"សារនឹកគុណគ្រូ ” ជាច្រើនត្រូវបានផ្ញើយ៉ាងផុលផុសមិនធ្លាប់មាន មុនថ្ងៃទិវាគ្រូបង្រៀនមកដល់

2014-10-02 23:51:44
ចំនួនមតិ 0 | ចំនួនចែករំលែក 0

ចន្លោះមិនឃើញ

អមដោយរូបថតជាមួយ គ្រូរបស់ខ្លួនជាច្រើនសន្លឹក និងខ្លះទៀតបានផលិតជាវីដេអូគ្លីបផង ត្រូវគេសង្កេតឃើញបង្ហោះយ៉ាងព្រោងព្រាតមិនធ្លាប់មានលើបណ្តាញសង្គម ពិសេសលើទំព័រ Facebook របស់ក្រសួងអប់រំយុវជន និងកីឡាតែម្តង។ សារអរគុណ និងនឹកដល់គុណបំណាច់របស់គ្រូទាំងនេះ ឃើញមានច្រើននៅមុនការមកដល់នៃថ្ងៃទិវាគ្រូបង្រៀនពិភពលោកថ្ងៃទី៥ ខែតុលា។

យុវជន តាន ហ័រឆាយ(ឈ្មោះក្នុងបណ្តាញសង្គម) ក្នុងសាររបស់ខ្លួនបានប្រៀបប្រដូចលោកគ្រូ-អ្នកគ្រូ ជាឪពុកម្តាយ ដ៏ល្អ ដែលរូបគេមិនអាចបំភ្លេចបាន។ "លោកគ្រូ ពិត ប៊ុនណា បង្រៀន គណិតវិទ្យា និងលោកគ្រូ-អ្នកគ្រូ ទាំងអស់ ដែលបង្រៀននៅវិទ្យាល័យ ហ៊ុនសែន បល័ង្ក គាត់គឺជាគ្រូ ក៏ដូចជាឪពុកម្ដាយដ៏ល្អ ដែលពួកយើងចង់ចាំមិនអាចបំភ្លេចបាន”។

យុវតី វត្តី ហេង បានសរសេរថា "ក្នុងនាមយើងខ្ញុំជាសិស្សរបស់លោកគ្រូ ប៉ឹក ប៊ុនបញ្ញា សូមថ្លែងអំណរគុណដល់លោកគ្រូ ដែលបានជួយបង្ហាត់បង្រៀន ឲ្យពួកខ្ញុំមានចំណេះដឹង ហើយថែមទាំងផ្តល់បទពិសោធន៍ល្អៗ ជាច្រើនដល់ពួកយើង។ ក្នុងឱកាស ទិវាគ្រូបង្រៀននេះពួកយើងដែលជាសិស្សថ្នាក់ទី១២ក នៃសាលារៀនអន្តរទ្វីបអាមេរិកាំង សូមជូនពរឲ្យលោកគ្រូមានសុខភាពល្អ រកទទួលទានមានបានគ្រប់ទិនទិវារាត្រី”។

ចំណែកអតីតសិស្ស វិទ្យាល័យ ប៊ុនរ៉ានី ហ៊ុន សែន មេមត់ ឯណោះវិញក៏បាន សម្ដែងនូវការដឹងគុណដ៏ស្មោះដល់លោកគ្រូ-អ្នកគ្រូ ទាំងអស់ ដែលលោកបានខិតខំបណ្ដុះបណ្ដាលឱ្យមានការងារដូចសព្វថ្ងៃ និងសូមលោកគ្រូ-អ្នកគ្រូ ទាំងអស់ ជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

“នៅពេល ដែលយើងល្ងិតល្ងង់ មិនយល់មេរៀនពិបាកចិត្ត អស់សង្ឃឹម ។ លោកគ្រូ អ្នកគ្រូតែងតែមកក្បែរយើងជានិច្ច។ លោកខិតខំបង្ហាត់បង្រៀន ប្រៀនប្រដៅណែនាំ យើងឲ្យខិតខំប្រឹងប្រែងសិក្សា តស៊ូព្យាយាមគ្រប់ពេលវេលា។ លោកមិន ដែលទុកយើងចោល ឲ្យក្លាយជាជនល្ងង់ខ្លៅទេ លោកតែងតែមកក្បែរយើង លើកទឹកចិត្ត និងផ្តល់នូវស្នាមញញឹម ដល់ពួកយើងជានិច្ច”។ នេះគឺជាសំណេររបស់យុវជន ធិន ឌីម៉ង់ អតីតសិស្សវិទ្យាល័យនេតយ៉ង់ ខេត្តបាត់ដំបង សរសេរនៅលើបណ្តាញសង្គម។ យុវជនដដែលបានបៀបប្រដូចគ្រូទៅនឹង គឺជាព្រះរស់ទីពីរ ជាឪពុកម្តាយទី២ ដែលខិតខំប្រឹងប្រែងគ្រប់បែបយ៉ាង ដើម្បីជួយចម្លងកូនៗឲ្យក្លាយជាកូនល្អ សិស្សល្អ និងជាពលរដ្ឋល្អនៅ ក្នុងសង្គមនេះ។ ដូច្នេះមិនភ្លេចគុណគ្រូ ព្រមទាំងអនុស្សាវរីយ៍ទាំងឡាយ ដែលលោកបានផ្តល់ឲ្យឡើយ។

ក្រសួងអប់រំយុវជន និងកីឡាបានអនុញ្ញាតឲ្យសិស្ស និងអតីតសិស្ស-និស្សិត ផ្ញើរូបថតគ្រូបង្រៀន និងសាររបស់ខ្លួនតាមរយៈសារហ្វេសប៊ុកមកកាន់ទំព័រ Facebook ក្រសួងអប់រំ ដើម្បីត្រូវបង្ហោះលើទំព័របណ្តាញសង្គមក្រសួង៕