ជីវិតពិតក្នុងព្រៃអាម៉ាហ្សូន ដែលលោកអ្នកកម្របានឃើញ

2015-01-28 22:37:28
ចំនួនមតិ 0 | ចំនួនចែករំលែក 0

ចន្លោះមិនឃើញ

អាម៉ាហ្សូន គឺជាតំបន់ព្រៃដាច់ស្រយាលមួយ ដែលស្ទើរតែគ្មានទំនាក់ទំនងជាមួយពិភពលោកខាងក្រៅ គ្មានបច្ចេកវិទ្យាទៅដល់ គ្មានរបស់ទំនើបប្រើប្រាស់ និងរស់នៅតាមរបៀបប្រពៃណីជនជាតិដើមសុទ្ធសាធ។ តំបន់ព្រៃរងទឹកភ្លៀងនេះ លាតសន្ធឹងលើផ្ទៃដីប្រមាណ ៥,៥លានគីឡូម៉ែត្រក្រឡា នៅអាមេរិកខាងត្បូង។

មនុស្សតិចតួចបំផុតដែលចូលទៅដល់តំបន់ព្រៃអាម៉ាហ្សូន ហើយអ្នករស់នៅក្នុងតំបន់នោះក៏មិនងាយរសាត់អណ្ដែតកាយមកដល់ពិភពខាងក្រៅដែរ។ យ៉ាងណាមិញ យូរៗម្ដងគេឃើញជនជាតិដើមនៅក្នុងតំបន់ព្រៃអាម៉ាហ្សូន ភៀសខ្លួនរត់ចោលជម្រក ធ្លាយមកដល់ប្រទេសនានានៅជាប់នោះ ដូចជាប្រេស៊ីល កូឡុំប៊ី វេណេហ្ស៊ុយអេឡា និងអេក្វាឌ័រជាដើម ដោយសារការយាយីពីអ្នកកាប់ព្រៃខុសច្បាប់។

ពួកគេហាក់ភ្ញាក់ផ្អើលជាខ្លាំងពេលចេញមកដល់ទឹកដីខាងក្រៅ ដែលខុសគ្នាដាច់ស្រលះពីតំបន់ខ្លួនរស់នៅ និងគ្មានជម្រើសអ្វីក្រៅពីរកផ្លូវវិលត្រលប់ទៅកាន់កន្លែងដើមវិញឡើយ។ សព្វថ្ងៃ តំបន់ដែលជនជាតិដើមទាំងនោះកំពុងរស់នៅ បានទទួលរងការបំផ្លិចបំផ្លាញព្រៃឈើដោយខុសច្បាប់ ត្រូវឈ្មួញទុច្ចរិតបំពានយាយីបាត់បង់ទីជម្រក រត់ខ្ចរខ្ចាយបែកបាក់គ្នាអស់យ៉ាងច្រើន។

យ៉ាងណាក៏ដោយ អ្នកថតរូបជនជាតិព័រទុយហ្គាល់ម្នាក់ឈ្មោះ Daniel Rodrigues បានជម្នះឧបសគ្គសម្រេចក្ដីសុបិន ចូលទៅក្នុងព្រៃរងទឹកភ្លៀងតំបន់អាម៉ាហ្សូន ដើម្បីផ្តិតយករូបភាពពិតៗ។ ក្ដីស្រមៃរបស់លោក Daniel បានសម្រេចចេញជាផ្លែផ្កាកាលពីឆ្នាំមុននេះ។ ពេលចូលទៅដល់ទីនោះ លោកបានប្រទះឃើញកុលសម្ព័ន្ធមួយឈ្មោះ Awa-Guaja ត្រូវរងការគំរាមកំហែងយ៉ាងខ្លាំងពីអ្នកកាប់ព្រៃខុសច្បាប់។ ពួកឈ្មួញទុច្ចរិត បានផ្លាស់ប្ដូរកន្លែងស្ងប់ស្ងាត់ដែលធ្លាប់រស់នៅដោយមានក្ដីសុខរបស់ជនជាតិដើមទាំងនោះ ជាមួយសំឡេងកាប់ឈើលាន់ឮរំពង ព្រមទាំងស្នូរកាំភ្លើង និងវាតទីបំផ្លាញទីលំនៅរបស់ពួកគេផង។ ទាំងនេះ គឺជាជីវិតពិតនៃអ្នករស់នៅតំបន់ព្រៃអាម៉ាហ្សូន ដែលកំពុងរងការគំរាមកំហែង៕