គ្រូជើងឯក ជើងឯករងពានបាល់ទះ Western Cup ប្រាប់ពីគន្លឹះជោគជ័យ

2015-02-17 18:42:20
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អ៊ុក វណ្ណៈ ប្រធានក្រុមបច្ចេកទេសនិងជាគ្រូបង្វឹក វិទ្យាល័យសម្ដេច ហ៊ុន សែន ភ្នំពេញថ្មីដែលបានឈ្នះជើងឯកបាល់ទះ Western Cup បញ្ជាក់ពីភាពជោគជ័យរបស់ក្រុមលោកគឺមានបច្ចេកទេសខ្ពស់ ខណៈលោក ខាវ ថន គ្រូបង្វឹកវិទ្យាល័យសាមគ្គីដែលបានជើងឯករងថា ក្រុមរបស់លោកក៏ល្អបច្ចេកទេសដែរ តែស្មារតីនៅខ្សោយ។

ប្រធានក្រុមបច្ចេកទេស និង ជាគ្រូបង្វឹកវិទ្យាល័យសម្ដេចហ៊ុនសែនភ្នំពេញថ្មីលោក អ៊ុក វណ្ណៈ បានលើកឡើងថា ក្រុមរបស់លោកទទួលបានជោគជ័យអាចមកពីកត្តាច្រើនករណីគឺទីមួយក្រុមរបស់មានវិន័យ និងបច្ចេកទេសល្អ។ ពួកគេទទួលបានការអប់រំ និងសិក្សាខ្ពស់ពីគ្រូ និងជំនួយការទាំងអស់ ពិសេសកីឡាករម្នាក់ៗតស៊ូ និងប្រឹងប្រែងហ្វឹកហាត់។

«កូនក្រុមរបស់ខ្ញុំ មានការត្រៀមខ្លួនយូរ និងបានហ្វឹកហាត់ប្រកបដោយ ភាពស្វាហាប់ ហើយទទួលបានបច្ចេកទេសល្អៗ ពីពូកយើង។ ម៉្យាងទៀត ក្រុមយើងមានបទពិសោធន៍ច្រើនសម្រាប់ការប្រកួតកន្លងមក»។ គ្រូបង្វឹកខាងលើបាននិយាយ។

លោកបន្ថែមថា ការប្រកួតផ្តាច់ព្រ័ត្រកាលពីម្សិលមិញពិតជាមានភាពតានតឹង ពីព្រោះគូប្រជែងជាក្រុមខ្លាំង។ «សម្រាប់ការប្រកួតកន្លងទៅយើងអាចយកឈ្នះបានដោយប្រកួតត្រឹងតែ៣សិត តែលើកនេះប្រកួតរហូតដល់ទៅ៥សិត វាជាការប្រកួតយ៉ាងស្វិតស្វាញ តែសូមសរសើរការប្រឹងប្រែងរបស់សមាជិកក្រុមខ្ញុំដែលគេនាំមុខ ហើយទីបំផុតតាមទាល់តែឈ្នះ»។

ចំណែកលោក ខាវ ថន គ្រូបង្វឹកវិទ្យាល័យសាមគ្គីវិញប្រាប់ថា ក្រុមរបស់លោកខកចិត្តខ្លះដែរ ពីព្រោះវគ្គផ្តាច់ព្រ័ត្របាននាំមុខក្រុមគេពីរទៅបីដងហើយនៅតែធ្វើឲ្យគេវាយបកតាមស្មើរហូតយកឈ្នះទាល់តែបាន។

លោកថា ៖«មើលទៅបច្ចេកទេសមិនលើសខ្វះគ្នាប៉ុន្មានទេ តែអ្វីដែលសំខាន់គឺស្ថិតលើស្មារតី កូនក្រុមខ្ញុំប្រហែលជាភ័យខ្លះ តែខ្ញុំសប្បាយចិត្ត ទោះមិនបានជាប់លេខ១ ក៏យើងប្រឹងអស់ពីលទ្ធភាពហើយយើងបានលេខពីរដែរ»។

លោកបន្ថែមថា ការបរាជ័យនេះលោកបានប្រឹងប្រែងអស់សមត្ថភាពហើយ។ លោកដឹងថារឿងសំខាន់កូនក្រុមរបស់លោកក៏នឿយហត់ណាស់ តែសប្បាយចិត្តទាំងអស់គ្នា ព្រោះសិស្សទាំងអស់បានប្រឹងប្រែង ហាត់តាំងពីដើមមក។

ចំណាត់ថ្នាក់លេខ៣បានទៅក្រុមវិទ្យាល័យព្រែកឯង និងលេខ៤បានទៅក្រុមវិទ្យាល័យជម្ពូវ័ន្ត៕