ឆ្នាំថ្មី ឆ្នាំសាកល គំនិតច្នៃប្រឌិតថ្មី បង្កើតក្តីស្រមៃជាមួយគ្នា!

2014-12-19 16:00:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងមួយឆ្នាំៗ តើប្រិយមិត្តមានកត់សម្គាល់ទេថា ជីវិតរបស់អ្នកគឺពោរពេញដោយការស្ថាបនា ឬកសាងឲ្យមានភាពរីកចម្រើនឥតឈប់ឈរ?

ជាក់ស្ដែងនៅពេលធំដឹងក្ដីបន្តិច ប្រិយមិត្តទាំងអស់ត្រូវបានប៉ាម៉ាក់បញ្ជូនទៅសាលា ដើម្បីក្រេបយកចំណេះវិជ្ជាផ្សេងៗ។ នៅក្នុងថ្នាក់ អ្នកមិនត្រឹមតែសិក្សាពីចំណេះដឹងទូទៅប៉ុណ្ណោះទេ ប៉ុន្តែថែមទាំងរៀនប្រាស្រ័យទាក់ទងជាមួយមនុស្ស ដែលមានវ័យស្របាលគ្នាផង។ ពេលនោះហើយ អ្នកចាប់ផ្ដើមកសាងមិត្តភាព ហើយមិត្តរួមថ្នាក់ខ្លះអាចនឹងកំដរអ្នកតាំងពីសាលាមត្តេយ្យ ឬបឋមសិក្សារហូតដល់បញ្ចប់ការសិក្សាក៏មាន។

ក្នុងវ័យសិក្សានេះដែរ រឿងមួយដែលប្រិយមិត្តភាគច្រើនមិនអាចចៀសផុត ជាពិសេសនៅពេលដល់វ័យជំទង់ នោះគឺទំនាក់ទំនងស្នេហា។ អ្នកអាចនឹងចាប់ចិត្តលើមិត្តរួមថ្នាក់របស់អ្នក ឬនរណាម្នាក់នៅក្នុងសាលានោះ។ ថាមិនត្រូវ សិស្សច្បង ឬសិស្សប្អូនអ្នកអាចលួចស្រលាញ់អ្នកផងក៏មិនដឹង។ ពេលនេះ អ្នកបានវិវឌ្ឍពីការកសាងមិត្តភាពឆ្ពោះទៅការកសាងទំនាក់ទំនងស្នេហា ប៉ុន្តែទន្ទឹមនឹងនេះដែរ អ្នកក៏អាចកើតទុក្ខព្រោះបរាជ័យក្នុងរឿងស្នេហាដែរ។

ការសិក្សាមានរយៈពេលវែងណាស់ គឺត្រូវចំណាយពេលតាំងពីអ្នកទើបចេះដើរតេះតះរហូតដល់ធំពេញរូបរាង។ ជួនកាលនៅពេលអ្នកចេញពីសាលាហើយ ក៏ការកសាងចំណេះដឹងនៅតែបន្តទៅដល់កន្លែងធ្វើការរបស់អ្នកទៀត។ ការកសាងសមត្ថភាពនេះគឺគ្មានទីបញ្ចប់ទេ មិនថាអ្នកស្ថិតក្នុងវ័យណាឡើយ។

