វិទ្យាល័យពងទឹក និង ឬស្សីកែវ ធ្វើម្ចាស់ផ្ទះវគ្គជម្រុះ ៨ ក្រុម Western Cup

2015-02-06 17:23:43
ចំនួនមតិ 0 | ចំនួនចែករំលែក 0

ចន្លោះមិនឃើញ

វិទ្យាល័យពងទឹក និង វិទ្យាល័យឬស្សីកែវ ទទួលធ្វើជាម្ចាស់ផ្ទះនៅវគ្គជម្រុះពានរង្វាន់បាល់ទះសម្រាប់សិស្សវិទ្យាល័យទូទាំងរាជធានីភ្នំពេញ Western Cup 2015 នៅវគ្គ ១/៤ ផ្ដាច់ព្រ័ត្រដែលប្រមូលផ្ដុំដោយក្រុមខ្លាំងៗ ចាប់ពីម៉ោង ២ រសៀលតទៅ នៅថ្ងៃទី ៦ និង ៦ កុម្ភៈ ឆ្នាំ ២០១៥ នេះ។

នៅថ្ងៃទី ៦ កុម្ភៈ នេះ ក្រុមជើងឯកឆ្នាំចាស់ វិទ្យាល័យហ៊ុនសែនភ្នំពេញថ្មី ត្រូវជួបក្រុមវិទ្យាល័យព្រែកលៀប វេលាម៉ោង ២ នៅទីលានវិទ្យាល័យពងទឹក។ សម្រាប់ក្រុមព្រែកលៀប ជាជើងខ្លាំងមកពីពូល B ដោយធ្លាប់ឈ្នះក្រុមវិទ្យាល័យជាស៊ីមជ្រោយចង្វារ ដោយលទ្ធផល ៣ សិត ទល់ ០ និង បន្តឈ្នះក្រុមវិទ្យាល័យឫស្សីកែវ ៣ សិត ទល់ ១ សិត កាលពីវគ្គជម្រុះតាមពូល។ ចំណែកលោក លោក អ៊ុក វណ្ណៈ គ្រូបង្វឹកក្រុមវិទ្យាល័យហ៊ុនសែនភ្នំពេញថ្មី មានសង្ឍឹមដល់ទៅ ៨០% ដើម្បីការពាតតំណែងជើងឯកឆ្នាំនេះ។

នៅលើទីលានដដែលក្រុមវិទ្យាល័យកោះដាច់ ត្រូវជួបក្រុមវិទ្យាល័យព្រែកឯង នៅម៉ោង ៤ រសៀល ដើម្បីរកកៅអីឡើងទៅវគ្គ ៤ ក្រុមចុងក្រោយ។

ចំណែកនៅរសៀលថ្ងៃស្អែកក្រុមវិទ្យាល័យពងទឹក ត្រូវជួបវិទ្យាល័យជាស៊ីមសាមគ្គី នៅម៉ោង ២ រសៀល លើទឹកដីវិទ្យាល័យឬស្សីកែវ។ ចំណែកក្រុមវិទ្យាល័យដើមថ្កូវ ត្រូវប៉ះក្រុមវិទ្យាល័យហ៊ុនសែនជម្ពូវ័ន្ត នៅម៉ោង ៤ រសៀល។

ពានរង្វាន់សម្រាប់តែសិស្សវិទ្យាល័យនេះមានក្រុមចូលរួមចំនួន ៣២ ដោយបែងចែកទៅជា ៤ ពូល ក្រុមខ្លាំងតាមពូលនីមួយៗ ចំនួន២ ក្រុមមានកៅអីឡើងទៅលេងនៅវគ្គបន្ទាប់ ដើម្បីប្រជែងរង្វាន់ប្រាក់លាន។ ក្រុមជើងឯកនឹងទទួលទឹកប្រាក់ចំនួន ១០ លានរៀល ខណៈក្រុមជើងឯករកបាន ៦ លានរៀល ក្រុមលេខ ៣ នឹងទទួលបានទឹកប្រាក់ ៤ លានរៀល និងក្រុមលេខ ៤ ចំនួន ៣ លានរៀល។

Western Cup 2015 រៀបចំឡើងដោយសាកលវិទ្យាល័យវេស្ទើន ក្រោមការឧបត្ថម្ភដោយក្រុមហ៊ុនដៃគូមួយចំនួនដូចជា ភេសជ្ជៈ M-150, រោងភាពយន្តលេជេន, ផ្សារទំនើប Cambodian Superstore, ភេសជ្ជៈ AQUARIUS, សាលាវេស្ទើនអន្តរជាតិ, មជ្ឈមណ្ឌលបណ្ដុះបណ្ដាលវេស្ទើន, Sokha Hotel and Resorts និង វេបសាយ Sabay។

សរុបសាលាដែលធ្លាប់ឈ្នះពានរង្វាន់នេះតាំងពីបង្កើតមកមាន ឆ្នាំ ២០១០ បានទៅវិទ្យាល័យឬស្សកែវ ហើយឆ្នាំ ២០១១ ធ្លាក់ទៅវិទ្យាល័យហ៊ុនសែន ជម្ពូវ័ន វិញម្ដង។ ចំណែកនៅឆ្នាំ ២០១២ បានទៅវិទ្យាល័យព្រែកលៀប ប៉ុន្ដែនៅឆ្នាំ ២០១៣ វិទ្យាល័យហ៊ុនសែន ជម្ពូវ័ន ដណ្ដើមបានមកវិញ និង ចុងក្រោយឆ្នាំ ២០១៤ បានមកវិទ្យាល័យ ហ៊ុនសែន ភ្នំពេញថ្មី៕