ក្រុមហ៊ុន TikTok បានប្រកាសជាផ្លូវការកាលពីពេលថ្មីៗនេះថា ខ្លួនបានបង្កើតក្រុមហ៊ុនរួមទុនថ្មីមួយដែលមានឈ្មោះថា "TikTok USDS Joint Venture LLC" ដែលមានភាគហ៊ុនភាគច្រើនគ្រប់គ្រងដោយវិនិយោគិនអាមេរិក។

ការសម្រេចចិត្តនេះ ធ្វើឡើងក្នុងគោលបំណងដោះស្រាយបញ្ហាសន្តិសុខជាតិ និងជៀសវាងការបិទកម្មវិធីនេះពីទីផ្សារសហរដ្ឋអាមេរិក។

យោងតាមកិច្ចព្រមព្រៀងថ្មីនេះ ក្រុមហ៊ុនមេ ByteDance នឹងកាត់បន្ថយភាគហ៊ុនរបស់ខ្លួនមកត្រឹមតែ ១៩,៩% ប៉ុណ្ណោះ ដែលជាកម្រិតទាបជាង ២០% តាមការកំណត់នៃច្បាប់អាមេរិក។ ចំណែកឯភាគហ៊ុនដែលនៅសល់ ត្រូវបានកាន់កាប់ដោយក្រុមហ៊ុនវិនិយោគធំៗ រួមមាន៖

• Silver Lake, Oracle និង មូលនិធិ MGX មកពីទីក្រុងអាប៊ូដាប៊ី (កាន់កាប់ម្នាក់ ១៥%)។

• វិនិយោគិនផ្សេងទៀតរួមមាន Dell Family Office និងក្រុមហ៊ុនវិនិយោគមួយចំនួនទៀត។

ក្រោមរចនាសម្ព័ន្ធថ្មីនេះ ទិន្នន័យរបស់អ្នកប្រើប្រាស់អាមេរិកជាង ២០០ លាននាក់ នឹងត្រូវរក្សាទុកក្នុងប្រព័ន្ធ Cloud ប្រកបដោយសុវត្ថិភាពរបស់ក្រុមហ៊ុន Oracle។

ក្រុមហ៊ុនរួមទុនថ្មីនេះ ក៏នឹងមានអំណាចពេញលេញក្នុងការសម្រេចចិត្តលើគោលនយោបាយសុវត្ថិភាព និងការត្រួតពិនិត្យខ្លឹមសារ (Content Moderation) សម្រាប់អ្នកប្រើប្រាស់ក្នុងស្រុកផងដែរ។ លោក Adam Presser ត្រូវបានតែងតាំងជាអគ្គនាយក (CEO) នៃក្រុមហ៊ុនថ្មីនេះ ខណៈដែលលោក Shou Chew អគ្គនាយក TikTok សកល នឹងមានវត្តមានក្នុងក្រុមប្រឹក្សាភិបាលដែលភាគច្រើនជាជនជាតិអាមេរិក។

ប្រធានាធិបតីអាមេរិក លោក ដូណាល់ ត្រាំ បានបង្ហាញការគាំទ្រចំពោះកិច្ចព្រមព្រៀងនេះ ដោយលោកបានចុះហត្ថលេខាលើបញ្ជាប្រតិបត្តិដែលបញ្ជាក់ថា ផែនការលក់ប្រតិបត្តិការរបស់ TikTok ទៅឱ្យវិនិយោគិនអាមេរិក និងសកលលោក គឺបានឆ្លើយតបយ៉ាងត្រឹមត្រូវទៅនឹងតម្រូវការសន្តិសុខជាតិ។

គួររំលឹកផងដែរថា TikTok បានរងសម្ពាធយ៉ាងខ្លាំងពីច្បាប់ឆ្នាំ ២០២៤ ដែលតម្រូវឱ្យ ByteDance លក់អាជីវកម្មរបស់ខ្លួននៅអាមេរិក បើមិនដូច្នោះទេនឹងត្រូវប្រឈមមុខនឹងការបិទចោល។

ទោះជាយ៉ាងណាក៏ដោយ លោក ត្រាំ ដែលមើលឃើញពីប្រជាប្រិយភាពនៃកម្មវិធីនេះ បានព្យាយាមរកដំណោះស្រាយតាមរយៈការបង្កើតក្រុមហ៊ុនរួមទុននេះឡើង ដើម្បីរក្សាឱ្យកម្មវិធីនេះនៅតែអាចដំណើរការបាន។

កិច្ចព្រមព្រៀងនេះ ត្រូវបានគេមើលឃើញថាជាជ័យជម្នះមួយសម្រាប់ TikTok ដែលអាចបន្តប្រតិបត្តិការក្នុងទីផ្សារដ៏ធំបំផុតរបស់ខ្លួន ខណៈពេលដែលធានាបាននូវការព្រួយបារម្ភរបស់រដ្ឋាភិបាលអាមេរិកលើបញ្ហាឯកជនភាព និងឥទ្ធិពលពីបរទេស៕