មន្ត្រីកូរ៉េខាងជើងថាអាមេរិកជាអ្នកបង្កើតមេរោគអេបូឡា

2014-12-03 18:39:33
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីរបស់ប្រទេសកូរ៉េខាងជើងបានអះអាងថា សហរដ្ឋអាមេរិកគឺជាមេខ្លោងនៅពីក្រោយការផ្ទុះឡើងមេរោគអេបូឡានាទ្វីបអាហ្វ្រិកខាងលិច ព្រោះមហាអំណាចសេរីនេះ ចង់បង្កើតសង្គ្រាមជីវសាស្ត្រ។

ភ្នាក់ងារសារព័ត៌មានមជ្ឈិមរដ្ឋកូរ៉េ (KCNA) បានបញ្ចេញសេចក្ដីថ្លែងការណ៍ថា ពេលនេះប្រជាជនកូរ៉េខាងជើងបានទាមទារយ៉ាងខ្លាំងក្លា ឲ្យមានការនាំខ្លួនសហរដ្ឋអាមេរិកទៅតុលាការអន្តរជាតិ ជាការឆ្លើយតបទៅនឹងការបំពានសិទ្ធិមនុស្សរបស់ប្រទេសនេះ។

សេចក្ដីថ្លែងការណ៍បានអះអាងបន្តទៀតថា សហរដ្ឋអាមេរិកគួរតែត្រូវទទួលទណ្ឌកម្ម ព្រោះជាការពិតណាស់ អេបូឡារីករាលដាលខ្លាំងដោយសារអាមេរិក ដែលជាអ្នករំលោភសិទ្ធិមនុស្សខ្លាំងជាងគេលើលោក។

លោក Hong Sun Gwang ដែលជាអនុប្រធានក្រុមប្រឹក្សាភិបាលត្រួតពិនិត្យអនាម័យកូរ៉េ បាននិយាយនៅក្នុងសេចក្ដីថ្លែងការណ៍ថា "ជំនួយការអតីតប្រធានាធិបតីអាមេរិក Reagan បានបង្ហាញនៅក្នុងអត្ថបទមួយថា អាមេរិកជាអ្នកអភិវឌ្ឍន៍មេរោគអេបូឡាឡើង ក្នុងគោលបំណងចាប់ផ្ដើមបង្កើតសង្គ្រាមជីវសាស្ត្រ"។

មេរោគដ៏សាហាវអេបូឡា បានផ្ទុះឡើងជាថ្មីកាលពីដើមឆ្នាំ២០១៤ នេះ។ ប្រទេស ៣ នាទ្វីបអាហ្វ្រិកខាងលិចរងគ្រោះធ្ងន់ធ្ងរជាងគេ ដែលក្នុងមានប្រទេសហ្គីណេ សេរ៉ាឡេអូន និងប្រទេសលីបេរីយ៉ា។ បើតាមទិន្នន័យចុងក្រោយរបស់អង្គការសុខភាពពិភពលោកកាលពីថ្ងៃសៅរ៍ បានបង្ហាញថាចំនួនអ្នកស្លាប់ដោយមេរោគកំណាចនេះ កើនឡើងដល់ជិត ៧ពាន់នាក់ហើយ៕

អេបូឡាផ្ដាច់ជីវិតមនុស្សអស់ជិត ៧ពាន់នាក់ហើយ៖ ចុចទីនេះ

ចុចអានព័ត៌មានជាច្រើនទៀតទាក់ទងនឹងមេរោគមរណៈអេបូឡា៖ ចុចទីនេះ

ប្រែសម្រួល៖ គង់ វិសាល

ប្រភព៖ ibtimes