នាយកក្រុមវិទ្យាល័យភ្នំពេញថ្មីរំពឹងឈ្នះជើងឯក Western Cup ដល់៩០%

2015-02-05 16:07:10
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយកក្រុមបាល់ទះវិទ្យាល័យ ហ៊ុន សែន ភ្នំពេញថ្មីពុំការមានការព្រួយបារម្ភអ្វីឡើយនៅពេលក្រុមរបស់លោកប៉ះក្រុមវិទ្យាល័យព្រែកលៀបសម្រាប់វគ្គ៨ក្រុមចុងក្រោយនៃពានបាល់ទះ Western Cup ដែលនឹងប្រព្រឹត្តិនាថ្ងៃទី៦ ខែកុម្ភៈនេះវេលាម៉ោង២រសៀលនៅវិទ្យាល័យពងទឹក។

លោក ឆាយ សុងលី នាយកវិទ្យាល័យ និងជាអ្នកដឹកនាំក្រុមភ្នំពេញថ្មីបានឲ្យដឹងថា សមាជិកក្រុមរបស់លោកបានប្រឹងប្រែងហ្វឹកហាត់តាំងពីដើមឆ្នាំមកម្ល៉េះ ហើយការជួបវិទ្យាល័យព្រែកលៀបក្នុងវគ្គ៨ក្រុមចុងក្រោយនេះមិនមានអ្វីគួរឲ្យព្រួយបារម្ភឡើយ។ «ខ្ញុំមានទំនុកចិត្តថាអាចឈានចូលវគ្គពាក់កណ្តាលផ្តាច់ព្រ័ត្រ។

លោក ឆាយ សុងលី នាយកវិទ្យាល័យ ហ៊ុន សែន ភ្នំពេញថ្មី

លោកថា ក្រុមរបស់លោកជាក្រុមខ្លាំងមួយក្នុងចំណោមក្រុមវិទ្យាល័យ៤នៅភ្នំពេញរួមមាន វិទ្យាល័យ ព្រែកឯង វិទ្យាល័យពងទឹក និងវិទ្យាល័យ ហ៊ុន សែន ជម្ពូវ័ន។ លោកបញ្ជាក់ថា ៖«តាមការពិនិត្យរបស់ខ្ញុំ ឆ្នាំនេះខ្ញុំគិតថាអាចឈ្នះជើងឯកបានរហូតដល់ទៅ៩០% ព្រោះកីឡាកររបស់ខ្ញុំទាំងអស់ដែលជួយសាលារបស់ខ្ញុំឲ្យឈ្នះជើងឯកនោះបាត់មុខតែម្នាក់គត់ ក្រៅពីនោះនៅទាំងអស់»។

ចំណែកលោក ស្រេង សេង ប្រធានការិយាល័យមន្ទីរអប់រំរាជធានីភ្នំពេញបាននិយាយថា ក្រោមការតាមដានការប្រកួតកន្លងមក ក្រុមទាំងអស់ លោកគិតថាមានក្រុមចំនួន៤ខាងលើអាចមានឱកាសប្រជែងយកចំណាត់ថ្នាក់ល្អបាន។

លោកបានសង្កត់ធ្ងន់លើវិទ្យាល័យភ្នំពេញថ្មីជាងគេ ដោយក្រុមនេះជាជើងឯកចាស់ ហើយឆ្នាំនេះនៅតែធ្វើបានល្អសម្រាប់ការប្រកួតកន្លងមក។

សម្រាប់ថ្ងៃទី៦ ខែកុម្ភៈនេះ ក៏មានមួយគូទៀតជាការជួបគ្នារវាងក្រុមវិទ្យាល័យកោះដាច់ និងវិទ្យាល័យព្រែកឯកនៅទីលានវិទ្យាល័យពងទឹក វេលាម៉ោង៤រសៀល៕