក្រុមដើម្បីដណ្ដើមជ័យជម្នះពីគូប្រកួតមកវិញ។

ទិដ្ឋភាពម្សិលមិញ

ចំណែកលោកឧកញ៉ា លាង ម៉េង ក៏បង្ហាញនូវការសោកស្ដាយជាខ្លាំងចំពោះការចាក់ចេញរបស់តារាឆ្នើមរបស់សហព័ន្ធកីឡាបាល់ទះខាងលើនេះផងដែរ។ ប៉ុន្តែអ្វីៗរួមទាំងពេលវេលា អាយុ រាងកាយ ក៏ដូចគ្នាផងដែរវិវឌ្ឍន៍ទៅមុខជានិច្ចដូចជាវ័យរបស់ ចាន់ណារ៉ូ នៅពេលនេះដែលត្រូវចាក់ចេញពីបាល់ទះនេះ។

ទិដ្ឋភាពម្សិលមិញ

តំណាងម្ចាស់ឧបត្ថម្ភធំរបស់សហព័ន្ធបាល់ទះខាងលើបន្ថែមទៀតថា លោកសង្ឃឹមថា សួន ចាន់ណារ៉ូ នឹងមិនចាក់ឆ្ងាយពីវិស័យបាល់ទះឡើយ ពោលគួរជួយបង្ហាត់បង្រៀនក្មេងៗជំនាន់ក្រោយបានឲ្យមានសមត្ថភាពល្អ និងពូកែដូចជារូបគេផងដែរ។ មួយវិញទៀតបើអាចសូមឲ្យងាកមកជួយការងារផ្សេងៗរបស់សហព័ន្ធពាក់ព័ន្ធបច្ចេកទេសហ្វឹកហាត់ និងការប្រកួតផ្សេងៗ។

ទិដ្ឋភាពម្សិលមិញ

បញ្ជាក់ដែរថា កីឡាករ សួន ចាន់ណារ៉ូ ដែលជាអ្នកលើកបាល់ដៃទី១ របស់ក្រុមជម្រើសជាតិកម្ពុជាបានប្រកាសចូលនិវត្តន៍ហើយចាប់ពីពេលនេះតទៅក្រោយចំណាយពេលអស់ ១៥ឆ្នាំក្នុងនាមជាកីឡាករអាជីព។ ម្សិលមិញនេះសហព័ន្ធបាល់ទះ និងក្រុមហ៊ុន Khmer Beverages រួមទាំងគ្រូជម្រើសជាតិ កីឡាករផងនោះបានធ្វើពិធីលាគ្នាជាមួយរូបគេនៅផ្សារទំនើបជីបម៉ុង ២៧១ និងប្រគល់វត្ថុអនុស្សាវរីយ៍ផងដែរ៕