ក្រុមហ៊ុន MediaTek នឹងបញ្ចេញឈីបជំនាន់ថ្មី Dimensity 9500 គឺជាឈីបលំដាប់កំពូល សម្រាប់ប្រជែងជាមួយ Snapdragon Elite 2 ឬ SD Gen5 នៅខែកញ្ញា ឆ្នាំ២០២៥។ ក្រុមហ៊ុន MediaTek បានបង្ហាញថាឈីប Dimensity 9500 មានសមត្ថភាពក្រាហ្វិកខ្ពស់ជាងមុន ៤០% ដោយក្រុមហ៊ុនបានយកទៅធ្វើតេស្ដក្រាហ្វិក ray tracing ដោយទទួលបានល្បឿន 100fps។

MediaTek Dimensity 9500 នឹងប្រើប្រាស់ CPU ចំនួន ៨ គ្រាប់៖ ១គ្រាប់ Cortex-X930 (Travis) មានល្បឿន 3.23GHz, 3 គ្រាប់ប្រភេទ Alto Core ល្បឿន 3.03GHz, ៤ គ្រាប់ប្រភេទ Gelas Core មានល្បឿន 2.23GHz។ ចំណែកក្រាហ្វិក គេបានសហការជាមួយ ARM ដោយប្រើប្រាស់ GPU Mali-G1-Ultra MC12 ដែលមានល្បឿន 1.0GHz ដែលមានល្បឿនខ្ពស់ជាងមុន ៤០% តាមរយៈការធ្វើតេស្ដក្រាហ្វិកហ្គេម។

សូមបញ្ជាក់ផងដែរថា សម្រាប់ក្រាហ្វិក ARM Mali GPU ទទួលបានការអភិវឌ្ឍសមត្ថភាពទៅមុខជានិច្ច ដែលទាក់ទាញដល់ក្រុមហ៊ុនផលិតបន្ទះឈីប ទិញទៅបំពាក់លើឈីបរបស់គេ ជាក់ស្ដែងក្រុមហ៊ុន Samsung បានទិញយកទៅបំពាក់នៅឈីប Exynos និងក្រុមហ៊ុន Google ដែលទិញបំពាក់នៅឈីប Tensor ជាដើម។ ចំណែកឈីប Snapdragon ប្រើប្រាស់តែក្រាហ្វិក Adreno ប៉ុណ្ណោះ។

បន្ទះឈីបនេះ រំពឹងថានឹងបង្ហាញខ្លួនមុនការប្រកាសចេញរបស់ឈីប Snapdragon ហើយនឹងបង្ហាញថា តើទូរសព្ទកំពូលរបស់ក្រុមហ៊ុនមួយណា បានបញ្ជាទិញ។