Lisa តារាចម្រៀង K-Pop និងជាសមាជិកនៃក្រុម BLACKPINK បានធ្វើការបង្ហាញខ្លួនជាលើកដំបូងយ៉ាងគួរឱ្យចាប់អារម្មណ៍នៅកម្មវិធី Met Gala 2025 ដែលបានប្រារព្ធឡើងនៅសារមន្ទីរ Metropolitan Museum of Art ក្នុងទីក្រុងញូវយ៉ក។ កម្មវិធីនេះ ដែលត្រូវបានគេស្គាល់ថាជា “អូស្ការនៃវិស័យម៉ូដ” បានប្រារព្ធឡើងក្រោមប្រធានបទ “Superfine: Tailoring Black Style” ដែលផ្តោតលើការស្លៀកពាក់បែបបុរស និងឥទ្ធិពលនៃវប្បធម៌ខ្មៅ។

Lisa បានបង្ហាញខ្លួនក្នុងសម្លៀកបំពាក់រចនាដោយ Louis Vuitton ដែលជាម៉ាកល្បីល្បាញដែលនាងធ្វើជា BA ផ្ទាល់។ សម្លៀកបំពាក់របស់នាងរួមមានអាវធំខ្មៅបែបភ្លឺចែងចាំង និងខោខ្លីជាមួយនឹងស្រោមជើងថ្លា ដែលបានបញ្ចេញនូវរូបរាងបែបទាន់សម័យ ស៊ីវិល័យ និង សិចស៊ី។ នាងបានបន្ថែមគ្រឿងអលង្ការដ៏ប្រណិត និងកាបូប Louis Vuitton ដើម្បីបន្ថែមភាពទាក់ទាញ។

យោងតាម Vogue សម្លៀកបំពាក់របស់ Lisa ត្រូវបានរចនាឡើងដើម្បីឆ្លុះបញ្ចាំងពីប្រធានបទនៃកម្មវិធី ប្រកបដោយភាពច្នៃប្រឌិត។ ទោះជាយ៉ាងណា សម្លៀកបំពាក់របស់នាងបានបង្កឱ្យមានការជជែកវែកញែកនៅលើបណ្តាញសង្គម ដោយសារតែផ្នែកខ្លះនៃការរចនាមានរូបភាពដែលអ្នកខ្លះជឿថាស្រដៀងនឹងរូបភាពរបស់ Rosa Parks ដែលជាឥស្សរជនសិទ្ធិស៊ីវិលអាមេរិក។ Louis Vuitton បានឆ្លើយតបថា ការប៉ាក់នៅលើសម្លៀកបំពាក់គឺជា “ការគោរពដល់បុគ្គលដែលមានឥទ្ធិពលក្នុងជីវិតរបស់សិល្បករ” ប៉ុន្តែមិនបានបញ្ជាក់ថាមានរូប Rosa Parks នោះទេ។

ទោះបីជាមានភាពចម្រូងចម្រាសនេះក៏ដោយ ការបង្ហាញខ្លួនរបស់លីសានៅ Met Gala ត្រូវបានគេកោតសរសើរយ៉ាងទូលំទូលាយចំពោះភាពក្លាហាន និងភាពជឿជាក់របស់នាង។ នាងមិនមែនជាសមាជិកតែម្នាក់គត់នៃ BLACKPINK ដែលបានចូលរួមនោះទេ ដោយសមាជិកផ្សេងទៀតក៏បានចូលរួមផងដែរ តួយ៉ាងមានដូចជា Jennie និង Rosé ក៏បានបង្ហាញខ្លួនជាមួយនឹងសម្លៀកបំពាក់ដ៏ទាក់ទាញ។ Jennie បានស្លៀកសម្លៀកបំពាក់រចនាដោយ Chanel ខណៈ Rosé បានជ្រើសរើស ម៉ូតបែប Fashion ទាន់សម័យ។

ឆ្នាំ ២០២៥ គឺជាឆ្នាំដ៏ជោគជ័យសម្រាប់ Lisa។ នាងបានបញ្ចប់ការសម្តែងនៅកម្មវិធី Coachella បានចេញអាល់ប៊ុមទោលដំបូងរបស់នាងឈ្មោះ “Alter Ego” ដែលឈរនៅលេខ ៧ នៅលើតារាង Billboard 200 និងបានបង្ហាញខ្លួនជាលើកដំបូងក្នុងរឿង “The White Lotus” រដូវកាលទី ៣។ បន្ទាប់ពី Met Gala Lisa នឹងចូលរួមជាមួយសមាជិក BLACKPINK ផ្សេងទៀតសម្រាប់ដំណើរទេសចរណ៍ពិភពលោករបស់ពួកគេនៅរដូវក្តៅនេះ៕