ដើម្បីអាចឲ្យអ្នកធំឡើងក្លាយជាយុវជនមានចំណេះដឹងជ្រៅជ្រះ អ្នកចាំបាច់ត្រូវកសាងជីវិតរបស់អ្នកជាមួយនឹងគោលដៅច្បាស់លាស់ ចាប់ពីឆ្នាំ២០១៥ខាងមុខនេះទៅ ដូចជាត្រូវធ្វើអ្វីខ្លះឲ្យបានប្រឡងជាប់ឌីប្លូម ឬជាប់បាក់ឌុបទទួលបាននិទ្ទេសល្អ ដណ្ដើមយកអាហារូបករណ៍ចូលសាកលវិទ្យាល័យ។ សម្រាប់អ្នកដែលបានបញ្ចប់បរិញ្ញាបត្រ ក៏គួរកំណត់គោលដៅ ថាតើត្រូវធ្វើយ៉ាងណាដើម្បីរកបានការងារធ្វើក្នុងស្ថាប័នណាមួយ។ ចំពោះអ្នកដែលមានការងារធ្វើស្រាប់ហើយ តែត្រឹមជាបុគ្គលិកថ្នាក់ក្រោម ក៏អាចដៅផែនការផ្ទាល់ខ្លួន ថាតើត្រូវឆក់យកកៅអី និងប្រាក់ខែបុគ្គលិកថ្នាក់លើ ដែលធ្វើការខ្ពស់ជាងអ្នកមួយកម្រិត ឬពីរកម្រិតឲ្យបានក្នុងឆ្នាំ២០១៥ដោយរបៀបណា។ ដើម្បីអាចចាប់យកតួនាទីបានពីមួយកម្រិតទៅមួយកម្រិត អ្នកត្រូវកសាងស្នាដៃល្អៗជាច្រើន សម្រេចលទ្ធផលជាផ្លែផ្កា ធ្វើឲ្យថ្នាក់លើអ្នកភ្ញាក់ផ្អើល។ ជំហានបន្ទាប់ ឡានមួយគ្រឿង ផ្ទះមួយខ្នងល្មមអាចរស់នៅបាន និងគ្រួសារដ៏សមរម្យមួយ សុទ្ធសឹងតែអ្នកអាចកសាងឡើងបានទាំងអស់។

ទោះបីយ៉ាងណាការកំណត់ផែនការហាក់គ្រាន់ជាបន្ទាត់ដ៏ត្រង់មួយ ងាយស្រួលគិតងាយស្រួលនិយាយ ប៉ុន្តែដល់ពេលអនុវត្តជាក់ស្ដែង អ្នកត្រូវដើរផ្លូវវាង ជួនកាលត្រូវចុះទឹក ឬឡើងភ្នំ។ ពេលខ្លះ អ្នកត្រូវបាត់បង់សេចក្ដីរីករាយ ខាតអស់ពេលវេលា ឃ្លាតឆ្ងាយពីមិត្តភ័ក្ដិ សូម្បីតែដៃគូជាទីស្រលាញ់ក៏អាចរបូតបាត់ដែរ។

តាមរយៈឧបសគ្គគ្រប់បែបយ៉ាង ដែលប្រិយមិត្តទាំងអស់អាចនឹងជួបប្រទះ គេហទំព័រ Sabay នឹងធ្វើដំណើរជាមួយអ្នក ផ្ដល់អ្នកនូវចំណេះដឹងសម្បូរបែប បំណិនជីវិតប្លែកៗ និងដំណោះស្រាយផ្សេងៗ។ Sabay នឹងបង្ហាញនូវគន្លឹះអំពីការអប់រំ អាហារូបករណ៍នានា បទពិសោធន៍របស់បុគ្គលជោគជ័យ ព្រឹត្តិការណ៍ទាន់ហេតុការណ៍កើតឡើងទាំងក្នុង និងក្រៅប្រទេស កែការអផ្សុករបស់អ្នកជាមួយនឹងព័ត៌មានកម្សាន្ត និងកីឡា នាំមកនូវចំណេះដឹងបច្ចេកវិទ្យាជុំវិញខ្លួនអ្នក និងគន្លឹះដោះស្រាយពីវិបត្តិស្នេហា ដូច្នេះមិត្តយុវវ័យទាំងអស់អាចយកទៅប្រើប្រាស់ ដើម្បីស្ថាបនាឆ្នាំ២០១៥របស់អ្នកប្រកបដោយជោគជ័យ៕

មាស រ័ត្ន និពន្ធនាយករង