តារាចម្រៀង ព្រាប សុវត្ថិ ប្រកាសជួបហ្វេនៗជាថ្មីនៅលើទឹកដីខេត្ដព្រៃវែង នាល្ងាចថ្ងៃទី២១ ខែធ្នូ ឆ្នាំ២០២៤ ខណៈដែលMV ក្រោមចំណងជើងថា “កុលាបមានបន្លា”របស់លោកទទួលបានការគាំទ្រដូចព្យុះ ពោលគឺត្រឹមតែរយៈពេល ១ថ្ងៃសោះមានអ្នកចូលស្ដាប់ និងទស្សនាជាង 200 K ហើយមានអ្នកប្រើបណ្ដាញសង្គម Tiktok យកទៅត្រាប់តាមរាប់រយនាក់។

តាមរយៈគណនីFacebook ផ្ទាល់ខ្លួនកំពូលតារាចម្រៀង ព្រាប សុវត្ថិ បានបញ្ជាក់ថា រូបលោក និងតារាចម្រៀងល្បីៗជាច្រើនដួងផ្សេងទៀត នឹងជួបជាមួយអ្នកគាំទ្រនៅទីរួមខេត្ដព្រៃវែង តាមរយៈការប្រគំតន្ដ្រីដ៏ធំមួយនៅល្ងាចនេះ។ បន្ទាប់ពីបង្ហើបដំណឹងនេះដល់បងប្អូន ពុកម៉ែដែលនិយមតាមគាំទ្រលោកដោយផ្ទាល់ ឬនៅមុខឆាកតន្ដ្រីនានា លោកក៏ឆ្លៀតបង្ហើរឃ្លាមួយក្នុងបទចម្រៀង “កុលាបមានបន្លា” ទៀតផង។ ការបង្ហើបនេះបានធ្វើឲ្យអ្នកគាំទ្រមួយចំនួន គិតជាស្រេចថា Idol របស់ខ្លួននឹងលើកយកបទនេះទៅច្រៀងលើឆាក ក្នុងចំណោមបទមួយចំនួនទៀតដែលត្រូវច្រៀងក្នុងកម្មវិធីទាំងមូល។

ជុំវិញនឹងការចេញMV ថ្មី ហើយទទួលបានការគាំទ្រច្រើន នាពេលនេះ ត្រូវបានម្ចាស់សំនៀង គឺកំពូលតារាចម្រៀង ព្រាប សុវត្ថិ បញ្ជាក់អមជាមួយបទ “កុលាបមានបន្លា”ដែលទើបចេញក្ដៅៗនៅលើផេកផ្លូវការរបស់ផលិតកម្ម ហ្គាឡាក់ស៊ី ថា៖ “នេះជាបទថ្មីរបស់ខ្ញុំ សង្ឃឹមថាបងប្អូនស្រឡាញ់ និងចូលចិត្តសម្រាប់ចម្រៀង១បទនេះ ហើយបងប្អូនក៏អាចបញ្ចេញមតិទីនេះបានដើម្បីឲ្យខ្ញុំអាចកែប្រែសម្រាប់បទបន្ទាប់របស់ខ្ញុំ”។

ចំពោះមតិរបស់មហាជន លើការបង្ហាញខ្លួនជាសាធារណៈតាមឆាកប្រគំតន្ដ្រីនានា ក៏ដូចជាការបញ្ចេញបទចម្រៀងថ្មីៗមួយរយៈចុងក្រោយនេះ គឺទទួលបានការគាំទ្រខ្លាំង ហើយត្រូវបានពួកគេផ្ដល់ពិន្ទុពេញៗ បើទោះបីជាឈុតសម្ដែងក្នុងMV នៅមានការឆកល្វែងដោយពួកគេនិយាយថា អ្នកនិពន្ធ និងដឹកនាំសម្ដែងឲ្យប្រើស្ដាយ និងប្លង់ថតមិនសូវខុសបទមុនៗ ប៉ុន្ដែបើនិយាយពីសមត្ថភាព និងទេពកោសល្យរបស់IDOL ព្រាប សុវត្ថិ វិញ គឺនៅពេញប៊ឹប៕