វីដេអូដ៏គួរឱ្យភ្ញាក់ផ្អើលមួយបានក្លាយជាប្រធានបទនៅលើបណ្តាញសង្គម បន្ទាប់ពីបង្ហាញពីហេតុការណ៍ដែលមនុស្សយន្ត (Humanoid Robot) មួយបាន វាយប្រហារទៅលើអ្នកគ្រប់គ្រងរបស់វា នៅក្នុងរោងចក្រមួយក្នុងប្រទេសចិន។ ហេតុការណ៍នេះ ដែលត្រូវបានថតចាប់បានដោយកាមេរ៉ាសុវត្ថិភាព (CCTV) បានបង្កឱ្យមានការព្រួយបារម្ភជាសកលអំពីសុវត្ថិភាពនៃការអភិវឌ្ឍបច្ចេកវិទ្យាមនុស្សយន្ត។

យោងតាមសារព័ត៌មាន The Times of India និង VnExpress International ហេតុការណ៍នេះបានកើតឡើងនៅឯកន្លែងសាកល្បងមួយក្នុងប្រទេសចិន នៅសប្តាហ៍មុន ដែលមនុស្សយន្ត Unitree H1 ដែលជាមនុស្សយន្តដ៏ទំនើប បានបង្ហាញអាកប្បកិរិយាហឹង្សាដោយសារកំហុសក្នុងការសរសេរកម្មវិធី (Coding Error)។ នៅក្នុងវីដេអូ មនុស្សយន្តនេះត្រូវបានគេឃើញព្យួរជាប់ មុនពេលវាចាប់ផ្តើមគ្រវីដៃយ៉ាងខ្លាំងក្លា និងព្យាយាមគេចឱ្យផុតពីឧបករណ៍រឹត។ អ្នកគ្រប់គ្រងពីរនាក់នៅក្បែរនោះបានរត់ចេញទៅកន្លែងមានសុវត្ថិភាព ខណៈម្នាក់ទៀតបានការពារមុខរបស់ខ្លួនដើម្បីជៀសវាងការវាយប្រហារ។

The Mirror និង LatestLY បានរាយការណ៍ថា មនុស្សយន្តនេះបានធ្វើចលនាដែលអ្នកខ្លះហៅថា “គួរឱ្យខ្លាច” ដោយវាបានឈប់មួយភ្លែត និងសម្លឹងមើលអ្នកនៅជុំវិញមុននឹងធ្វើសកម្មភាពហឹង្សា។ ទិដ្ឋភាពនេះបានធ្វើឱ្យអ្នកមើលជាច្រើនប្រៀបធៀបទៅនឹងឈុតឆាកនៅក្នុងខ្សែភាពយន្តបែបវិទ្យាសាស្ត្រដូចជា “Terminator”។ ទីបំផុត អ្នកគ្រប់គ្រងម្នាក់បាន បញ្ឈប់មនុស្សយន្តនេះ។

អ្នកជំនាញខ្លះបានលើកឡើងថា ហេតុការណ៍នេះគួរតែជាការព្រមានសម្រាប់អ្នកអភិវឌ្ឍន៍ និងអ្នកធ្វើច្បាប់ ដើម្បីពង្រឹងស្តង់ដារសុវត្ថិភាពនៅក្នុងការផលិត និងប្រើប្រាស់មនុស្សយន្ត។ យោងតាម Yahoo News ការព្រួយបារម្ភកំពុងកើនឡើងអំពីលទ្ធភាពនៃការប្រើប្រាស់មនុស្សយន្តទាំងនេះនៅក្នុងវិស័យផ្សេងៗ ដែលអាចនាំឱ្យមានគ្រោះថ្នាក់ប្រសិនបើមិនមានការគ្រប់គ្រងត្រឹមត្រូវ៕