លីក បាល់បោះកម្ពុជា រដូវកាលថ្មីចាប់ផ្ដើមពីខែ មីនា ដល់ សីហា

2015-02-18 23:04:47
ចំនួនមតិ 0 | ចំនួនចែករំលែក 0

ចន្លោះមិនឃើញ

លីកបាល់បោះកម្ពុជារដូវកាលថ្មី (Cambodian Basketball League) លើកទី៣ ឆ្នាំ ២០១៥ ត្រូវបានរដ្ឋមន្រ្តីក្រសួងអប់រំយុវជននិងកីឡា ហង់ ជួន ណារ៉ុន បានចុះហត្ថលេខាសម្រេចឱ្យប្រើប្រាស់ហេដ្ឋារចនាសម្ព័ន្ធក្នុងពហុកីឡដ្ឋានជាតិចាប់ពីថ្ងៃទី ១ ខែ មីនា រហូតដល់ ១ ខែ សីហា ឆ្នាំ ២០១៥។

ការប្រកួតក្នុងលីកបាល់បោះកម្ពុជា កាលពីរដូវកាលមុន

លីកបាល់បោះកម្ពុជា កាលពីឆ្នាំ ២០១៤ មានក្រុមចូលរួមចំនួន ១០ ក្រុម ដោយជើងឯកបានទៅក្រុមPate 310 ក្រោយផ្តួល Davies Paints ទាំងប្រផិតប្រផើយក្នុងលទ្ធផល ៥៦ – ៥៤ នៅវគ្គផ្ដាច់ព្រ័ត្រ អមដោយពានរង្វាន់ ១ និងទឹកប្រាក់ ៤ លានរៀល។

យោងតាមសេចក្ដីជូនដំណឹងរបស់សហព័ន្ធ ការប្រកួតនេះរៀបចំឡើងរៀងរាល់ថ្ងៃ សៅរ៍ និងអាទិត្យ នៅទីលានបាល់បោះក្នុងបរិវេណវិមាននៃ ពហុកីឡដ្ឋានជាតិ។

គណៈកម្មការរៀបចំការប្រកួតបានកំណត់ថាក្រុមនីមួយអាចសុំធ្វើការចុះឈ្មោះកីឡាករបានចំនួន ១៦ នាក់ ហើយនៅគ្រប់ពេលប្រកួតត្រូវបំពេញឈ្មោះកីឡាករ ក្នុងបញ្ជីរាយនាមចំនួន ១២ នាក់ផ្ដល់ឲ្យគណៈកម្មការប្រកួត សម្រាប់ក្រុមកីឡាបាល់បោះបរទេសត្រូវមានកីឡាករកម្ពុជាយ៉ាងតិច ០៣ នាក់ហើយម្នាក់ត្រូវលេងនៅលើទីលានប្រកួតគ្រប់វគ្គទាំងអស់។

សហព័ន្ធត្រៀមប្រាក់រង្វាន់ចំនួន ៣០០០$ ពាន ១ និងមេដៃមាស ១៥ គ្រឿង ដល់ក្រុមដែលដណ្ដើមបានជើងឯកនៅរដូវកាលថ្មីនេះ។ ចំពោះក្រុមចំណាត់ថ្នាក់លេខ ២ បានទឹកប្រាក់ ២០០០$ មេដៃប្រាក់ ១៥ គ្រឿង និងក្រុមចំណាត់ថ្នាក់លេខ ៣ ត្រូវទទួលបានប្រាក់ ១០០០$ និងមេដៃសំរឹទ្ធ១៥ គ្រឿង។

ឯការដាក់ពាក្យសុំចូលរួមប្រកួតនឹងបញ្ចប់រហូតដល់ថ្ងៃទី ២៨ ខែកុម្ភៈ ឆ្នាំ ២០១៥ វេលាម៉ោង ១៧:០០នាទីរសៀលនៅទីស្នាក់ការសហព័ន្ធកីឡាបាល់បោះកម្ពុជា(បន្ទប់លេខ ១១ នៃអគ្គនាយកដ្ឋានកីឡា)ក្នុងពហុកីឡដ្ឋានជាតិ។ ចង់ដឹងព័ត៌មានបន្ថែមសូមទាក់ទងតាមទូរស័ព្ទលេខ ០១២ ៤១៧ ២៥៤ ឬ អ៊ីម៉ែល asktheCBL@gmail.com ឬ Facebook Page Cambodia Basketball Federation៕