កាលពីចុងសប្តាហ៍កន្លងទៅ កំពូលតារាចម្រៀង ព្រាប សុវត្ថិ បានទៅអង្រួនអារម្មរណ៍ហ្វេនៗដល់ខេត្តបន្ទាយមានជ័យ និងខេត្តព្រះវិហារតែម្ដង។ លោកបានចូលរួមច្រៀង និងសម្តែងនៅលើឆាកប្រគុំតន្ដ្រីអស្ចារ្យជាមួយនឹងបទល្បីៗ ជាពិសេសការបង្ហើរសំនៀងបទ “សែកមន្ត” បានធ្វើឲ្យមហាជនកាន់តែពេញចិត្ត។

គ្រាន់តែឮសំឡេងច្រៀង បទ“សែកមន្ត” បន្លឺឡើងភ្លាម សំឡេងស្រែកហ៊ោកញ្ជៀវ និងទះដៃលាន់ឮកងរំពងពេញមុខឆាកប្រគុំតន្ដ្រី ដែលនេះបញ្ជាក់ថា ពួកគេពិតជាស្រឡាញ់ ពេញចិត្ត គាំទ្រកំពូលតារាចម្រៀង ព្រាប សុវត្ថិ ដែលជាidol ច្រើនឆ្នាំមកហើយនោះដោយគ្មានថ្ងៃប្រែប្រួលចិត្ត ។

តាមរយៈវីដេអូច្រៀង និងសម្តែងនៅខេត្តបន្ទាយមានជ័យ និងខេត្តព្រះវិហារ សន្ទុះ នៃអ្នកចូលទស្សនាបន្ថែមនៅបណ្ដាញសង្គមនៅតែបន្ដហក់ឡើង ដោយហ្វេនៗខ្លះបញ្ជាក់ថាខ្លួននៅតែចង់ឃើញមុខ និងស្ដាប់នូវបទចម្រៀងចេញថ្មីៗបន្ថែមទៀតពីIdol ព្រាប សុវត្ថិ។ ក្រៅពីទឹកដមសំនៀង និងកាយវិកាសំដែងដ៏រស់រវើកនៅលើឆាក ទឹកមុខដ៏សុភាពរបស់កំពូលតារាចម្រៀង ព្រាប សុវត្ថិ បានថ្ពក់បេះដូងហ្វេនៗជាប់រហូតបាត់ទៅហើយ។

នៅដើមឆ្នាំ២០២៥ តារាចម្រៀងប្រុសរូបនេះ បានត្រៀមស្នាដៃបទចម្រៀងជាច្រើនសម្រាប់ហ្វេនៗ ទន្ទឹមពេលគ្នានឹងការបង្ហាញវត្តមានលើឆាកតន្រ្តីតាមបណ្តាខេត្តទៅតាមការសំណូមពររបស់មហាជន។ មិនសូមអ្វីច្រើនពីមហាជន ជាពិសេសហ្វេនៗ បងស្នាយ ចង់ឃើញការគាំទ្រមួយដ៏ស្មោះត្រង់ ដើម្បីផ្ដល់កម្លាំងចិត្ដ៕