ស៊ាងហៃ៖ ប្រទេសចិនបានចាប់ផ្តើមប្រតិបត្តិការមជ្ឈមណ្ឌលទិន្នន័យក្រោមបាតសមុទ្រដំបូងគេនៅលើពិភពលោក ដែលប្រើប្រាស់ថាមពលផ្ទាល់ពីកសិដ្ឋានខ្យល់នៅឯនាយសមុទ្រ (offshore wind) និងប្រើប្រាស់ទឹកសមុទ្រដើម្បីធ្វើឱ្យប្រព័ន្ធកុំព្យូទ័រត្រជាក់។ គម្រោងនេះត្រូវបានបង្កើតឡើងក្នុងគោលបំណងកាត់បន្ថយការប្រើប្រាស់ថាមពលអគ្គិសនីយ៉ាងគំហុក ដែលបណ្តាលមកពីការកើនឡើងនៃតម្រូវការបច្ចេកវិទ្យាបញ្ញាសិប្បនិម្មិត (AI)។

យោងតាមការចុះផ្សាយរបស់សារព័ត៌មាន China Daily បានឱ្យដឹងថា គម្រោងបង្ហាញមជ្ឈមណ្ឌលទិន្នន័យក្រោមបាតសមុទ្រមានឈ្មោះថា «Shanghai Lingang» ដែលមានទីតាំងស្ថិតនៅចម្ងាយប្រហែល ១០ គីឡូម៉ែត្រពីឆ្នេរសមុទ្រខាងកើតនៃទីក្រុងស៊ាងហៃ បានចាប់ផ្តើមដំណើរការជាផ្លូវការកាលពីខែឧសភាកន្លងទៅនេះ។

គម្រោងនេះត្រូវបានបង្កើតឡើងដោយក្រុមហ៊ុនបុត្រសម្ព័ន្ធរបស់ក្រុមហ៊ុនសំណង់ទំនាក់ទំនងចិន (China Communications Construction) ដោយរួមបញ្ចូលគ្នារវាងវិស្វកម្មនាយសមុទ្រ ថាមពលកកើតឡើងវិញ និងហេដ្ឋារចនាសម្ព័ន្ធកុំព្យូទ័រសម្រាប់ដំណើរការប្រព័ន្ធ AI។ គម្រោងនេះមានសមត្ថភាពគ្រោងទុក ២៤ មេហ្គាវ៉ាត់ ដែលអាចផ្គត់ផ្គង់អគ្គិសនីដល់ផ្ទះប្រជាពលរដ្ឋបានប្រហែល ២០,០០០ ខ្នង។

ការច្នៃប្រឌិតដ៏សំខាន់ និងជាស្នូលនៃគម្រោងនេះ គឺប្រព័ន្ធ «ការភ្ជាប់ថាមពលខ្យល់នាយសមុទ្រដោយផ្ទាល់»។ អគ្គិសនីដែលផលិតបានពីកសិដ្ឋានខ្យល់នៅក្បែរនោះ នឹងត្រូវបញ្ជូនត្រង់ទៅកាន់ម៉ូឌុលទិន្នន័យដែលលិចនៅក្រោមទឹក តាមរយៈខ្សែកាបចម្រុះរូបភាព-អគ្គិសនីក្រោមបាតសមុទ្រ (subsea photoelectric composite cables) ដោយមិនចាំបាច់ឆ្លងកាត់បណ្តាញអគ្គិសនីទូទៅនោះទេ។

