ពានបាល់ទះសម្រាប់សិស្សវិទ្យាល័យប្រចាំភ្នំពេញបើកជាផ្លូវការថ្ងៃនេះ

2015-01-06 00:36:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់បាល់ទះធំប្រចាំរាជធានីភ្នំពេញ ដែលមានឈ្មោះថាសកលវិទ្យាល័យវេស្ទើន ឆ្នាំ ២០១៥ (Western Cup 2015) បានចាប់ផ្ដើមប្រកួតជាផ្លូវការហើយនៅថ្ងៃទី ៥ ខែ មករា ឆ្នាំ ២០១៥ នេះនៅវិមានពហុកីឡដ្ឋានជាតិដោយក្រុមភាគច្រើនមកពីតាមវិទ្យាល័យនានា ក្នុងតំបន់។

ពិធីបើករសៀលនេះរៀបចំនៅវិមានពហុកីឡដ្ឋានជាតិ

ឯកឧត្ដម ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា និង ឯកឧត្ដម តែ ឡូរិន សកលវិទ្យាធិការ នៃសកលវិទ្យាល័យវេស្ទើន បានអញ្ជើញជាអធិបតីភាពក្នុងពិធីបើកនេះ។ លោក ស្រេង សេង ប្រធានការិយាល័យអប់រំកាយនិងកីឡានៃមន្ទីរអប់រំយុវជននិងកីឡា រាជធានីភ្នំពេញបានធ្វើរបាយការណ៍ ស្ដីពីដំណើរការ និងបច្ចេកទេសនៃការប្រកួតបាល់ទះយុវជនសិស្សវិទ្យាល័យដណ្ដើមពានរង្វាន់ Western Cup ឆ្នាំនេះ។

ពាន រង្វាន់នេះត្រូវបានចូលរួមដណ្ដើមដោយវិទ្យាល័យចំនួន ២៣ ក្នុងនោះក្រុមដែលដណ្ដើមបានជ័យលាភីនឹងទទួលបាន ពានមួយ, ទង់អនុស្សាវរីយ៍ចំនួនមួយ, អាហារូបករណ៍ ៥០ភាគរយ និងប្រាក់រង្វាន់ ចំនួន ១០លានរៀល សម្រាប់ក្រុមចំណាត់ថ្នាក់លេខ២ទទួលបានទង់អនុស្សាវរីយ៍មួយ, អាហារូបករណ៍ ៥០ភាគរយ និង ប្រាក់រង្វាន់ ៦ លានរៀល ស្របពេលក្រុមលេខ ៣ ត្រូវទទួលចំណែក ទង់អនុស្សាវរីយ៍មួយ, អាហារូបករណ៍៥០ ភាគរយ និង ប្រាក់រង្វាន់ ៣លានរៀល។ ចំណែកក្រុមលេខ៤ ទទួលបានទង់អនុស្សាវរីយ៍មួយ, អាហារូបករណ៍៥០ភាគរយ និងប្រាក់រង្វាន់៣លានរៀល។

ព្រម ជាមួយគ្នានោះដែរឯកឧត្ដម ស៊ាន បូរ៉ាត បានប្រកាសបើកដំណើរការនៃការ ប្រកួតកីឡាបាល់ទះយុវជន Western Cup 2015 ជាផ្លូវការ ព្រមទាំងជូនពរឱ្យព្រឹត្តិការណ៍នេះទទួលបានជោគជ័យ។ មន្រ្តីមកពីក្រសួងអប់រំយុវជននិងកីឡា រូបនេះបានផ្ដល់ទស្សនទានមួយចំនួនដូចខាងក្រោម៖

១)ប្អូន ៗនិងក្មួយៗជាកីឡាករទាំងអស់ សូមយកចិត្តទុកដាក់ឲ្យបានខ្ពស់បំផុតក្នុងការចូលរួមប្រកួត ក្នុងនោះផ្ដោតជាសំខាន់លើលក្ខណៈបច្ចេកទេស សីលធម៌យុត្តិធម៌និងប្រកបដោយឆន្ទៈមុតមាំហើយត្រូវចេះគោរពដៃគូ ប្រកូតរបស់ខ្លួនឲ្យបាន។

២) ប្រតិភូ ដឹកនាំទាំងអស់ ត្រូវរក្សាឲ្យបាននូវមនសិការវិជ្ជាជីវៈរបស់ខ្លួន ហើយជួយពន្យល់ណែនាំដល់កីឡាកររបស់ខ្លួនឲ្យពួកគេចេះទទួលយក នូវលទ្ធផលនៃការប្រកួត ក៏ដូចជាការសម្រេចរបស់អាជ្ញាកណ្ដាល។

ឯកឧត្តម ស៊ាន បូរ៉ាត ថ្លែងក្នុងពិធីបើក

៣) ចំ ពោះអាជ្ញាកណ្ដាល ចៅក្រម ដែលជាអ្នករៀបចំនិងដឹកនាំការប្រកួតសូមរក្សានិងប្រកាន់នូវ អព្យាក្រិតភាពមនសិការវិជ្ជាជីវៈហើយផ្ដល់ភាពយុត្តិធម៌ ទៅតាមកម្រិតបច្ចេកទេសដើម្បីបង្ហាញឲ្យឃើញនូវប្រសិទ្ធផលខ្ពស់ របស់កីឡាករ។

៤)គ្រប់ផ្នែកពាក់ព័ន្ធទាំងអស់ បន្តរួមចំណែកធ្វើឲ្យចលនាកីឡាករនេះក្លាយទៅជាចលនាសង្គមជាតិទាំងមូល តាមទិសស្លោក "កីឡាសម្រាប់ទាំងអស់គ្នា ទាំងអស់គ្នាដើម្បីកីឡា"។

ដំណាលគ្នានេះ ក្រុមបាល់ទះមកពីវិទ្យាល័យ ជា ស៊ីម ចំរើនរដ្ឋ និងក្រុមវិទ្យាល័យ ហ៊ុន សែន កោះដាច់ មកពីពូល B បានប្រកួតបើកឆាកជានិមិត្តរូបផងដែរ។

Western Cup 2015 រៀបចំឡើងដោយសាកលវិទ្យាល័យវេស្ទើន ក្រោមការឧបត្តម្ភដោយក្រុមហ៊ុនដៃគូមួយចំនួនដូចជា M-150, រោងភាពយន្តលេជេន ស៊ីធីម៉ល, ផ្សាទំនើប Cambodian, Superstore, ភេសជ្ជកម្ពុជា, សាលាវេស្ទើនអន្តរជាតិ, មជ្ឍមណ្ឌលបណ្ដុះបណ្ដាលវេស្ទើន, Sokha Hotel and Resorts និង វេបសាយ Sabay៕