ចូលមើលចម្លាក់ពុទ្ធរូបតាមជញ្ជាំងភ្នំដ៏មហិមា ចំណាយពេលសង់ជាង ៤០០ឆ្នាំ

2014-12-20 18:27:53
ចំនួនមតិ 0 | ចំនួនចែករំលែក 0

ចន្លោះមិនឃើញ

Longmen Grottes គឺជាបណ្ដុំប្រាសាទសម្រាប់ព្រះពុទ្ធសាសនាដែលត្រូវបានឆ្លាក់លុងចូលជញ្ជាំងភ្នំ តាមដងទន្លេ Li ភាគខាងត្បូងទីក្រុង Luoyang ខេត្ត Henan ប្រទេសចិន។ នៅតំបន់នេះមានរូងភ្នំចំនួន ១៣៥០ និងមានប្រាសាទចំនួន ៤០ ដែលសម្បូរទៅដោយរូបចម្លាក់ព្រះពុទ្ធរូបគ្រប់សណ្ឋាន តាំងពីទំហំមួយអ៊ីញ រហូតដល់កម្ពស់ ១៧ម៉ែត្រ សរុបជាង ១សែនពុទ្ធរូប ឆ្លាក់ចេញពីថ្មភ្នំសុទ្ធសាធ។ រូងភ្នំទាំងនេះត្រូវបានចាត់ទុកជាគំរូសិល្បៈពុទ្ធសាសនាល្អបំផុតមួយនៅប្រទេសចិន។

រូងភ្នំ Longmen Grottoes លាតសន្ធឹងប្រវែង ១២គីឡូម៉ែត្រនៅទីក្រុង Luoyang ដែលជាទីក្រុងប្រវត្តិសាស្ត្ររបស់ចិន។ សំណង់នៅតំបន់នេះបានចាប់ផ្ដើមកសាងឡើងនៅឆ្នាំ៤៩៣ ក្នុងរជ្ជកាលអធិរាជ Xiaowen និងបានបន្តចំនួន ៦ជំនាន់ជាប់ៗគ្នា រួមទាំងរាជវង្ស Tang និងរាជវង្ស Song សរុបជាង ៤០០ឆ្នាំ។

រូងភ្នំទាំងនេះចាប់ផ្ដើមរងការខូចខាតក្នុងសតវត្សទី៩ នៅពេលមានចលនាប្រឆាំងព្រះពុទ្ធសាសនា។ ការបំផ្លិចបំផ្លាញបានបន្តយ៉ាងខ្លាំងទៀតក្នុងអំឡុងសតវត្សទី១៩ និងទី២០ ដោយស្នាដៃប្រមាញ់របស់ជនបរទេស។ ដូច្នេះហើយទើបបច្ចុប្បន្នគេឃើញចម្លាក់ជាច្រើននៅតំបន់នេះត្រូវគេយកទៅទុកនៅប្រទេសផ្សេងៗរួមមាន សារមន្ទីរសិល្បៈ Metropolitan នៅទីក្រុងញីវយ៉ក សារមន្ទីរ Atkinson នៅទីក្រុង Kansas និងសារមន្ទីរជាតិនៅទីក្រុងតូក្យូជាដើម។

បច្ចុប្បន្ន Longmen Grottoes បានក្លាយជាតំបន់អភិរក្ស និងត្រូវបានបញ្ចូលជាបេតិកភណ្ឌពិភពលោករបស់អង្គការ UNESCO កាលពីឆ្នាំ២០០០ ៕