ក្រៅពីនេះ មជ្ឈមណ្ឌលទិន្នន័យនេះក៏ពឹងផ្អែកលើភាពត្រជាក់ពីធម្មជាតិនៃទឹកសមុទ្រដើម្បីធ្វើឱ្យម៉ាស៊ីនបម្រើ (Servers) ត្រជាក់ផងដែរ។ ក្រុមអ្នកអភិវឌ្ឍន៍បានបញ្ជាក់ថា ប្រព័ន្ធផ្លាស់ប្តូរកំដៅដោយប្រើទុយោស្ពាន់ដែលចរន្តទឹកសមុទ្រឆ្លងកាត់នេះ អាចជួយកាត់បន្ថយការប្រើប្រាស់អគ្គិសនីបាន ២២.៨% មិនត្រូវការប្រើប្រាស់ទឹកសាបសម្រាប់ប្រព័ន្ធធ្វើឱ្យត្រជាក់ និងជួយកាត់បន្ថយការប្រើប្រាស់ផ្ទៃដីបានច្រើនជាង ៩០% បើធៀបនឹងមជ្ឈមណ្ឌលទិន្នន័យនៅលើដីធម្មតា។

យោងតាមការរាយការណ៍របស់ទូរទស្សន៍ CGTN គម្រោងនេះមានគម្រោងវិនិយោគសរុបចំនួន ១,៦ ប៊ីលីយូនយ័ន (ប្រហែល ២៣៥ លានដុល្លារអាមេរិក) ដែលជាផ្នែកមួយនៃកិច្ចខិតខំប្រឹងប្រែងយ៉ាងទូលំទូលាយរបស់ចិន ក្នុងការដោះស្រាយបញ្ហាតម្រូវការថាមពលដ៏ខ្លាំងក្លាដែលបង្កើតឡើងដោយបច្ចេកវិទ្យា AI។

យោងតាមទីភ្នាក់ងារថាមពលអន្តរជាតិ (IEA) ការប្រើប្រាស់អគ្គិសនីជាសកលដោយមជ្ឈមណ្ឌលទិន្នន័យ ត្រូវបានគេរំពឹងថានឹងកើនឡើងជាងទ្វេដងនៅត្រឹមឆ្នាំ ២០៣០ ដោយមានបច្ចេកវិទ្យា AI ជាកាតាលីករចម្បងជំរុញឱ្យមានការកើនឡើងនេះ។

លោក Li Zhen សាស្ត្រាចារ្យនៅសាកលវិទ្យាល័យ Tsinghua បានលើកឡើងថា បច្ចុប្បន្នមជ្ឈមណ្ឌលទិន្នន័យរបស់ប្រទេសចិនប្រើប្រាស់ថាមពលអគ្គិសនីប្រហែល ២៥០ ប៊ីលីយូនគីឡូវ៉ាត់ម៉ោង (kWh) ក្នុងមួយឆ្នាំៗ ដែលក្នុងនោះមានប្រហែល ៨០ ប៊ីលីយូនគីឡូវ៉ាត់ម៉ោង ត្រូវបានប្រើប្រាស់សម្រាប់តែប្រព័ន្ធធ្វើឱ្យត្រជាក់ប៉ុណ្ណោះ។

លោកបានបន្ថែមទៀតថា ប្រសិនបើមជ្ឈមណ្ឌលទិន្នន័យដែលមានទំហំប៉ុនគ្នានេះ ត្រូវបានសាងសង់នៅក្រោមទឹក ការប្រើប្រាស់អគ្គិសនីសម្រាប់ប្រព័ន្ធធ្វើឱ្យត្រជាក់អាចនឹងធ្លាក់ចុះមកត្រឹមប្រហែល ៣០ ប៊ីលីយូនគីឡូវ៉ាត់ម៉ោងក្នុងមួយឆ្នាំ ពោលគឺអាចសន្សំសំចៃថាមពលបានប្រហែល ៥០ ប៊ីលីយូនគីឡូវ៉ាត់ម៉ោងជារៀងរាល់ឆ្នាំ។ លោកបានប៉ាន់ប្រមាណថា ការកាត់បន្ថយនេះគឺស្មើនឹងការបញ្ចៀសការដុតធ្យូងថ្មស្តង់ដារប្រហែល ១៥ លានតោនក្នុងមួយឆ្នាំ ដែលជួយកាត់បន្ថយការភាយចេញនូវឧស្ម័នកាបូនទៅក្នុងបរិយាកាសយ៉ាងច្រើនផងដែរ៕