ក្រុមហ៊ុន OpenAI ដែលជាអ្នកបង្កើតបញ្ញាសិប្បនិម្មិត ChatGPT បានប្រកាសនៅថ្ងៃទី១៦ ខែមករា ឆ្នាំ២០២៦ ថា ខ្លួននឹងចាប់ផ្តើមសាកល្បងដាក់ការផ្សាយពាណិជ្ជកម្មនៅលើវេទិកា ChatGPT ក្នុងពេលខាងមុខនេះ ដើម្បីបង្កើនប្រាក់ចំណូល និងគ្រប់គ្រងការចំណាយខ្ពស់ក្នុងការដំណើរការសេវាកម្ម AI ។ ការផ្លាស់ប្តូរនេះនឹងចាប់ផ្តើមនៅសហរដ្ឋអាមេរិកសម្រាប់អ្នកប្រើប្រាស់ឥតគិតថ្លៃ និងអ្នកជាវកម្រិតទាប ខណៈអ្នកជាវកម្រិតខ្ពស់ដូចជា Premium Pro និង Enterprise នឹងនៅតែគ្មានការផ្សាយពាណិជ្ជកម្ម។

យោងតាមសេចក្តីប្រកាសរបស់ក្រុមហ៊ុន OpenAI ការដាក់ការផ្សាយពាណិជ្ជកម្មនេះគឺដើម្បីដោះស្រាយបញ្ហាចំណាយខ្ពស់ដែលកើតចេញពីការប្រើប្រាស់កុំព្យូទ័រដ៏ខ្លាំងក្លាសម្រាប់សេវាកម្ម AI ។ បច្ចុប្បន្ន ChatGPT មានអ្នកប្រើប្រាស់ជិតមួយពាន់លាននាក់ ប៉ុន្តែមានតែភាគរយតូចប៉ុណ្ណោះដែលបង់ប្រាក់សម្រាប់សេវាកម្មជាវ ដែលធ្វើឱ្យក្រុមហ៊ុនត្រូវស្វែងរកប្រភពចំណូលថ្មី។ ក្រុមហ៊ុនបានសន្យាថា ការផ្សាយពាណិជ្ជកម្មនឹងមិនជះឥទ្ធិពលដល់ចម្លើយរបស់ ChatGPT ឡើយ ដោយចម្លើយទាំងនោះនឹងផ្អែកលើភាពមានប្រយោជន៍ជាគោល ហើយការផ្សាយពាណិជ្ជកម្មនឹងត្រូវបានសម្គាល់ច្បាស់លាស់ និងបំបែកដាច់ដោយឡែក។ លើសពីនេះ ការសន្ទនារបស់អ្នកប្រើប្រាស់នឹងនៅតែជាឯកជន មិនត្រូវបានចែករំលែកជាមួយអ្នកផ្សាយពាណិជ្ជកម្មឡើយ។

ក្រុមហ៊ុន OpenAI បានសង្កត់ធ្ងន់ថា ខ្លួននឹងមិនធ្វើការបង្កើនការចូលរួមរបស់អ្នកប្រើប្រាស់ដើម្បីបង្កើនប្រាក់ចំណូលឡើយ ដែលខុសពីក្រុមហ៊ុនដូចជា Meta, TikTok និង YouTube ដែលតែងតែបង្កើនការចូលរួមដើម្បីបង្កើនការផ្សាយពាណិជ្ជកម្ម។ ផ្ទុយទៅវិញ ក្រុមហ៊ុននឹងផ្តោតលើការជឿទុកចិត្ត និងបទពិសោធន៍របស់អ្នកប្រើប្រាស់ជាចម្បង។ ការប្រកាសនេះកើតឡើងស្របពេលដែល OpenAI បានដាក់ដំណើរការ ChatGPT Go ដែលជាកញ្ចប់ជាវតម្លៃ ៨ ដុល្លារក្នុងមួយខែ ដែលមាននៅសហរដ្ឋអាមេរិក និងទីផ្សារផ្សេងទៀត។

ការផ្លាស់ប្តូរនេះធ្វើឱ្យ OpenAI ដើរតាមគន្លងក្រុមហ៊ុនយក្សបច្ចេកវិទ្យាដូចជា Google និង Meta ដែលរកប្រាក់ពីការផ្សាយពាណិជ្ជកម្មនៅលើវេទិកាឥតគិតថ្លៃ ខណៈក្រុមហ៊ុន Amazon ក៏ប្រើការផ្សាយពាណិជ្ជកម្មនៅលើវេទិកាទិញទំនិញ និងវីដេអូស្ទ្រីមដើម្បីគាំទ្រ AI ។ បច្ចុប្បន្ន តម្លៃក្រុមហ៊ុន OpenAI បានឡើងដល់ ៥០០ ពាន់លានដុល្លារ ដែលជាតម្លៃខ្ពស់បំផុតសម្រាប់ក្រុមហ៊ុនឯកជន។