ប្រទេសថៃបានអនុវត្តវិធានការត្រួតពិនិត្យយ៉ាងតឹងរ៉ឹងនៅច្រកព្រំដែនទាំងអស់តាមបណ្តោយព្រំដែនថៃ-កម្ពុជា បន្ទាប់ពីភាពតានតឹងកើនឡើង និងការបដិសេធរបស់កម្ពុជាក្នុងការបន្ធូរបន្ថយស្ថានការណ៍។ ការសម្រេចចិត្តនេះបានធ្វើឡើងបន្ទាប់ពីការប៉ះទង្គិចយោធាខ្លីមួយនៅថ្ងៃទី២៨ ខែឧសភា ឆ្នាំ២៦២៥ នៅតំបន់ចុងបុក ខេត្ត Ubon Ratchatani ប្រទេសថៃ ដែលនៅជិតតំបន់ប្រសព្វព្រំដែនកម្ពុជា ថៃ និងឡាវ។

នៅថ្ងៃទី៧ ខែមិថុនា ឆ្នាំ២៦២៥ កងទ័ពថៃបានចេញសេចក្តីប្រកាសថា ខ្លួនបានទទួលការគ្រប់គ្រងលើ “ការបើក និងបិទ” ច្រកព្រំដែនទាំងអស់ជាមួយកម្ពុជា ដោយលើកឡើងពី “ការគំរាមកំហែងដល់អធិបតេយ្យភាព និងសន្តិសុខរបស់ថៃ”។ ច្រកព្រំដែនសំខាន់ៗ ដូចជាច្រកបានខ្លុងលឿក នៅស្រុកអរញ្ញប្រាថេត ខេត្តស្រះកែវ ត្រូវបានកាត់បន្ថយម៉ោងបើកពីម៉ោង៦ព្រឹកដល់១០យប់ មកនៅត្រឹមម៉ោង៨ព្រឹកដល់៤រសៀល។ លើសពីនេះ ពលរដ្ឋថៃដែលធ្វើដំណើរទៅលេងល្បែងស៊ីសង និងទេសចរណ៍ត្រូវបានហាមឃាត់មិនឱ្យឆ្លងកាត់ច្រកនេះ ហើយអ្នកជំនួញកម្ពុជាត្រូវមានលិខិតឆ្លងដែន ឬប័ណ្ណឆ្លងដែនតែប៉ុណ្ណោះ ដោយសុពលភាពត្រូវបានកាត់បន្ថយពី១៤ថ្ងៃ មកនៅត្រឹម៧ថ្ងៃ។

រដ្ឋមន្ត្រីការពារជាតិថៃ លោក ភុំថាំ វេចៃយ៉ាឆៃ បាននិយាយថា ថៃនឹងចាត់វិធានការបន្ថែមដើម្បីការពារអធិបតេយ្យភាព និងសន្តិសុខជាតិ។ ទោះជាយ៉ាងណា លោកបានអះអាងថា ការធ្វើពាណិជ្ជកម្មនៅតែបន្តដំណើរការដោយគ្មានផលប៉ះពាល់ ហើយពលករកម្ពុជានៅតែត្រូវបានអនុញ្ញាតឱ្យចូលប្រទេសថៃ៕