សហព័ន្ធ​កីឡា​ម៉ូតូ​ទឹក​កម្ពុជា​ បង្ហាញ​ភាព​ភ្ញាក់ផ្អើល​ជា​ថ្មី​ទៀត​ដល់​អន្តរជាតិ​ និង​នាំ​យក​មោទកភាពជូន​កម្ពុជា​ តាម​រយៈ​ការ​ឈ្នះ​មេដាយ​មាស និង​ពានរង្វាន់​កម្រិត​ខ្ពស់​បំផុត​​ នៃ​ការ​ប្រកួត​Jet Ski World Series 2024 និង Jet Ski World Cup 2024 នៅ​ប្រទេស​ថៃ។​

វីរៈ​កីឡាករ​ សាលី អ៊ូមើត​ បាន​ឲ្យ​ដឹង​ថា​ នេះ​មោទកភាព​របស់​កម្ពុជា​ រួម​ទាំង​ខ្លួន​លោក​ផ្ទាល់​ផង​ដែរ​ តាម​រយៈ​​ការ​ឈ្នះ​មេដាយ​ និង​ពាន​រង្វាន់​នៅ​ព្រឹត្តិការណ៍​ធំ​ Jet Ski World Series 2024 និង Jet Ski World Cup 2024 ដែល​មាន​សុទ្ធតែ​អ្នក​ខ្លាំង​ និង​មាន​ច្រើន​ប្រទេស​ចូលរួម។​

ដូច​ទៅ​និង​ការ​ប្ដេជ្ញា​ចិត្ត​ថា​ថ្ងៃ​មួយ​មួយ​​ខ្លួន​នឹង​ដឹកនាំ​សិស្ស​ប្អូន​ជំនាន់​ក្រោយ​ទៅ​ដណ្ដើម​មេដាយ​ ឬ​ពាន​អន្តរជាតិ​នៅ​ឯ​ក្រៅ​ប្រទេស​ឲ្យ​បាន​ជូន​កម្ពុជា​ ឥលូវ​នេះ​សម្រេច​បំណង​ហើយ។​ ពី​មុន​ខ្លួន​ចេញ​ទៅ​ប្រកួត​ម្ដងៗ​មាន​តែ​ម្នាក់ឯង​ ឬ​គ្នា​តិច​តូច​ប៉ុណ្ណោះ​ យ៉ាងណា​បច្ចុប្បន្ន​ភាព​រីកចម្រើន​ និង​ការ​ខំប្រឹង​តាំង​ពី​មុន​មក​ឥឡូវសហព័ន្ធ​សំបូរ​ធនធាន​ថ្មី​ៗ​ជា​ច្រើន​ដើម្បី​បន្តវេន។​

ក្ដី​ស្រមៃ​ធំ​មួយ​ទៀត​នោះ​របស់​ អ៊ូមើត​ គឺ​ការ​ប៉ង​ចង់​ឈ្នះ​ពាន​រង្វាន់​កម្រិត​ខ្ពស់​ និង​ជា​ការ​ប្រកួត​សំបូរ​ដោយ​អ្នក​ខ្លាំង​លើ​ពិភពលោក​ លើ​វិញ្ញាសា​ Pro Sport GP ​មាន​រយៈពេល​ជិត ២០​ឆ្នាំ​មក​នេះ​ក៏​បាន​សម្រេច​ផង​ដែរ​នៅ​ពេល​លនេះ។​ ពោល​រូប​គេ​មាន​សេចក្ដី​ត្រេកអរ​ជា​ខ្លាំង​ដោយ​​បាន​សម្រេច​បំណង​ក្នុង​ការ​ឈ្នះ​ពាន​កម្រិត​ខ្ពស់​ខាង​លើ​នេះ​ ខណៈ​សមិទ្ធផល​ ពាន​ មេដាយ​មាស​ ប្រាក់​ សំរឹទ្ធ ទាំង​នេះ​បាន​បង្ហាញ​ភាព​ភ្ញាក់ផ្អើល​ និង​ទទួល​បាន​ការ​សរសើរ​ជា​ខ្លាំង​ពី​បណ្ដា​ប្រទេស​ចូលរួម។​

បញ្ជាក់​ផង​ដែរ​ថា​ ចំពោះលទ្ធផលការប្រកួតជុំផ្ដាច់ព្រ័ត្រ នៃព្រឹត្តិការណ៍ WGP#1 Water Jet World Series 2024 នៅ​ប្រទេសថៃ កាលពីចុងសប្ដាហ៍កន្លងទៅ សម្រាប់ការប្រកួត Jet Ski World Series 2024 (ជុំទី៣) កម្ពុជាដណ្ដើមបានមេដាយមាស ៤ និង​ប្រាក់ ២ ។ ចំណែក​ការប្រកួត Jet Ski World Cup 2024 កម្ពុជាដណ្ដើមបានមេដាយមាស ១ ប្រាក់ ៥ និង​សំរឹទ្ធ ១ ។ សរុបការប្រកួតពីថ្ងៃទី១១-១៥ ខែធ្នូ ឆ្នាំ២០២៥ នៅ​ប្រទេសថៃ ក្រុមកីឡាម៉ូតូទឹកកម្ពុជាដណ្ដើមបានមេដាយសរុប ១៣គ្រឿង (មាស ៥ ប្រាក់ ៧ និង​សំរឹទ្ធ ១)។ រសៀល​ម្សិលមិញ​នេះ​ផង​ដែរ​ក្រុម​ម៉ូតូ​ទឹក​កម្ពុជា​បាន​វិលត្រឡប់​មក​ដល់​មាតុភូមិ​វិញ​ហើយ៕​

អត្ថបទ៖ នួន ស៊ីណា​