ស្ទឹងត្រែង៖ ស្រមៃមើលទេសភាពព្រៃធម្មជាតិដ៏ខៀវស្រងាត់ ទឹកហូរថ្លាស្អាតគ្រប់រដូវកាល ដើមឈើធំៗផ្តល់ម្លប់ត្រជាក់ និងបរិយាកាសស្ងប់ស្ងាត់ដែលធ្វើឱ្យអ្នកភ្លេចនឿយហត់។ នេះគឺជាសហគមន៍អេកូទេសចរណ៍អូរប្ញស្សីកណ្តាល តំបន់ទេសចរណ៍ធម្មជាតិលាក់ខ្លួននៅចំណុចប្រសព្វនៃខេត្តស្ទឹងត្រែង និងក្រចេះ ដែលកំពុងទាក់ទាញភ្ញៀវទេសចរទាំងក្នុងស្រុក និងក្រៅស្រុកឱ្យមកទស្សនាជារៀងរាល់ថ្ងៃ។

សហគមន៍អេកូទេសចរណ៍អូរប្ញស្សីកណ្តាល ស្ថិតនៅឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង តាមបណ្តោយផ្លូវជាតិលេខ ៧ ដែលមានចម្ងាយត្រឹម ២៨ គីឡូម៉ែត្រពីទីរួមខេត្តស្ទឹងត្រែង។ ទីនេះជាកន្លែងដ៏ល្អឥតខ្ចោះសម្រាប់អ្នកដែលស្វែងរកការសម្រាកលំហែកាយ និងភាពសប្បាយរីករាយក្នុងភាពស្រស់ស្អាតនៃធម្មជាតិ។ ព្រៃឈើខៀវស្រងាត់ ទឹកហូរថ្លាស្អាត និងខ្យល់អាកាសបរិសុទ្ធ បានបង្កើតជាបរិយាកាសដ៏មនោរម្យ ដែលធ្វើឱ្យអ្នកទស្សនាមានអារម្មណ៍ថាបានភ្ជាប់ជាមួយធម្មជាតិយ៉ាងពិតប្រាកដ។

អ្វីដែលធ្វើឱ្យអូរប្ញស្សីកណ្តាលកាន់តែពិសេសនោះគឺសេវាកម្មដ៏រួសរាយ។ ភ្ញៀវទេសចរអាចរីករាយជាមួយម្ហូបអាហារខ្មែរដ៏ឈ្ងុយឆ្ងាញ់ ដែលផលិតពីគ្រឿងផ្សំស្រស់ៗនៅមូលដ្ឋាន ដូចជាបន្លែ និងត្រីពីសហគមន៍។ ក្រៅពីនេះ សហគមន៍ផ្តល់សេវាកម្មទស្សនាព្រៃឈើ ដែលអ្នកនឹងបានស្វែងយល់ពីជីវចម្រុះ និងសត្វព្រៃដ៏កម្រនៅក្នុងតំបន់។ សម្រាប់អ្នកដែលចូលចិត្តការសម្រាកបែបសាមញ្ញ ខ្យូសឈើត្រូវបានរៀបចំយ៉ាងស្រស់ស្អាតនៅជាប់មាត់ទឹក ដើម្បីឱ្យភ្ញៀវអាចអង្គុយលេង ស្តាប់សំឡេងទឹកហូរ និងស្រូបយកភាពស្ងប់ស្ងាត់។

សម្រាប់អ្នកដែលចង់គេចចេញពីភាពអ៊ូអរនៃទីក្រុង និងស្វែងរកកន្លែងសម្រាកបែបធម្មជាតិ សហគមន៍អេកូទេសចរណ៍អូរប្ញស្សីកណ្តាលជាជម្រើសដ៏ល្អបំផុត។ រៀបចំកាបូបស្ពាយរបស់អ្នក ហើយចាប់ផ្តើមដំណើរទៅកាន់ឋានសួគ៌ធម្មជាតិនេះទាំងអស់គ្នា!

រូបភាព ៖ មន្ទីរទេសចរណ៍ ខេត្តស្ទឹងត្រែង-Stung Treng Department of Tourism