តួលេខមិនធ្លាប់មានត្រឹមជាងកន្លះខែដើមឆ្នាំ ២០១៥ មាន ១២ រឿងស្នើសុំទិដ្ឋាការពីនាយកដ្ឋានភាពយន្ត!

2015-01-20 16:08:18
ចំនួនមតិ 0 | ចំនួនចែករំលែក 0

ចន្លោះមិនឃើញ

តួលេខមិនធ្លាប់មានសម្រាប់វិស័យភាពយន្តខ្មែរ ដោយត្រឹមតែពាក់កណ្ដាលខែ មករា ឆ្នាំ ២០១៥ ប៉ុណ្ណោះ នាយកដ្ឋានភាពយន្ត ចេញទិដ្ឋាការឱ្យខ្សែភាពយន្តខ្មែរ ចំនួន ១២ រឿង។ ធៀបនឹងឆ្នាំ ២០១៤ កន្លងទៅគឺចំនួនកើនឡើងទ្វេដង គិតត្រឹមរយៈពេលដូចគ្នា។ នេះបើតាមការឱ្យដឹងពីលោក ស៊ិន ចន្ទសាយ៉ា ប្រធាននាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ។

លោកប្រាប់ Sabayថា៖"យើងមិនធ្លាប់មានតួលេខណាដូចនេះទេពីមុនមក ព្រោះជាងកន្លះខែប៉ុណ្ណោះដើមឆ្នាំ២០១៥ យើងចេញទិដ្ឋាការឱ្យផលិតករ ១២រឿង ខណៈឆ្នាំមុនៗយើងផលិតបានតែជាង ២០រឿងប៉ុណ្ណោះក្នុងមួយឆ្នាំពេញ។ ទិន្នន័យនេះគឺកើនឡើងគួរឱ្យចាប់អារម្មណ៍មែនទែន"។

លោក ស៊ិន ចន្ទសាយ៉ា ប្រធាននាយកដ្ឋាភាពយន្ត និងផ្សព្វផ្សាយវប្បធម៌

ប្រធាននាយកដ្ឋានភាពយន្តខាងលើបន្តថា ខ្សែភាពយន្តចំនួន ១២រឿងដែលនាយកដ្ឋានរបស់លោកបានចេញទិដ្ឋាការឱ្យកាលពីពេលថ្មីៗ សុទ្ធសឹងតែជារឿងដុំប៉ុណ្ណោះ។ ដោយឡែករឿងភាគដាក់បញ្ចាំងតាមទូរទស្សន៍ លោកប្រាប់ថាមិនស្ថិតក្រោមការគ្រប់គ្រងលោកឡើយ គឺស្ថិតក្រោមក្រសួងព័ត៌មាន។

ការកើនឡើងចំនួនទ្វេដងនៃការស្នើសុំទិដ្ឋាការផលិតកុនពីផលិតកម្មនានាត្រូវលោក ស៊ិន ចន្ទសាយ៉ា ប្រាប់ថាគឺជាសញ្ញាវិជ្ជមានមួយអាចធ្វើឱ្យវិស័យភាពយន្តខ្មែរបោះជំហានទៅមុខអាចប្រកួតប្រជែងនឹងភាពយន្តបរទេស ក៏ដូចជាតម្រូវការក្នុងស្រុកគ្រប់គ្រាន់។ លោកជឿជាក់ថាឆ្នាំ២០១៥ ចំនួនការផលិតខ្សែភាពយន្តខ្មែរអាចលើសពី ៣០រឿង តាមរយៈការស្នើសុំទិដ្ឋាការបន្តបន្ទាប់។

ទន្ទឹមនឹងការឃើញវិស័យភាពយន្តងើបឡើងវិញ ដោយមានផលិតករជាច្រើននាំគ្នាងាកមកផលិតកុនច្រើន ប្រធាននាយកដ្ឋានភាពយន្តរូបនេះ ក៏បានបង្ហាញពីក្ដីបារម្ភផងដែរ។ បារម្ភនៅត្រង់ថា ខ្សែភាពយន្តខ្មែរ ១២រឿងខាងលើបានស្នើសុំទិដ្ឋាការផលិត គឺភាគច្រើនជារឿងបែបកំប្លែង និងរឿងខ្មោច។ កត្តានេះអាចធ្វើឱ្យទស្សនិកជនលែងចង់ទស្សនាខ្សែភាពយន្តខ្មែរតទៅទៀតនាពេលខាងមុខ។

“យើងឃើញថាភាគច្រើនរឿងខ្មែរយើងបច្ចុប្បន្នធ្វើស្រដៀងៗគ្នាមែន។ ខ្ញុំខ្លាចតែទស្សនិកជនគេញ៉ាំសម្លហ្នឹងច្រើនដងហើយ គេលែងចង់ញ៉ាំតទៅទៀត។ ដូច្នេះផលិតករយើងគូរពិចារណាបន្ថែម ត្រូវរកអ្វីថ្មីពីនេះ ដើម្បីធ្វើឱ្យខ្លួនមានទីផ្សារទៅមុខទៀត"។ លោក ស៊ិន ចន្ទសាយ៉ា បន្ថែម។

ក្នុងឆ្នាំ២០១៤ កន្លងទៅចំនួនខ្សែភាពយន្តខ្មែរដាក់បញ្ចាំងតាមរោងភាពយន្តមានតែជាង ២០ប៉ុណ្ណោះ ខណៈការនាំចូលខ្សែភាពយន្តបរទេសមានជាង ១៥០រឿងក្នុងមួយឆ្នាំៗ។ ចំនួនខ្សែភាពយន្តទាំងខ្មែរ និងបរទេស ដាក់បញ្ចាំងតាមរោងភាពយន្តនានា ក្នុងមួយឆ្នាំ ចន្លោះពី ១៣០ ទៅ ១៧០រឿង៕

អានអត្ថបទបន្ត៖ ក្លាយជាតារាចម្រៀងអាជីព ប្រុក ចាន់ថន បារម្ភរឿងសិក្សា

អានអត្ថបទបន្ត៖ តាចាស់ចាក់ក្បាច់ Michael Jackson ធានាថា សើច!

អានអត្ថបទបន្ត៖ រូបថតស្លៀក Bikini សិចស៊ី Han Gaeun ធ្វើឱ្យ Fan អត្ថបទ៖ អ៊ីង សុឡា