របាយការណ៍ពីប្រព័ន្ធផ្សព្វផ្សាយចិនបានបង្កឱ្យមានការភ្ញាក់ផ្អើលខ្លាំង ដោយរាយការណ៍ថា តារាចម្រៀង Lisa សមាជិកក្រុម BLACKPINK និងមិត្តប្រុសរបស់នាង លោក Frédéric Arnault ដែលជាកូនប្រុសមហាសេដ្ឋី ត្រូវបានឃាត់ខ្លួនដោយប៉ូលិសថៃ បន្ទាប់ពីត្រូវបានចោទប្រកាន់ពីបទឥរិយាបថមិនសមរម្យនៅកន្លែងសាធារណៈ។ រឿងនេះកើតឡើងក្នុងពិធីជប់លៀងឯកជនមួយសម្រាប់អ្នកមាននៅក្រុងបាងកក ប្រទេសថៃ។ លើសពីនេះ វីដេអូឯកជនដែលត្រូវបានគេសង្ស័យថាថតពីពិធីនោះ កំពុងត្រូវបានផ្សព្វផ្សាយយ៉ាងទូលំទូលាយនៅលើបណ្តាញសង្គមចិន។

យោងតាមសារព័ត៌មានចិនដូចជា Sohu បានរាយការណ៍ថា បណ្តឹងនេះត្រូវបានដាក់ដោយអ្នកគ្រប់គ្រងសណ្ឋាគារមួយ ដែលជាកន្លែងរៀបចំពិធីជប់លៀង។ Lisa និងមិត្តប្រុសរបស់នាងមិនត្រូវបានចាប់ខ្លួន ឬឃុំខ្លួនទេ គ្រាន់តែត្រូវបានហៅទៅស្ថានីយ៍ប៉ូលិសដើម្បីបង់ប្រាក់ពិន័យរដ្ឋបាល ហើយបន្ទាប់មកពួកគេបានចាកចេញ។ ឧប្បត្តិហេតុនេះត្រូវបានគេរាយការណ៍ថាកើតឡើងនៅថ្ងៃទី១៣ ខែមករា ឆ្នាំ ២០២៦នេះ។ ទោះជាយ៉ាងណា របាយការណ៍ទាំងនេះមិនទាន់ត្រូវបានបញ្ជាក់ពីសំណាក់ភាគីពាក់ព័ន្ធនៅឡើយ។

Lisa ដែលកើតនៅឆ្នាំ១៩៩៧ ជាតារាល្បីលំដាប់ពិភពលោក និងជាសមាជិកក្រុម BLACKPINK ដែលមានប្រជាប្រិយភាពខ្លាំង។ រីឯលោក Frédéric Arnault គឺជានាយកប្រតិបត្តិ (CEO) និងជាកូនប្រុសរបស់មហាសេដ្ឋីល្បីឈ្មោះ។ ទំនាក់ទំនងស្នេហារវាងពួកគេត្រូវបានគេសង្ស័យតាំងពីខែកក្កដា ឆ្នាំ២០២៣ បន្ទាប់ពីមានរូបថតគូស្នេហ៍នៅភោជនីយដ្ឋានមួយនៅប្រទេសបារាំង។ ចាប់តាំងពីពេលនោះមក ពួកគេត្រូវបានគេឃើញនៅកន្លែងផ្សេងៗជុំវិញពិភពលោក រួមទាំងការជួបគ្រួសារ និងគាំទ្រគ្នាទៅវិញទៅមក។ ជាក់ស្តែងនៅខែកុម្ភៈ ឆ្នាំ២០២៥ លោក Frédéric បានចូលរួមពិធីបញ្ចាំងខ្សែភាពយន្ត "The White Lotus" របស់Lisaនៅប្រទេសថៃ និងនៅខែមេសា ឆ្នាំដដែល លោកបានទៅមើលការសម្តែងនៅ Coachella។

ការផ្សព្វផ្សាយវីដេអូឯកជននេះបានបង្កឱ្យមានការពិភាក្សាយ៉ាងក្តៅគគុកនៅលើបណ្តាញសង្គមចិន។ អ្នកខ្លះជឿថា បើរឿងនេះជាការពិត រូបភាពសាធារណៈរបស់ Lisa នឹងមិនអាចស្រោចស្រង់បានទេ។ រីឯអ្នកផ្សេងទៀតសង្ស័យថា ហេតុអ្វីបានជាមនុស្សល្បីឈ្មោះដូចពួកគេធ្វើឥរិយាបថមិនសមរម្យនៅមុខសាធារណជន? មតិមួយទៀត៖ "ម្ខាងជាកូនមហាសេដ្ឋី ម្ខាងជាតារាលំដាប់ពិភពលោក ហេតុអ្វីពួកគេធ្វើឥរិយាបថមិនសមរម្យនៅមុខសាធារណជន?"។

រហូតមកដល់ពេលនេះ ទាំង Lisa និង Frédéric Arnault មិនទាន់បានធ្វើការឆ្លើយតបជាផ្លូវការណាមួយចំពោះដំណឹងដែលបានចុះផ្សាយ ទាំងនេះទេ៕

ប្រភព៖ Kenh14