ទោះបីជាក្រុមជម្រើសជាតិន័រវែស (Norway) និងកាប់វែរ (Cape Verde) មិនបានលើកពានរង្វាន់បាល់ទាត់ពិភពលោក FIFA World Cup 2026 ក៏ដោយ ប៉ុន្តែពួកគេបានបន្សល់ទុកនូវរឿងរ៉ាវដែលមិនអាចបំភ្លេចបានចំនួនពីរ នៅក្នុងបេះដូងអ្នកគាំទ្របាល់ទាត់គ្រប់រូប។

ក្រុមជម្រើសជាតិន័រវែស បានចូលរួមប្រកួតក្នុងនាមជាក្រុមមិនសូវមានសង្ឃឹមដោយមានមនុស្សតិចតួចណាស់ដែលរំពឹងថាពួកគេអាចដើរបានឆ្ងាយក្នុងការប្រកួត។ ប៉ុន្តែ ពួកគេបានធ្វើឱ្យពិភពលោកភ្ញាក់ផ្អើលជាមួយនឹងទម្រង់លេងដ៏គ្មានការភ័យខ្លាច។ នៅក្នុងវគ្គ១៦ ក្រុមចុងក្រោយ ន័រវែសបានអង្រួនពិភពលោកដោយការយកឈ្នះក្រុមខ្លាំងប្រេស៊ីលក្នុងលទ្ធផល ២-១ ដែលជាការធ្លាក់ចេញពី World Cup ដ៏លឿនបំផុតរបស់ក្រុមជើងឯកប្រាំសម័យកាលនេះ ក្នុងរយៈពេលជិត ៣០ឆ្នាំ។

ក្រោយជ័យជម្នះដ៏អស្ចារ្យនោះ ខ្សែប្រយុទ្ធឆ្នើម Erling Haaland បានដឹកនាំធ្វើកាយវិការអបអរសាទរ «ចែវទូកវាយឃីង» (Viking Row) ដ៏ល្បីល្បាញ ដែលបានសាយភាយពេញបណ្តាញសង្គមភ្លាមៗនៅទូទាំងពិភពលោក។ អ្នកគាំទ្ររបស់ន័រវែសបានចូលរួមអបអរសាទរយ៉ាងមានមោទនភាព ដោយធ្វើកាយវិការចែវទូករួមគ្នាចាប់តាំងពីទីក្រុងអូស្លូ រហូតដល់ទីក្រុងម៉ៃអាមី។

ក្តីស្រមៃរបស់ន័រវែសបានបន្តទៅមុខទៀត នៅពេលពួកគេបានឡើងទៅដល់វគ្គ៨ ក្រុមចុងក្រោយ ជាលើកដំបូងក្នុងប្រវត្តិសាស្ត្រ។ ទោះបីជាពួកគេត្រូវចាញ់ក្រុមអង់គ្លេស ២-១ ក្នុងវគ្គថែមម៉ោងយ៉ាងណាក្តី ក៏ពួកគេបានចាកចេញពីការប្រកួតទាំងមានមោទនភាព។ នៅពេលសំឡេងកញ្ចែបញ្ចប់ការប្រកួតបានបន្លឺឡើង Haaland បានចូលទៅឱប Jude Bellingham យ៉ាងកក់ក្តៅ រួចនិយាយថា៖ «នេះគឺជាពេល ៦ សប្តាហ៍ដ៏អស្ចារ្យបំផុតនៅក្នុងឆាកជីវិតរបស់ខ្ញុំ»។

ជាមួយគ្នានេះដែរ ក្រុមជម្រើសជាតិកាប់វែរ ក៏បានឆក់យកបេះដូងអ្នកគាំទ្រយ៉ាងច្រើនសន្ធឹកសន្ធាប់ នៅក្នុងការបង្ហាញខ្លួនក្នុងពានរង្វាន់ World Cup ជាលើកដំបូងបង្អស់របស់ពួកគេដែរ។ នៅក្នុងវគ្គ៣២ ក្រុមចុងក្រោយ ពួកគេបានរុញច្រានក្រុមការពារតំណែងជើងឯកអាហ្សង់ទីន រហូតដល់វគ្គថែមម៉ោង មុនពេលចាញ់ក្នុងលទ្ធផលយ៉ាងប្រកៀកប្រកិត ៣-២ ដែលជាការប្រកួតមួយក្នុងចំណោមការប្រកួតដ៏រំភើបញាប់ញ័របំផុតប្រចាំព្រឹត្តិការណ៍។

វីរៈបុរសដ៏អស្ចារ្យបំផុតរបស់កាប់វែរ គឺអ្នកចាំទីវ័យ ៤០ ឆ្នាំ Vozinha ដែលធ្លាប់ធ្វើការជាជាងអគ្គិសនី មុនពេលក្លាយជាកីឡាករបាល់ទាត់អាជីព។ លោកបានធ្វើការសង្គ្រោះបាល់ដ៏អស្ចារ្យចំនួន៨ ដង ក្នុងការប្រកួតទល់នឹងអាហ្សង់ទីន និងបានបង្កើតជាការបំផុសគំនិតដល់មនុស្សរាប់លាននាក់។ មុនពេលការប្រកួតចាប់ផ្តើម លោកបាននិយាយទាំងមោទនភាពថា៖ «ថ្ងៃណាមួយ ខ្ញុំនឹងប្រាប់កូនៗរបស់ខ្ញុំដោយក្តីសោមនស្សថា ខ្ញុំធ្លាប់បានលេងប្រកួតទល់នឹង Messi»។

ទាំងន័រវែស និងកាប់វែរ សុទ្ធតែមិនបានលើកពានរង្វាន់ ប៉ុន្តែ ពួកគេបានបង្ហាញឱ្យពិភពលោកឃើញថា ភាពក្លាហាន ជំនឿចិត្ត និងការដាក់ខ្លួន គឺអាចបង្កើតជាកម្លាំងចិត្តដ៏អស្ចារ្យដល់មនុស្សជុំវិញខ្លួន។ ដំណើរដ៏មានតម្លៃជាប្រវត្តិសាស្ត្ររបស់ពួកគេ បានក្លាយជារឿងរ៉ាវដែលចងចាំបំផុតប្រចាំព្រឹត្តិការណ៍ World Cup 2026 នេះ៕

ប្រភព៖ Unknown Facts