សន រ៉ាគីម៖ ប្ដេជ្ញាធ្វើឲ្យបានល្អបំផុត ប៉ះ រិន ដេវីត ជាថ្មីវគ្គដំណើរឆ្ពោះទៅដណ្ដើមឡាន

2024-12-02 08:20:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងមកពីខេត្តបាត់ដំបង សន រ៉ាគីម ប្ដេជ្ញាចិត្តនឹងខំប្រឹងឲ្យអស់ពីសមត្ថភាពក្នុងការប្រកួតជាមួយកីឡាករ រិន ដេវីត នៃវគ្គជម្រុះចាញ់ធ្លាក់ឆ្ពោះទៅដណ្ដើមឡានរបស់ Boostrong ខណៈដែររូបគេបានបញ្ជាក់ច្បាស់ៗហើយគ្មានទេ បងធម៌ ប្អូនធម៌ នរណាក៏ចង់បានឡានដែរ។

រូបភាពហ្វេសបុក រ៉ាគីម

កីឡាករ សន រ៉ាគីម បានឲ្យដឹងថា ខ្លួនតាំងចិត្តរួចហើយចំពោះការប្រកួតដ៏ធំ និងសំខាន់មួយនេះពិសេសការប្ដេជ្ញានឹងខំប្រឹងឲ្យអស់ពីសមត្ថភាព។ បច្ចុប្បន្ននេះរូបគេកំពុងផ្ដោតខ្លាំងលើការហ្វឹកហាត់ដោយមានសិស្សច្បងគឺ ឈុត សេរីវណ្ណថង រួមទាំងគ្រូធំចាំជួយផងដែរ។

រូបភាពផេក Boostrong

អ្នកលេងគុនខ្មែរមកពីខេត្តបាត់ដំបងរូបនេះបន្ថែមទៀតថា តាមបទពិសោធប៉ះជាមួយ ដេវីត កន្លងទៅគឺកីឡាកររូបនេះគ្រប់ក្បាច់ ល្អស្នៀត។ យ៉ាងណានៅរយៈយូរផងដែរទម្រាំដល់ការប្រកួត ដូច្នេះការហ្វឹកហាត់ត្រៀមខ្លួនគឺ រ៉ាគីម ថាល្មមគ្រប់គ្រាន់ហើយ។ ចំពោះការដាក់ក្ដីសង្ឃឹមក្នុងជំនួបនេះគឺត្រឹម ៥០% សិន ប៉ុន្តែនិយាយឲ្យខ្លីរូបគេក៏ចង់បានឡានពី Boostrong ផងដែរ។

រូបភាពផេក Boostrong

បញ្ជាក់ដែរថា សន រ៉ាគីម នឹងត្រូវប៉ះកីឡាករ រិន ដេវីត ក្នុងវគ្គជម្រុះចាញ់-ធ្លាក់ នៃព្រឹត្តិការណ៍ប្រកួតដណ្ដើមឡានរបស់ Boostrong។ អ្នកទាំងពីរនឹងត្រូវប្រកួតគ្នានៅថ្ងៃទី៤ ខែមករា ឆ្នាំ២០២៥ ខាងមុខនេះ។ អ្នកឈ្នះនឹងបានឡើងទៅជុំបន្ទាប់គឺប្រកួតម៉ារ៉ាតុងដណ្ដើមយកឡានតាមការបរិច្ឆេទរបស់កម្មវិធី៕

អត្ថបទ៖ នួន ស៊ីណា